Нүхэн жорлон ба аймаг, сумдууд нас чацуу “Ах, дүүс”

Twitter Print
2020 оны 07-р сар 27-нд 14:19 цагт
Мэдээний зураг,

Монголын хамгийн “харгис” зүйл бол “нүхэн жорлон” гэхэд хилсдэхгүй. Бага насны хүүхэд хүртэл унаж үхэж байна. Хөгжлийн бэрхшээлтэй хүн, ахмад настан, хүүхэд багачуудад халгаатай, цаашлаад гадаадын жуулчдыг “цочирдуулдаг” зүйл болоод маш их удаж байна. Дараах үгнүүдийг зүгээр л хэлээд үз.

- Нүхэн жорлонтой Монголчууд бид Чингис хааны үр удам, цагтаа дэлхийг талыг эзэлж явлаа.

- Нүхэн жорлонтой Монгол орон 400 сая жуулчин авах бүрэн боломжтой.

- Нүхэн жорлонтой Монголын Хү хамтлаг дэлхийн рок хөгжмийн урсгалд шинэ хөгжил авчирлаа.

- Нүхэн жорлонтой Монгол бол гуравхан сая хүн амтай, эрх чөлөөтэй, ардчилсан улс билээ.

- Нүхэн жорлонтой Монголын маань хөрсөнд ургаж байгаа үр тариа, хүнсний ногоо бүхэн экологийн цэвэр бүтээгдэхүүн.

- Нүхэн жорлонтой Монголын маань адуу мал шим тэжээлтэй 600 гаруй өвс ургамал иддэг учраас мах нь хамгийн амттай.

Ямаршуухан хэлэгдэж байна? Энэ жилийн наадмын нээлтээр харсан тэр их омогшил, бахархал, ардын урлагийн гайхамшиг, Хү хамтлагийн сүр хүчийг ганцхан зүйл л гутаана, тэр бол “нүхэн жорлон”. Өнгөрдөг намар Австралийн юүтүбэр од Sorelle Amore ирээд хөдөө нэг сумын амьдрал байдлыг бичлэг хийхдээ хаалга нь онгойсон нүхэн жорлонг онцгойлон харуулж “... үүнийг хар даа та нар, энэ юу вэ гэхээр монголчуудын бие засдаг газар ...” гээд шоолж ирээд энэ бол Монгол гэж ...”. Бид нар ингэж л нүхэн жорлонгоосоо болж элэг доог болж байна.

Гэтэл зарим нь “өөр тэгээд яах юм бэ, манайх шиг ийм жорлонтой улс орнууд байж л байдаг шүү дээ” гэж өөрсдийгөө өмөөрч байна. Энэ тэгээд өөрсдийгөө өмөөрөх сэдэв мөн үү? Азийн орнууд дотор европжсон соёлтой ганц орон, бичиг үсэг мэддэггүй насанд хүрээгүйчүүд байхгүй, хүн амын талаас илүү нь хүүхэд залуучуудын орон, хүн амын 40% нь дээд боловсролтой, дэлхийн сонгодог урлагийн тайзан дээр монголчууд “од”, монголын залуучууд ба хүүхнүүд царайлаг, боловсролтой ... гэх мэтээр ямар их онгирдог билээ дээ. Нүхэн жорлон бол жижиг асуудал биш. Улс орны хөгжлийн “эмгэнэл” болчихоод байна.

Хөдөө орон нутагт ажлаар олон удаа явлаа. Сүүлийн үед суманд Соёлын төв, Музей, Нутгийн удирдлагын ордон, сургууль цэцэрлэг шинээр зөндөө баригджээ. Даанч доторхи 00 нь ажиллахгүй, шугаманд холбоогүй, гадна талдаа нүхэн жорлонтой байх юм. Шинэ барилга барьсны хэрэг байна уу?

Нүхэн жорлонгоос ялгардаг аммиак буюу шивтрийн хий нь IY зэргийн хорт бодисонд хамаарагддаг. Шивтрийн хий, хүхэр хүчлийн хий ихэссэнээр жирэмсэн эхийн урагт нөлөөлөх, гажиг согогтой хүүхэд төрөх, цаашлаад үргүйдүүлэх хор уршигтай. Мөн 18 сарын турш цагаан хорхой, сүрьеэ зэрэг өвчин үүсгэгч нянг агуулдаг. УБ хотын 320 мянган нүхэн жорлон шууд хөрсөнд нэвчиж, хөрсний 90%-ийг аль хэдийнэ бохирдуулсан судалгааны дүн ч байна. Бид нар ямар хөрсөн дээр амьдраад байна вэ?

Нүхэн жорлонгоос салахын тулд,

- Төр засгийн бодлого, уриа лоозон хэрэгтэй байна.

- Айл бүр жорлондоо хувьсгал хийхийн төлөө хичээцгээе!

- Эко 00, жорлонгоо өөрчлөе гэх бүх төсөл хөтөлбөрүүдийг дэмжицгээе!

- Улс орон даяар үргүй зардлыг багасгаж, ой тэмдэглэх элдэв баяр наадмаас татгалзъя.

- Хөдөө рүү чиглэсэн зам дагуу байх хаалгатай хаалгагүй, сарайж сэрийсэн, хог ба үнэр танартаа дарагдсан, харахаас нүд хальтрам царай муутай жорлонгуудаа устгая.

- Сумын 80, 90 жилийн ойг тэмдэглэх төсвийг хэмнэж сумынхаа төвийн жорлонгуудыг эрс өөрчлөе!

Эцэст нь, сайхан амьдрал гэдэг бол өдөр тутмын хэрэглээний зүйлс чинь бусдад болоод өөрт, байгаль дэлхийд ээлтэй, энэрэлтэй байхыг л хэлнэ гэдгийг ойлгох хэрэгтэй!

Ч.Буянбадрах 

Олон улсын аялал жуулчлалын хөгжлийн төв 

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.