ХХ дахь удаагийн “World cup”-ыг эргэн дурсахад

Twitter Print
2014 оны 11-р сар 28-нд 10:43 цагт
Мэдээний зураг,

Хүн төрөлхтний спортын хамгийн том баяр хөлбөмбөгийн дэлхийн аваргын тэмцээн бүтэн сарын турш манай гарагийн долоон тэрбум гаруй хүнийг ширэн бөмбөгийн спортын гайхамшгаар аялуулсан. 1930 оноос гараагаа эхэлсэн “World cup”-ын тэмцээн бүрт шинэ рекордууд бүртгэгдэж хэний ч таамаглаагүй баг түрүүлж, хэн ч үл таних тоглогч “од” болон гялалздаг нь бичигдээгүй хууль болжээ. 2014 онд Бразил улсад болсон тэмцээнд Герман түрүүлэхдээ олон рекордыг шинэчлэн тогтоосон. 1930 оноос хойш дөрвөн тэмцээн дараалан медаль хүртсэн улс байгаагүй.

Харин “Бундестим” 2002 онд мөнгө, 2006, 2010 онд хүрэл, 2014 онд алтан медаль хүртсэн. Мөн Польш гаралтай Герман довтлогч 16 гоол оруулж 84 жилийн түүхтэй тэмцээнд хамгийн олон гоол оруулсан тамирчин болж дэлхийд №1 болсон нь гайхалтай. Өмнө нь Бразил-Итали 1970, 1994 онд хоёр удаа шигшээд шалгарч байсан бол Герман-Аргентин 1986, 1990, 2014 онд гурван финалд тоглож дээд амжилт болон үлдлээ. Хөлбөмбөгийн агуу хоёр гүрэн хоорондоо найман удаа дэлхийн аваргад учраа таарахад Герман ганцхан хожигдож байв.

Дөрөв дэх алтан медалиа хүртсэн Герман аваргын цомтой хамт “World cup”-т хамгийн олон тоглолт хийсэн, хамгийн олон гоол оруулсан багаар шалгарчээ. 1934 онд анх оролцохдоо хүрэл медаль хүртсэн Немцүүд 18 удаа дэлхийн аваргад оролцож 106 тоглолт хийж 66 хожил, 20 тэнцээ, 20 хожигдол хүлээж, 224 гоол оруулж, 121 гоолыг хаалгандаа алдсан байна. Тэдний өмнө ганцхан Бразил бичигдэж байгаа. Таван удаа “Алтан дагина” хүртсэн Пелегийн эх орон 20 удаа болсон тэмцээнд бүгдэд нь оролцож 104 тоглолтонд 70 хожил, 17 тэнцээ, 17 хожигдол хүлээж, 221 гоолыг эсрэг багийн хаалганд оруулж 102 гоол алдаж байв.

Германы бас нэгэн дээд ажмилт 2014 онд үргэлжлэв. Хэдийгээр 1930, 1950 онд өнжсөн ч 1954 оноос хойш шөвгийн наймаас доош даваанд хожигдоогүй юм. 1934 онд хүрэл медаль хүртсэн бол 1938 онд Францад болсон тэмцээнд эхний шатанд Швейцарийн багт хожигдож 10-р байр эзэлсэн нь ард үлджээ. Тэр цагаас хойш дэлхийн аваргад хамгийн доод тал 7-р байр эзэлж нийтдээ 4 алт, 4 мөнгө, 3 хүрэл медаль хүртэж хамгийн олон медальтай шигшээ багийн амжилтаа хадгалсаар байна.

Германы шигшээ дөрөв дэх удаагаа түрүүлсэн “Бразил 2014”-ын үеэр тохиосон сонирхолтой тоглолтууд

Зөвхөн “Нисдэг Голланд” ийм гоолыг оруулж чадна

Р.Ван Персигийн нисэлтэн дундаа мөргөж оруулсан гоол Голландын шигшээ багийн Бразил дахь хувь тавиланг орвонгоор нь эргүүлсэн гэхэд болно. Хөлбөмбөг сонирхогчид, тэр дундаа “Улбар шарууд”-ын фанатууд Испанийн хаалганд оруулсан уран гоёмсог гоолын дараа шигшээ багаа өндөр амжилт үзүүлнэ гэдэгт итгэж эхэлсэн билээ. Р.Ван Персиг уг гоолоо хийсний дараа "Нисдэг Голланд" хэмээн ам бардам нэрлэсэн. Энэ гоол түүний замналын мартагдахгүй мөчүүдийн нэг байсан нь лавтай.

Итгэл найдвар хүлээлгэсэн Неймар бэртлээ

“Бразилтай Неймар торноосоо суллагдсан арслантай адилхан гэж” домогт хөлбөмбөгч З.Зидан хэлсэн удаатай. Үнэхээр ч тийм юм. Бразил хэсгийн эхний учраа Хорваттай тоглосноос эхлээд л Неймарын уран гайхалтай чадварууд зохион байгуулагч орны шигшээг илтэд амжилт руу хөтөлж байв. Гэсэн хэдий ч тэрбээр Колумбын багийн эсрэг шөвгийн наймын тулаанд бэртэл авч талбайг чөлөөлөв. Мэргэжилтнүүд түүнийг шигшээ багаа финалд хүргэнэ гэж найдаж байсан ч Неймаргүй Бразил Германы эсрэг 7 гоол хаалгандаа алдаж, эх нутагтаа гутамшигтайгаар хожигдсон. Мөн хүрэл медалийн төлөө “Улбар шарууд”-ад бут ниргүүлж, гайхамшигт нэр төрөө алдсан.

