Нэг удаагийн оношлуурыг угаагаад дахин хэрэглэж байсны улмаас олон мянган хүн хохирчээ

Twitter Print
2021 оны 05-р сар 06-нд 12:01 цагт
Мэдээний зураг,

Индонезийн төрийн өмчит Кимиа Фарма эмийн компанийн хэд хэдэн ажилчдыг коронавирусын халдвар илрүүлэх нэг удаагийн оношлуурыг угаагаад дахин хэрэглэж байсан хэргээр баривчилжээ.

Индонезийн цагдаагийн газраас мэдээлснээр Индонезийн Хойд Суматра мужийн Куаланаму нисэх онгоцны буудлаар үйлчлүүлсэн 9000 орчим зорчигч уг хэргийн хохирогч болсон аж.

Коронавирусын халдварыг илрүүлэх түргэвчилсэн оношлуурт иргэдийг хамруулах явдал улс орнуудын хувьд хэвийн үзэгдэл болсон ба ихэнх агаарын тээврийн компаниуд зорчигчиддоо онгоцонд суухаасаа өмнө коронавирусын шинжилгээнд хамрагдсан байх ёстой гэсэн шаардлага тавьж байгаа билээ.

Үүнтэй холбоотойгоор Куаланаму нисэх онгоцны буудал дээр иргэдэд төлбөртэйгээр нэг удаагийн коронавирусын халдвар илрүүлэх оношлуураар шинжилгээ хийж байсан ба онгоцны буудлын ажилчид Индонезийн төрийн өмчит Кимиа Фарма эмийн компанийн оношлуурыг ашиглаж байжээ.

Иргэдээс Куаланаму онгоцны буудал дээр хийлгэсэн шинжилгээний хариу худал гарсан гэсэн гомдол ирсэнтэй холбоотойгоор цагдаа нар шалгалт хийсэн аж. Шалгалтын явцад цагдаагийн албан хаагчид өмнө нь хэрэглэсэн нэг удаагийн оношлуурыг угаагаад дахин өөр зорчигчид хэрэглэж байсныг илрүүлжээ.

Уг хэрэгтэй холбогдуулан өнгөрсөн долоо хоногт Кимиа Фарма компанийн 5 ажилтныг баривчилсан ба сэжигтнүүдийг хэрэглэгчдийн эрх ашгийг хамгаалах тухай хуулийг зөрчиж, хэрэглэсэн нэг удаагийн оношлуурыг угаан, дахин савлаж зардаг байсан хэрэгт буруутгаад байна.

Түүнчлэн сэжигтнүүд дээрх гэмт үйлдлийнхээ тусламжтайгаар 124 800 орчим ам. долларын ашиг олсон аж. Жакартад төвтэй Кимиа Фарма эмийн компани дээрх хэрэгт холбогдсон ажилчдыг ажлаас нь халсан ба хяналтаа чангатгахаа амалсан байна.

Куаланаму нисэх онгоцны буудлаар өнгөрсөн саруудад тогтмол үйлчлүүлсэн 2 хуульч Кимиа Фарма эмийн компанийг шүүхэд өгөхөөр төлөвлөөд байгаа ба Кимиа Фарма компаниар хохирогч тус бүрт 1 тэрбум рупигийн нөхөн төлбөр төлүүлэхээр төлөвлөжээ.

Индонезийн хувьд Азийн улс орнууд дундаас коронавирусын цар тахалд хамгийн хүнд өртөөд байгаа ба тцс улсад коронавирусын халдварын 1.7 сая тохиолдол бүртгэгдэж, уг вирусын халдварын улмаас 46 мянга гаруй хүн нас бараад байгаа билээ.

Эх сурвалж: https://www.bbc.com/news/world-asia

Орчуулсан: Содномцэрэнгийн Энхзаяа

mongolcom.mn

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.