Америк 2022 оны Бээжингийн Өвлийн олимпыг дипломат түвшинд бойкотлож магадгүй гэлээ

Twitter Print
2021 оны 11-р сар 19-нд 10:31 цагт
Мэдээний зураг,

Америкийн төрийн албан тушаалтнууд Бээжин-2022 Олимпын наадамд оролцохгүй. АНУ-ын Ерөнхийлөгч Жо Байден Америкийн засгийн газар 2022 оны Бээжингийн Өвлийн олимпын наадмыг дипломат түвшинд бойкотлох эсэх талаар хэлэлцэж байгаа хэмээн өнгөрсөн пүрэв гарагт Канад болон Мексикийн төрийн тэргүүнүүдтэй хийх уулзалтынхаа өмнө мэдэгджээ.

Дипломат түвшинд бойкотлоно гэдэг нь Америкийн төрийн албан хаагчид Бээжингийн Олимпын наадмын ямар ч үйл ажиллагаанд оролцохгүй гэсэн үг бөгөөд уг шийдвэр тамирчид дасгалжуулагч нарт хамаарахгүй аж.

Өнгөрсөн даваа гарагт АНУ-ын Ерөнхийлөгч Жо Байден БНХАУ-ын Ерөнхийлөгч Си Жиньпин нар албан ёсны анхны уулзалтаа цахим хэлбэрээр хийсэн билээ. Цагаан ордны хэвлэлийн нарийн бичгийн дарга Жен Псакигийн мэдэгдсэнээр хоёр улсын төрийн тэргүүнүүд 3 цаг үргэлжилсэн цахим уулзалтынхаа үеэр Бээжингийн Өвлийн Олимпын наадмын талаар ярилцаагүй аж.

Америкийн Ардчилсан болон Бүгд найрамдах намын гишүүд Хятад дахь хүний эрхийн зөрчлүүд, хүний эрхэнд ноцтой халдсан явдлуудтай холбоотойгоор Бээжингийн Олимпын наадмыг эсэргүүцэхийг уриалсаар байгаа билээ.

Цагаан ордноос мэдээлснээр АНУ ирэх 2-р сарын 4-нд эхлэх Бээжингийн Өвлийн Олимпын наадамд баг тамирчдаараа оролцох эсэхээ одоог хүртэл эцэслэн шийдээгүй байгаа аж.

Вашингтоны зүгээс Хятадын эрх баригчдыг Шиньжаан мужид амьдардаг шашны цөөнх болох уйгурчуудын эрхийг ноцтой зөрчиж, Хонгконгийн улс төрийн хараат бус байдлыг үгүй хийж байна хэмээн буруутгаж байгаа билээ.

Өнгөрсөн сард Америкийн сенатын гишүүд Бээжингийн Олимпд оролцох Америкийн төрийн албан хаагчдын зардлыг АНУ-ын Төрийн департаментаас гаргахыг хориглох санал тавьсан бол конгрессийн гишүүн Нэнси Пелоси Америкийн төрийн удирдлагууд Бээжингийн Олимпд оролцсон тохиолдолд ёс зүйн хувьд нэр хүндээ алдана хэмээн онцолжээ.

Нөгөө талаас Бүгд Найрамдах намын гишүүд АНУ-ын баг тамирчдыг Бээжингийн Өвлийн Олимпын наадамд оролцуулахгүй байх нь зүйтэй гэж үзэж байна.

Эх сурвалж: BBC

Содномцэрэнгийн Энхзаяа 

mongolcom.mn

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.