Мексикийн хаалгач “Дөрвөн гартай, зургаан хуруутай” юм шиг тоглолт үзүүллээ

Талбайн эзэн Бразилтай гоолгүй тэнцсэн Мексик өрсөлдөөнд байгаа шүү гэдгээ харуулсан. Гильермо Очоа хэмээх гайхалтай хаалгачийн ур чадвар Мексикийн багийг чимж чадсан. Түүний ур чадвар шигшээ багаа амжилтад хүргэх гол түлхэцүүдийн нэг нь байв. “Бразил 2014”-ын шилдэг таван хаалгачийн нэг нь Г.Очоа болсон. Гэхдээ Мексикийн шигшээ шөвгийн 16-д Голландад хожигдож, тэмцээнээ дуусгасан аж. “Ацтекууд” 1994 оноос хойш таван дэлхийн аваргад бага шөвгөөс цааш яваагүй юм.

Хүн-Нохой Суарез

Уругвайн шигшээ баг Италийг эцсийн мөчид хожиж байлаа. Тэд илүү үйлдэл гаргалгүй, үлдсэн цөөхөн минутад хамгаалж дуусгавал баг нь шөвгийн 16-д орж ирэх байв. Гэхдээ Уругвай Италийг хожсон. Шөвгийн 16-д ч шалгарсан. Харамсалтай нь Луйс Суарез хэрэггүй үйлдэл гаргаж, Италийн хамгаалагч Челлинийг хазсанаар талбайгаас хөөгдөв. Тэрбээр энэ үйлдлээсээ болж дөрвөн сар талбайд гарах эрхээ хасуулахын сацуу нэр хүндээ үлэмж алдлаа. Тэрбээр “Бразил 2014”-ын этгээд үйлдлийн эзнээр зүй ёсоор нэрлэгдсэн юм. Урьд нь Суарез Челсигийн хамгаалагчийг хазаж байсан “туршлагатай”.

А.Эскобарын сүнс Х.Родригес

Х.Родригес “Бразил 2014”-ын гол нээлт болсон тоглогч. Түүний ур чадвар, гоолууд, үйл хөдлөл, сэтгэл зүтгэл дэлхий нийтийн хүндлэлийг зүй ёсоор хүлээхэд хангалттай байлаа. Х.Родригес шигшээ багаа чирсээр хэсгээсээ шалгарч, багтаа бодит тусламж дэмжлэг болж чадсан. Бразилын эсрэг тоглолтод бүх хүч чадлаа гайхуулж, эцсийн мөч хүртэл тэмцсэн нэгэн юм. Энэ спортоор дэлхийд тэргүүлэгч гүрэн байсан Колумбын шигшээ баг 2000 оны үед уналтанд орсон. 1994 онд Нэгдсэн улсад болсон дэлхийн аваргын “А” хэсэгт АНУ, Румын, Колумб, Швейцарь нэг хэсэгт өрсөлдсөн. Харин АНУ, Румын, Колумб оноо тоолж, шөвгийн 16-д үлдсэн. Тухайн үед хэсгийн хоёр дахь тоглолтоо АНУ-ын эсрэг хийсэн Колумб тэнцэхэд л цааш өрсөлдөх байсан. Харин А.Эскабор өөрийн хаалгандаа гоол оруулж, 1:0-ээр АНУ хожсон. Энэ тэмцээнээс зургаан хоногийн дараа А.Эскабор нутгийнхаа нэгэн шөнийн клубт сууж байхад нь “сэтгэцийн өвчтэй” фанат нь буудаж алсан юм. Уг явдал Колумбын хөлбөмбөгт асар хүндээр тусч, 10 гаруй жил томоохон тэмцээний утаа үнэрлээгүй. Энэ бүх хугацаанд амжилтаар цангаж байсан Өмнөд Америкийн шилдэг баг 2014 онд “цахиур хагалан” гарч ирсэн. Мөн түлхүүр тоглогч Х.Родригесыг “хөлбөмбөгийн төлөө амиа алдсан” А.Эскаборын сүнс нь хэмээн нэрлэж байна. Колумбын шилдэг залчуучууд өнөөдөр дэлхийн чансаанд гуравт явж байгаа аж.

29 минутанд тоглолтын тооны харьцаа 5:0 болж, “Маракана” цэнгэлдэх хүрээлэнд цугларсан 250.000 Бразилчууд уйллаа

Германы шигшээ баг талбайн эздийг 7:1-ээр хожсон түүхэн тохиолдол дэлхийн аваргын өнгөрсөн хуанлид бүртгэгдэж байсангүй.  “Самбагийн хаад” нутаг дээрээ, хагас шигшээд ингэж ялагдана гэж хэн ч төсөөлөөгүй. Т.Кроос, Т.Мюллер, М.Клозе, А.Шурлье нар Бразилын мөрөөдлийг нэг мөсөн үгүй хийж, гутамшигт ялагдлын эзэн болгов. Бразилын 160 гаруй сая иргэн хэзээ ч мартагдахааргүй ялагдал хүлээсэн нь гарцаагүй үнэн түүх болж үлдлээ.

 

Сэтгүүлч М.Золбаатар

E-mail: mongolcom.mn@gmail.com
Утас: 76110303, 76110505

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.