Барак Обама шинэчлэлийн төлөө тууштай зогсож байна

Twitter Print
2014 оны 11-р сар 24-нд 15:08 цагт
Мэдээний зураг,

АНУ-ын Ерөнхийлөгч Барак Обама бүрэн эрхийнхээ дагуу тус улсад хууль бусаар оршин сууж буй тав орчим сая цагаачдыг албадан гаргахыг хориглосон зарлигт гарын үсэг зураад амжижээ. Тэрээр өнгөрсөн пүрэв гарагт ард түмэндээ хандаж мэдэгдэл хийсэнийхээ маргааш өдөр буюу арваннэгдүгээр сарын 21-ны өдөр Лас-Вегас хотод үг хэлэхдээ ингэж мэдэгдсэн байна. Ерөнхийлөгчийн Вашингтон хотоос Невада орохоор нисэхдээ онгоцон дотор холбогдох баримт бичигт гарын үсэг зурсан аж.

“Америкт мэндэлсэн хүүхдүүдийн эцэг, эх тус улсад таваас дээш жил оршин сууж байгаа, мөн бага насандаа АНУ-д ирсэн хүмүүсийн тухай асуудлыг бид ярьж байна” гэж Обама онцолсон байна. Түүний шинэ зарлигийн дагуу АНУ-д оршин суугаа цагаач иргэд цаашид хугацаагаа сунгах боломжтойгоор гурван жил оршин суух зөвшөөрөл олж авч байгаа бөгөөд 4,7 сая хүнийг АНУ-аас албадан гаргахгүй төдийгүй ажил хийх зөвшөөрөл олгох болж байгаа аж.

Энэ дагуу АНУ-ын Засгийн газар “Албадан гаргах хугацааг хойшлуулах”-ыг хүссэн цагаачдын өргөдлийг удахгүй хүлээн авч эхэлнэ гэж Обама мэдэгджээ.

Харин АНУ-ын тэргүүнийг цагаачлалын шинэчлэлд дургүйцсэн хэдэн зуун хүн Лас-Вегаст угтан авсан байна. Тэд Ерөнхийлөгчийн автомашины цуваа явсан зам дагуу зогсоцгоож, “Өршөөл бүү үзүүл”,  “Обамад ял тулга!” гэж хашгиралдаж байжээ.

АНУ-ын ерөнхийлөгч Барак Обама Конгрессын дэмжлэггүйгээр цагаачлалын бодлогод шинэчлэл хийхээр төлөвлөж буйгаа пүрэв гарагт мэдэгдсэн бол түүний энэ бодлогод бүх талаар хориг тавина гэж бүгд найрамдахчууд бараг тэр даруйд хариу мэдэгдэл хийсэн билээ. Үүний тулд тэд Цагаан ордонд шахалт үзүүлэхээр Холбооны засгийн газрын санхүүжилтын тухай хуулийн төслийг ашиглаж магадгүй байгааг Амеркийн хэвлэл мэдээллүүд тэмдэглэж байна. Уг хуулийн төслийг арванхоёрдугаар сарын 11-нээс өмнө батлах ёстой аж. Харин Бүгд найрамдах намын зарим гишүүд цаг хожихийн тулд Обамагийн үйлдэл Үндсэн хуульд нийцэхгүй гэдгийг нотлохын тулд шүүхэд гомдол гаргахаар төлөвлөсөн байна.

АНУ-ын 2008 оны Ерөнхийлөгчийн сонгуулийн кампанит ажлын үеэр Барак Обама цагаачлалын хуульд шинэчлэл хийхээ амлаж байсан боловч Ерөнхийлөгчийн албан тушаалд сонгогдсон эхний жил болоод төрийн тэргүүний хоёр дахь бүрэн эрхийн хугацаанд ямар ч боломж олдоогүй, хэдийгээр түүний санаачилгыг Сенатын танхим баталсан боловч Төлөөлөгчдийн танхимд Бүгд найрамдахчууд дэмжээгүй билээ.

