Ертөнцийн нөгөө хагаст баяр хөөр ид дундаа

Twitter Print
2015 оны 11-р сар 26-нд 11:23 цагт
Мэдээний зураг,

Улаанбаатарын цагаар нэг хоногийн зөрүүтэй байдаг дэлхий нөгөө хагаст буюу Умард Америк, Канадын хойгт яг одоо Талархлын баяр ёслол ид дундаа орж байна.

Америкийн ерөнхийлөгч уламжлалынхаа дагуу хэдийгээр ёс болгож хоёр цацагт хяруулыг амь хэлтрүүлсэн боловч америкчуудын баярын ширээнд шаргалттал сайхан шарсан цацагт хяруулын мах, сар шинийн ууц мэт тэвхийж байгаа нь тодорхой.

Сонирхолтой нь энэ жил америкчууд арваннэг, арванхоёрдугаар сарын уламжлалт баяр ёслолууддаа 700 шахам тэрбум доллар зарцуулах урьдчилсан статистик мэдээлэл гарсан байна. Энэ нь урьд жилийнхтэй харьцуулахад 4,1 хувиар их байгаа бөгөөд америкчуудын тал хувь буюу  140,1 сая хүн (АНУ-ын хүм ам 308 сая) интернэтээр түлхүү худалдаа хийсэн байна. Арваннэгдүгээр сарын 27-нд өнөөдөр тохиож байгаа «хар баасан гараг»-т өнгөрсөн жилийнхээс 3,2 саяар их  95,5 сая хүн дэлгүүр хоршоо хэсэх гэнэ.

Энэ их хөл хөдөлгөөнтэй үеэр томоохон худалдааны төвүүд хүч нэмэгдүүлэх зорилгоор түр хугацааны ажиллах хүч авдаг бөгөөд энэ жил гэхэд 725–800 мянган хүн түр ажлын байртай болжээ. Энэ тоо өнгөрсөн жил 768 мянга байсан аж.

«Хар баасан гараг» гэх үг хэллэгийг анх Филадельфи муж улсын цагдаагийн газраас гаргаж байсан бөгөөд талархлын баярын маргааш өдрийн баасан гарагт нийт ард иргэдийг гэрээс гарахгүй сайхан амарч байлгах зорилгоор 1966 онд энэ өдрийг «харлуулсан» түүхтэй. 1980-аад оноос харин уг утга илэрхийлэл өөрчлөгдөж дэлгүүр, худалдан авалтад чиглэгдсэн ирсэн бол нөгөө «хар» нэрээ зүүсээр өнөөг хүрсэн байна.

Харин яг одоо тэд 50 сая шахам цацагт хяруул амтархан идэж байгаа, энэ нь олон жилийн дундаж үзүүлэлт  аж.

Энэ сайхан өдөр олон сонирхолтой үйл явдлууд тохиолдог. Тухайлбал өнгөрсөн жил АНУ-ын Виржини мужийн Нортфолк хот дахь халамжийн төвд амьдардаг орон гэргүй нэгэн эр баярын оройн зоогны урилгад дарагдаж, америкийн хэвлэл мэдээлийг шуугиалж байлаа. 54 настай Нил Шайтэлс гэгч “Facebook”-т “Талархлын баяр”-ын оройн зоогонд урих гэр бүл хайж буйгаа бичсэнээр элэгсэг сэтгэлт хүмүүсийн урилгад дарагдаж байсан хөгжилтэй түүх бий.

Тэрээр нэг орой халамжийн төвийн найзтайгаа баярын өдрүүдэд ямар их ганцаарддаг тухайгаа ярьж суусан аж. Тэгэхдээ “Намайг оройн зоогонд урих гэр бүл байгаа болов уу?” хэмээн санааширч, “Facebook”-т энэ тухайгаа бичсэн байна. Гэтэл удалгүй түүнийг “Newport News” телевиз ярилцлаганд урьж, тэр ярилцлагыг үзсэн Англи хэлний нэгэн багш Эшли МакЛеморе түүнийг хамгийн түрүүнд зоогонд урьж, араас олон урилга тасралтгүй хөвөрч өгсөн байна. Үүгээр зогсохгүй түүний гэр болсон  халамжийн төвд хүмүүс хандив өргөж эхэлсэн гэдэг.

Сэтгүүлч Л.Отгонбат

E-mail: mongolcom.mn@gmail.com
Утас: 76110303, 76110505

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.