Багадаа хулгайлагдсан хүү төрсөн тосгоноо зурж, 30 гаруй жилийн дараа төрсөн ээжийгээ олжээ

Төрсөн тосгоноосоо 4 настайдаа хулгайлагдсан хятад хүү нийгмийн сүлжээнд төрсөн тосгоноо гараар зурж нийтэлсний ачаар 30 гаруй жилийн дараа ээжийгээ олжээ.

Ли Жиньвэйг 4 настай байхад буюу 1989 онд Юньнань мужийн баруун өмнөд зүгийн Жаотунь хотын ойролцоогоос хулгайлж, төрсөн тосгоноос нь 1800 гаруй км цаана амьдрах гэр бүлд худалджээ.

Өнгөрсөн сарын 24-нд тэрээр Хятадын TikTok аппликэйшн дээр өөрийн төрсөн тосгоноо санаж байгаагаараа гараараа зуран нийтэлжээ.

Цагдаа нар түүний зургийг нарийвчлан судалж, Ли Жиньвэйн төрсөн тосгон байж болзошгүй газар болон тухайн тосгонд амьдардаг хүүхдээ алдсан нэгэн эмэгтэйг олжээ. ДНХ-ийн шинжилгээ хийсний дараагаар тухайн эмэгтэй нь Ли Жиньвэйн ээж болох нь тогтоогдож, Ли Жиньвэй өнгөрсөн бямба гарагт ээжтэйгээ уулзжээ.

Гуандон мужид амьдардаг Ли Жиньвэйн төрсөн эцэг эхээ хайх өмнөх оролдлогууд бүтэлгүйтсэн учраас тэрээр нийгмийн сүлжээний хэрэглэгчдэд хандаж үзэхээр шийдсэн аж.

Түүний нийгмийн сүлжээнд нийтэлсэн бичлэг дээрээс, "Би төрсөн гэрээ хайж байгаа хүү байна. 1989 он хавьцаа 4 настай байхад маань манайхтай хөрш амьдарч байсан халзан эр намайг хулгайлж, Хэнан мужид авчирсан. Энэ бол миний төрсөн тосгоны зураг. Үүнийг би өөрийнхөө санаж байгаагаар зурсан." хэмээн ярьж, гараар зурсан зургаа үзүүлж буйг харж болох юм.

Ли Жиньвэй зурган дээрээ тосгоны сургууль, тосгоны ойролцоох хулсан ой, жижиг цөөрөм зэргийг дүрсэлсэн байжээ. Хятадад хүүхэд хулгайлах гэмт хэрэг цөөнгүй гардаг ба 2015 онд хийсэн судалгаагаар тус улсад жилдээ дунджаар 20 мянган хүүхэд хулгайлагддаг болохыг тогтоосон юм.

Эх сурвалж: BBC

Содномцэрэнгийн Энхзаяа

mongolcom.mn

 

Энэ мэдээ танд таалагдаж байвал LIKE хийгээрэй. Танд баярлалаа.