Япон коронавирусын 6 дахь давалгаанд эмнэлгүүдийн ор болон нөөц бололцоог нэмэгдүүлэх төлөвлөгөө гарган бэлтгэж байна

Twitter Print
2021 оны 11-р сар 14-нд 16:13 цагт
Мэдээний зураг,

Японы Ерөнхий сайд Фүмио Кишида энэ өвөл коронавирусын халдварын 6 дахь давалгаанд бэлтгэж, эмнэлгүүдийн ор болон нөөц бололцоог нэмэгдүүлэх шуурхай төлөвлөгөө гаргаж буй тухайгаа өнгөрсөн баасан гарагт мэдэгджээ.

Өнгөрсөн зун япончууд коронавирусын халдварын 5 дахь давалгаанд өртсөнөөс хойш халдварын тархалт болон коронавирусын халдвартай холбоотой нас баралтын тоо буурсан ба Японы хүн амын 70 гаруй хувь нь коронавирусын эсрэг вакцинд хамрагдаад байна.

Коронавирусын цар тахалтай холбоотой тогтоосон онц байдлын дэглэм өнгөрсөн сард Японы дийлэнх нутагт цуцлагдсан ч халдварын тархалт энэ өвөл дахин өсөх магадлалтай байгааг Японы эрх баригчид онцолж, эмнэлгүүдийн орны тоог 30 хувиар нэмэгдүүлж, гэрээр эмчилгээ сувилгаа хийх явдлыг сайжруулах, ямар эмнэлгүүдэд ачаалал нэмэгдэхийг тооцон урьдчилан тогтоох ажлуудыг хийхээр төлөвлөжээ.

Ерөнхий сайд Фүмио Кишидагийн мэдэгдсэнээр коронавирусын халдварын тархалттай тэмцэх гол хэрэгслүүдийн нэг нь эмэн эмчилгээ байх ба энэ нь эмнэлгийн ачааллыг бууруулах аж.

Япон Америкийн Merck компанийн коронавирусын эсрэг шинээр гаргаж буй молнупиравир эмийн 1.6 сая курс эмийг 1.2 тэрбум ам. доллараар худалдан авах гэрээ хийгээд байгаа ба энэ нь АНУ-ын захиалснаас хоёр дахин их тун юм.

Түүнээс гадна Япон улс ирэх сараас хүн амаа коронавирусын эсрэг вакцины нэмэлт тунд хамруулж эхлэх ба 5 ба түүнээс дээш насны хүүхдүүдийг коронавирусын эсрэг вакцинд хамруулах тухай хэлэлцэж байна.

Киотогийн их сургуулийн профессор Юүки Фүрүсэ, "Асуудал коронавирусын халдварын 6 дахь давалгаа болох эсэх биш харин хэзээ эхлэх вэ гэдэгт оршиж байна." хэмээн онцолжээ.

Халдварын өмнөх давалгааны үеэр эмнэлгүүдийн ачаалал нэмэгдсэнтэй холбоотойгоор гэртээ нас барсан иргэдийн тоо олон байсантай холбоотойгоор Японы засгийн газар хатуу шүүмжлэлд өртсөн юм.

Үүнтэй холбоотойгоор өмнөх Ерөнхий сайд Ёшихидэ Суга албан тушаалаасаа буусан билээ.

Эх сурвалж: Reuters

Содномцэрэнгийн Энхзаяа 

mongolcom.mn

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.