Америкчууд Хятадын тагнуулын бөмбөлгийг буудан унагажээ

АНУ-ын Агаарын зэвсэгт хүчний онгоц АНУ-ын агаарын орон зайд орж ирсэн Хятадын тагнуулын зориулалттай бөмбөлгийг өнгөрсөн бямба гарагт буудан унагажээ. АНУ-ын Ерөнхийлөгч Жо Байден өнгөрсөн лхагва гарагт бөмбөлгийг буудан унагахыг үүрэг болгосон ч Пентагон иргэдийн аюулгүй байдлыг хангах үүднээс бөмбөлгийг задгай тэнгисийн дээр нисэх үед унагах нь зөв гэж зөвлөсөн аж.

Бөмбөлгийг устгах ажиллагаанд хэд хэдэн сөнөөгч онгоц оролцсон ч Лэнгли Агаарын Зэвсэгт хүчний баазын F-22 сөнөөгч онгоц дуунаас хурдан, дулаан мэдрэгчтэй, агаарт байгаа байг онох зориулалт бүхий AIM-9X пуужингаар бөмбөлгийг харван унагажээ.

Бээжин уг бөмбөлөг нь цаг уурын нөхцөл байдлыг судлах, судалгаа шинжилгээний зориулалттай болохыг мөн бөмбөлөг "санамсаргүй байдлаар" замаасаа гарч, Америкийн агаарын орон зайд нэвтэрсэн болохыг удаа дараа тайлбарлаж, уг асуудлыг мэргэжлийн төвшинд, тайвнаар шийдэхийг Вашингтоноос хүссэн ба АНУ-ын зүгээс бөмбөлгийг хүч хэрэглэн устгасан явдлыг буруушааж буйгаа илэрхийлжээ.

Бөмбөлгийн хэсгүүд АНУ-ын Атлантын далайтай хиллэдэг эргээс 10-аад километрийн зайд, харьцангуй гүехэн усанд унасан нь бөмбөлгийн хэсгүүдийг цуглуулан авахад амар байх болно гэдгийг Вашингтон онцолжээ.

Бөмбөлгийг устгахаас өмнө Америкийн засгийн газар "аюулгүй байдлын" шалтгаанаар Өмнөд Каролина мужийн Уилмингтон, Миртл Бийч болон Чарльзтон нийсэх онгоцны буудлаас нисэх, дээрх буудлуудад буух бүх нислэгүүдийг цуцалсан билээ.

Дээрх нисэх онгоцны буудлуудын үйл ажиллагаа хэвийн явагдаж эхэлжээ. АНУ-ын Конгресс дахь Бүгд Найрамдах намынхан Ерөнхийлөгч Ж. Байден Хятадын тагнуулын бөмбөлөгтэй холбоотой асуудлыг түргэн шуурхай шийдвэрлэж чадаагүй хэмээн шүүмжилсээр байна.

Нөгөө талаас дээрх бөмбөлгийг ашиглан Бээжин хэр их хэмжээний мэдээлэл цуглуулж чадсан нь тодорхойгүй байна. Бөмбөлөг анх өнгөрсөх сарын 28-нд Аляск муж, 30-нд Канадын агаарын орон зайд нэвтэрч, 31-нд АНУ-ын Айдахо мужийн агаарын орон зайд нэвтэрчээ.

Америкийн эрх баригчид бөмбөлөг АНУ-ын нутаг дэвсгэр дээгүүр нисэж байгаар өнгөрсөн пүрэв гарагт л анх мэдээлсэн байна.

Америкийн Конгресийн Төлөөлөгчдийн танхимын гишүүн, Бүгд Найрамдах намын гишүүн Майк Рожерс, "Ж. Байдений засгийн газар үндэсний аюулгүй байдал дээр гаргасан алдаагаа Конгресс болон америкчуудаас нуухыг оролдсон нь илт байна." хэмээн мэдэгджээ.

Эх сурвалж: BBC

Содномцэрэнгийн Энхзаяа

mongolcom.mn

 

Холбоотой мэдээлэл: 

Э.Блинкен тагнуулын бөмбөлөгнөөс болж Хятадад хийх айлчлалаа хойшлуулжээ - http://mongolcom.mn/read/1224

 

Энэ мэдээ танд таалагдаж байвал LIKE хийгээрэй. Танд баярлалаа.