В. Путин Ерөнхийлөгчийн сонгуульд дахин өрсөлдөж магадгүй гэдгээ үгүйсгэсэнгүй

Twitter Print
2020 оны 06-р сар 22-нд 11:16 цагт
Мэдээний зураг,

ОХУ-ын Ерөнхийлөгч Владимир Путин үндсэн хуульд шаардлагатай өөрчлөлт шинэчлэлт хийгдсэн тохиолдолд Ерөнхийлөгчийн албан тушаалын төлөө дахин өрсөлдөж магадгүй гэдгээ Россия-1 сувагт өгсөн ярилцлагадаа дурджээ. Тэрээр, "Одоохондоо надад шийдсэн юм алга.

Гэхдээ үндсэн хуулиар зөвшөөрөгдвөл сонгуульд дахин өрсөлдөх боломжийг үгүйсгэхгүй. Харж л байя." хэмээн онцолжээ. Түүнчлэн Ерөнхийлөгч В. Путин төрийн албан хаагчдад хандан Оросын дараагийн төрийн тэргүүн болох хүнийг хайх биш ажилдаа анхаарахыг сануулсан байна. Тэрээр,"Үндсэн хуульд шаардлагатай өөрчлөлт шинэчлэлтийг хийж чадахгүй бол хоёр жилийн дараа гэхэд төрийн бүх түвшний удирдлагууд ажлаа хийхээ больж, ОХУ-ын дараагийн төрийн тэргүүн болох хүнийг хайж эхэлнэ. Би үүнийг өөрийн туршлагаасаа мэдэж байна." гэжээ.

Ерөнхийлөгч В. Путин Оросын Үндсэн хуульд өөрчлөлт хийх нь зөв хэмээн үзэж байгаа ба өнгөрсөн саруудад болсон үйл явдлууд Үндсэн хуульд өөрчлөлт хэрэгтэй байгааг баталж чадсан хэмээн онцолжээ. Тэрээр,"Өнөөдөр хэрэгжиж байгаа Үндсэн хууль нь танкууд парламентын байр руу буудаж, Москвад үймээн самуун үүссэн дотоодын хурц хямралын үед батлагдсан билээ. Бурхны авралаар өнөөдөр дотоодын нөхцөл байдал тайван, тогтвортой байна. Гэхдээ манай улсын тусгаар тогтнол, бие даасан байдалтай холбоотой асуудлууд байна." хэмээн ярьжээ.

ОХУ-ын Ерөнхийлөгч Владимир Путины хэвлэлийн нарийн бичгийн дарга Дмитрий Песковын мэдэгдсэнээр В. Путин дараагийн сонгуульд нэр дэвших эсэх нь дэлхийн эдийн засгийн нөхцөл байдал, коронавирусын цар тахлын үр дүн болон бүс нутгуудад тулгараад буй асуудлуудын үйл явцаас шалтгаалах аж. Өнгөрсөн 3-р сард хийгдсэн судалгаагаар 2024 оны Ерөнхийлөгчийн сонгуулиар оросуудын 57 хувь нь В. Путины төлөө саналаа өгөхөд бэлэн гэж гарчээ.

Эх сурвалж: TASS.ru

Содномцэрэнгийн Энхзаяа 

mongolcom.mn 

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.