Барак Обамагийн санаачилга, АНУ-д хууль бусар таван жил амьдрах хугацаанд ямар нэгэн хэрэг зөрчил гаргаагүй дөрвөн сая гаруй цагаач иргэдэд тус улсад хууль ёсоор ажиллаж амьдрах ( Work Authorization Permit) эрх олгох, мөн хууль зүйн дагуу бүх талын шаардлага хангасан нэг сая залуучуудад хэдэн жилийн өмнөөс хэрэгжүүлж эхэлсэн"Dreamers" хөтөлбөрт хамруулж, оршин суух эрх олгоход чиглэж байгаа бөгөөд энэ дагуу хууль ёсны эрх авсан  ргэд мөн Барак Обамагийн хэрэгжүүлж эхэлсэн эрүүл мэндийн (Affordable Care Act) даатгалд хамрагдах боломжтой болох аж.

Ерөнхийлөгч Барак Обама үүгээрээ сонгуулынхаа хугацаанд өгсөн амлалтаа биелүүлэхийн төлөө зүтгэж байна. Тэрээр ерөнхийлөгчийн сонгуульд өрсөлдөх үедээ испани хэлтэй хүн амаас идэвхтэй дэмжлэг авч цагаачлалын хуульд шинэчлэл хийхээ амлаж байсан. Үүнийхээ төлөө ч тэрээр тууштай байр суурь баримталж байгаа аж.

Ням гарагт тэрээр цагаачлалын асуудлаар нийтэл хандаж телевизээр үг хэлэхдээ,"Нэгдүгээрт, бид хил хамгаалалтаа улам сайжруулж хууль бусаар хил нэвтрэгсдийн цувааг хумиж,  нутагт нь шуурхай буцаахад нэмэлт хүч тавина. Хоёрдугаарт, мэргэжлийн ѳндѳр ур чадвартай цагаач иргэд, сургууль тѳгсѳгчид, бизнес эрхлэгчдэдоршин суух эрх олгож, тус улсын эдийн засагт хувь нэмрээ оруулах боломж олгох үйл ажилалагааг хѳнгѳвчилж, хурдан шуурхай болгоно. Гуравдугаарт, тус улсад нэгэнт амьдарч байгаа бичиг баримтгүй сая сая цагаачдын асуудлыг хариуцлагатайгаар шийдвэрлэх алхмуудыг хийнэ” гэдгийг онцолжээ. Энэ арга хэмжээний хүрээнд:

1) АНУ-д тѳрсѳн, эсвэл ногоон карттай хүүхэдтэй бѳгѳѳд АНУ-д доод тал нь таван жил амьдарсан эцэг, эхчүүд (АНУ-д амьдарсан байх доод хугацааг 10 жилээр тогтоох санал бас явж байгаа);

2) Одоо хэрэгжиж буй DACA хѳтѳлбѳр (бага насандаа АНУ-д эцэг, эхээ даган орж ирсэн хууль бус цагаач хүүхдүүдэд АНУ-д албан ёсоор амьдарч коллежид суралцах, ажиллах эрх олгох хѳтѳлбѳр)-т хамрагдан суралцаж буй хүүхдүүдийн эцэг, эх;

3) Хѳдѳѳ аж ахуйн салбарт тодорхой хугацаагаар ажиллаж буй хүмүүст оршин суух эрх олгох юм.

Хэрэв DACA хѳтѳлбѳрийг баталж, хэрэгжүүлэх эрх мэдэл Ерѳнхийлѳгчид байсан бол дээрх хүмүүст АНУ-д албан ёсоор ажиллаж, амьдрах эрх олгох эрх мэдэл түүнд бас байх ёстой гэж Цагаан ордны хуульчид дүгнэж байгаа бөгөөд энэ талаар улс тѳрчид, хуульчид, шинжээчдийн маргаан дуусаагүй байна.

Харин дээрх хүмүүст АНУ-д байнга оршин суух ногоон карт олгох, улмаар тэднийг АНУ-ын иргэн болгох зохицуулалтыг зѳвхѳн хууль гаргах замаар шийднэ гэдэг дээр хуульчид санал нэгтэй байгаа бѳгѳѳд “Ѳршѳѳл” гэдэг нь зѳвхѳн энэ утгаар хэрэгжинэ гэж тэд үзэж байна.

Гэвч ерѳнхийлѳгч захирамж гаргаж уг асуудлыг шийдвэрлэлээ ч дараагийн шинэ ерѳнхийлѳгч уг шийдвэрийг хүчингүй болгох боломжтой учир хууль гаргаснаар асуудлыг нэг мѳр шийдвэрлэх нь чухал байгаа билээ.

Сэтгүүлч Л.Отгонбат

E-mail: mongolcom.mn@gmail.com
Утас: 76110303, 76110505

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.