Ерөнхий сайд Ч.Сайханбилэг бизнес эрхлэгчидтэй уулзлаа

Twitter Print
2014 оны 11-р сар 27-нд 17:02 цагт
Мэдээний зураг,

Өнөөгийн эдийн засгийн хүндрэлийг давахын тулд шинэ Засгийн газар гол бодлогоо эдийн засгийг тогтворжуулахад чиглүүлнэ. Харин энэ бодлогын гол тулгуур нь хувийн хэвшлийг дэмжих ажил учраас богино хугацаанд ямар оновчтой шийдлүүд хэрэгтэй талаар та бүхний саналыг сонсохоор ийнхүү уулзаж байна гэж Ерөнхий сайд Ч.Сайханбилэг уулзалтын эхэнд хэллээ.

Шинэ Засгийн газраас бизнесийг дэмжсэн прагматик бодлого хэрэгжүүлнэ. Өөрөөр хэлбэл боловсруулсан дүрэм журмын тоогоор биш үр дүнтэй хэрэгжүүлсэн төслийн хэмжээгээр ажлаа үнэлнэ. Засгийн газрын өчигдрийн хуралдаанаар энэ чиглэлээр бодлогын хэд хэдэн шийдвэр гаргаж, яам агентлагуудад үүрэг өгсөн.

Ерөнхий сайдын дэргэд Эдийн засгийн үндэсний зөвлөл ажиллуулж, эдийн засгийг дэмжих хөтөлбөрүүдээ хамтран хэрэгжүүлнэ. Макро эдийн засгийг тогтворжуулах, гадаад дотоодын хөрөнгө оруулалт татах, бизнесийн орчныг сайжруулах, бүтээн байгуулалт болон гадаад худалдааг идэвхжүүлэх чиглэлээр хувийн хэвшлийнхний санал санаачилгыг төрийн бодлогод тусгах энэ зөвлөлд ажиллах төлөөллөө санал болгох боломж нээлттэй гэж Ерөнхий сайд хэллээ.

Хувийн хэвшлийн үйл ажиллагааг боомилдог төрийн хүнд суртал, шат дамжлагыг халах 10-аад хуулийг Засгийн газраас УИХ-д өргөн бариад байгаа. Бизнесийн орчинд шинэлчлэл хийх эдгээр баримт бичгийг батлуулахад Засгийн газар хүчин чармайлт гаргана. Татвар, гаалийн үйл ажиллагаанд дорвитой өөрчлөлт хийнэ. Цаашид ийм уулзалтыг банк санхүүгийн салбарынхан, хөрөнгө оруулагчид, олон улсын байгууллагууд, экспертүүдийн түвшинд үргэлжлүүлж, шинэ оноос өмнө ирэх жил хэрэгжүүлэх бодлого, үйл ажиллагааны талаар нэгдсэн ойлголцолд хүрэхээр зорьж байна гэж Засгийн газрын тэргүүн онцоллоо.

Ерөнхий сайд улс төрийн бүх намыг Засгийн газартаа урьсан нь маш зөв алхам болсон, нам фракциудаас ангид мэргэжлийн Засгийн газар, эдийн засгийн зөвлөлийг байгуулан ажиллуулах нь оновчтой шийдэл гэж бизнес эрхлэгчид хэллээ. МҮХАҮТ, Ажил олгогч эздийн нэгдсэн холбоо, СЕО клубээс зохион байгуулсан энэ удаагийн уулзалтад 70 гаруй томоохон компанийн удирдлагууд оролцжээ.

 

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.