13 сая хүн амтай Шиань хотод 7 хоногийн хөл хорио тогтоожээ

Twitter Print
2022 оны 07-р сар 06-нд 14:38 цагт
Мэдээний зураг,

Их Британи болон АНУ-д ихээр бүртгэгдээд байгаа коронавирусын омикрон хувилбарын халдварлах чадвар өндөртэй дэд хувилбар Хятадын Шаньси мужийн Шиань хотод бүртгэгдсэнтэй холбоотойгоор 13 сая хүн амтай тус хотод долоо хоногийн хөл хорио тогтоожээ.

Байгууллага, аж ахуйн нэгжүүд, сургууль, зоогийн газрууд хөл хорионы 7 хоногийн хугацаанд үүд хаалгаа барих аж. Шаньси мужийн нийслэл Шиань хотод өнгөрсөн бямба гарагаас хойш 18 тохиолдол бүртгэгджээ.

"Өндөр эрсдэл" бүхий хорооллуудын иргэдийг гэрээсээ гарахыг хориглосон ба Шаньси мужийн Өвчний хяналт, өвчнөөс урьдчилан сэргийлэх төвийн мэргэжилтэн Жань Игийн мэдээлснээр Шиань хотод омикроны дэд хувилбар BA.5 тархаад байгаа аж. Тэрээр, "Омикроны BA.5 дэд хувилбар нь халдварлах чадвар өндөртэй, илүү хурдан тархдаг. Мөн уг вирус нь хүний бие дэх эсрэг биеэс зугтах зайлсхийх чадвартай." хэмээн өнгөрсөн мягмар гарагт сэтгүүлчдэд мэдэгджээ.

Омикроны BA.5 дэд хувилбар нь Шанхай болон Бээжинд хөл хорио тогтооход хүргэсэн BA.2.2 дэд хувилбараас ч илүү хурдан халдварладаг нь Хятадын цар тахлын эсрэг бодлогын хэрэгжилтийг хүндрүүлэх бас нэг хүчин зүйл болоод байна. БНХАУ коронавирусын цар тахалтай хөл хорио тогтоож, тусгаарлаж, хилээ хаах зэрэг арга хэмжээ тогтоож тэмцэж буй сүүлийн орнуудын нэг болоод байгаа билээ.

Энэ лхагва гарагийн шөнө дундаас эхлэн Шиань хотын уушийн газрууд, интернет кафе, караоке барууд үүд хаалгаа барьжээ Ерөнхий боловсролын сургуулиуд зуны амралтаа эрт эхлүүлж, их дээд сургуулиуд кампусаа хаажээ. Өмнө нь 12-р сараас 1-р сарын хооронд Шианьд нэг сар хөл хорио тогтоож байсан ба хөл хорионы үеэр иргэд хоол хүнсгүй болох, эмнэлгийн тусламж үйлчилгээ авч чадаагүй асуудлууд гарч байсан билээ.

Өнгөрсөн мягмар гарагт Хятадад коронавирусын нийт 355 тохиолдол бүртгэгдсэний дийлэнх нь шинж тэмдэг илрээгүй тохиолдлууд байсан байна.

Шанхай хотын удирдлагууд ирэх 3 өдөрт хотын 25 сая оршин суугчдыг коронавирусын 2 удаагийн шинжилгээнд хамруулахаар төлөвлөжээ Хятадын төвд байрлах Аньхуй мужид нийт 1.7 сая хүн коронавирусын халдварын тархалтын улмаас хөл хорионд ороод байгаа аж.

Эх сурвалж: Reuters

Содномцэрэнгийн Энхзаяа 

mongolcom.mn 

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.