"Северный поток-2" төсөлд зөвшөөрөл олгоогүйгээс хийн үнэ дахин өсчээ

Twitter Print
2021 оны 11-р сар 17-нд 11:25 цагт
Мэдээний зураг,

ХБНГУ-ын Эрчим хүчний агентлаг ОХУ-аас ХБНГУ руу хий нийлүүлэх "Северный поток-2" төсөлд зөвшөөрөл олгохоос татгалзсантай холбоотойгоор Их Британи болон Европын холбоонд хийн үнэ 17 хувиар өсчээ.

ХБНГУ-ын эрх баригчид 10 тэрбум еврогийн өртгөөр боссон "Северный поток-2" төслийн үйл ажиллагааг хариуцсан компани ХБНГУ-ын хууль журмыг дагах ёстой хэмээн мэдэгджээ.

Шүүмжлэгчид Оросын хий дамжуулах хоолой ашиглалтанд орсноор Европын холбоо ОХУ-аас хамааралтай болно хэмээн үзэж байгаа билээ.

"Северный поток-2" хий дамжуулах хоолойн бүтээн байгуулалт өнгөрсөн 9-р сард дууссан ч үйл ажиллагаа явуулах зөвшөөрлөө аваагүй л байгаа юм.

Балтын тэнгисийн доогуур явж буй "Северный поток-2" хий дамжуулах хоолойны тусламжтайгаар Москва ХБНГУ руу экспортлох хийн хэмжээ 2 дахин нэмэгдэхээс гадна ОХУ-ын тус хийн хоолой Украины газар нутаг дээгүүр яваагүй учраас Оросын хийн хоолойн транзитын хөлсөөр улсынхаа төсвийн тодорхой хэсгийг бүрдүүлдэг Украин улс эдийн засгийн хувьд алдагдалд орох юм.

Германы компаниуд 1225 км урт "Северный поток-2" төсөлд их хэмжээний хөрөнгө оруулсан ба Германы канцлер асан Герхард Шрёдер уг төслийг хэрэгжихэд томоохон үүрэг гүйцэтгэсэн аж.

Европ болон Их Британид сүүлийн саруудад хийн үнэ нэмэгдсэн ба энэ нь Европт өнгөрсөн өвөл цаг агаар хүйтэн байснаас болж эрэлт хэрэгцээ нь нэмэгдэж, хийн нөөц багассантай холбоотой юм.

ХБНГУ-ын Эрчим хүчний агентлагийн шийдвэрийн улмааё "Северный поток-2" хий дамжуулах хоолойн үйл ажиллагаа дахин хэдэн сараар хойшлогдох нь гарцаагүй болсон ба ХБНГУ-ын эрх баригчдын зүгээс зөвшөөрөл олгосон ч дараагаар нь ОХУ Европын холбооны зөвлөлөөс зөвшөөрөл хүсэх юм.

Украины зүгээс "Северный поток-2" төслийг эсэргүүцсээр байгаа ба Украины Ерөнхийлөгч Владимир Зеленский уг хий дамжуулах хоолойг "геополитикийн аюултай зэвсэг" хэмээн тодорхойлж байсан бол Германы эрх баригчдын шийдвэрийг Украины эрчим хүчний Нафтогаз компани таатай хүлээн авчээ. ХБНГУ-ын канцлерийн үүргийг гүйцэтгэгч Ангела Меркель ОХУ уг хийн хоолойн төслийг Украины эсрэг ашиглавал ОХУ-ын эсрэг хориг арга хэмжээ авна хэмээн мэдэгдэж байсан юм.

Эх сурвалж: BBC

Содномцэрэнгийн Энхзаяа 

mongolcom.mn

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.