Японы Сагсан Бөмбөгийн Холбооны эрхийг FIBA-аас түдгэлзүүлжээ

Twitter Print
2014 оны 11-р сар 27-нд 10:10 цагт
Мэдээний зураг,

FIBA-ийн Удирдах Зөвлөл хоёр өдөр хуралдасны эцэст Японы Сагсан Бөмбөгийн Холбооны эрхийг түдгэлзүүлэх шийдвэрийг гаргаснаа албан ёсоор зарлалаа. Удирдах Зөвлөлийн үзэж байгаагаар “Japanese Basketball Association” нь FIBA-гийн тавьсан шаардлагуудыг заасан хугацаанд нь биелүүлээгүй гэж үзсэн аж. FIBA-ийн (Олон улсын сагсан бөмбөгийн холбоо) зүгээс:

-FIBA-гийн Ерөнхий Дүрмүүдэд нийцсэн бүтцийн өөрчлөлт хийх.

-Одоогийн байгаа хоёр Лигийн тэмцээн нь нэг болж, JBA-гийн удирдлаганд үйл ажиллагаагаа явуулж, сагсан бөмбөгийн албан ёсны дүрмийн дагуу улсын хэмжээний бүх тэмцээн явагддаг болох.

-2020 оноос цаашхи шигшээ багийнхаа (эрэгтэй, эмэгтэй) бодит төлөвлөгөөг танилцуулах гэсэн шаардлага хүргүүлжээ.

Дээрх шийдвэрийн үр дүнд Японы Сагсан Бөмбөгийн Холбоо FIBA-гийн гишүүний эрхээ алдаж, FIBA болон FIBA Asia-гийн олон улсын ямар нэгэн тэмцээнд шигшээ багаа оролцуулах эрхгүй болж байгаа юм. Олон Улсын Сагсан Бөмбөгийн Холбооны зүгээс Японы Холбоод хандаж удаа дараа сануулга өгч, дотоодын асуудлаа шийдэхийг шаардаж байсан ч энэ байдал ингэж удасны эцэст ийм хэцүү шийдвэрийг гаргах болсоноо FIBA-гийн Ерөнхий нарийн бичгийн дарга Патрик Бауманн харамсалтайгаар зарлажээ.

Япон улсад JBA гэсэн үндсэн Холбооны Лигээс гадна National Basketball League буюу NBL гэдэг байгууллага гарч ирж, давхар Лиг зохион байгуулсан нь асуудал ийнхүү хурцдах эхлэлийг тавьсан байна. Тэгвэл саяхан JBA-ийн Ерөнхийлөгч болон NBL-ийн Ерөнхийлөгч хоёулаа ажлаа хүлээлгэн өгч, Японы сагсан бөмбөг эзэнгүй орхигджээ. FIBA-аас тусгай ажлын багийг илгээж, JBA-ийн бүтэц, үйл ажиллагааны шинэчлэлтэнд туслахаар болсон байна.

 

 

Сэтгүүлч М.Золбаатар

E-mail: mongolcom.mn@gmail.com
Утас: 76110303, 76110505

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.