Х.Нямбаатар: Төвийн 6 дүүргийн Засаг даргын газар олгох эрх зүйн зохицуулалтыг хязгаарлаж байна

Нийслэлийн автозамын түгжрэлийг бууруулах, гэр хорооллыг орон сууцжуулах тухай анхдагч хуулийн төслийг боловсруулсныг өнөөдрийн Засгийн газрын хуралдаанд танилцуулсан талаар нийслэлийн Засаг дарга бөгөөд Улаанбаатар хотын захирагч Х.Нямбаатар мэдээлэл өглөө.

Тэрбээр "Цаашид авч хэрэгжүүлэх арга хэмжээний хүрээнд нийслэлийн автозамын даацад тохируулж автомашины дугаар олголтын дээд хязгаарыг НИТХ батлах шаардлагатай. Одоо автомашины дугаар эзэмшиж байгаа иргэдийн тухайд өөрийн автомашины дугаарыг бусдад худалдаалах, барьцаалах, бэлэглэх эрхзүйн орчныг бүрдүүлнэ.

Нөгөөтэйгүүр, Улаанбаатар хотод бүртгэлтэй автомашины дугаарыг салгаж бусдад худалдаалах, автомашиныг хөдөө орон нутагт борлуулах эрхзүйн орчныг бий болгоё гэдэг агуулга бүхий авто замын түгжрэлийг бууруулах, нийслэлийн гэр бүлийг орон сууцжуулах хуулийн нэг дэх үндсэн зохицуулалтыг оруулж ирж байна.

Хоёрт, Улаанбаатарт замбараагүй барилга байгууламж барих явдлыг хязгаарлах зохицуулалтыг оруулж ирж байна. 2000-аад оноос хойш гэр хорооллыг барилгажуулах тодорхой ажлууд хийгдсэн. Тухайлбал, Сүхбаатар, Баянзүрх дүүргийн нутаг дэвсгэрийг дагаж байрладаг Сэлбэ голын орчмын орон сууцны барилгажилтын ажил хамгийн төлөвлөлтгүй бетонон ширэнгийг үүсгэсэн.

Одоо Сүхбаатарын талбайгаас 800 орчим метрийн зайтай байгаа Дөлгөөн нуур орчмыг үндсэндээ бетонон ширэнг болгоод алдаж байна. Иймээс цаг алдалгүй Улаанбаатар хотын барилгажилт, ерөнхий төлөвлөгөө, түүнд нийцсэн орон сууцны стандарт нормыг тогтоож архитектурын даалгавар болон барилга эхлүүлэх зөвшөөрөл олгогдоод байгаа 1500 нэгж талбар бүхий барилгажилтын ажлыг хязгаарлах, царцаах, зөвшөөрөл бүхий газруудыг хотын ерөнхий төлөвлөлт бүхий газарт хотын стандартын дагуу шилжүүлэх байдлаар зохицуулахыг анхдагч хуулийн төслөөр оруулж байна.

Гуравт, Улаанбаатар хотын агаарын бохирдол хамгийн дээд цэгт хүрээд байгаа. Гэсэн ч бид өдөр тутамдаа нийслэлийн Засаг даргын болон дүүргийн Засаг даргын захирамжаар 0.07 га, 0.04 газрыг зуслангийн болон амины зориулалтаар газар олгож байгаа явдлыг энэ хууль болон дагах хуулиар бүрмөсөн зогсоохоор шийдвэрлэлээ.

Өөрөөр хэлбэл, дүүргийн Засаг дарга цаашид газар олгох эрх зүйн зохицуулалтыг хязгаарлаж байна. Энэ нь төвийн зургаан дүүрэг дээр хамаарна. Захын гурван дүүрэг дээр газар олголт үргэлжилнэ. Яагаад гэвэл их хотын хүнсний хангамжийг хангах, тээвэр логистикийн үйл ажиллагааг зохицуулах зориулалтаар газар олголт үргэлжилнэ. Мөн нийслэлийн Засаг дарга газар олголтыг зөвхөн таван тохиолдолд газар олгохоор хуулийн төсөлд тусгасан.

1.       Төр бүтээн байгуулалт хийх зорилгоор эмнэлэг, сургууль, цэцэрлэг барих тохиолдолд,

2.       Төр хувийн хэвшлийн түншлэлийн харилцааг хэрэгжүүлэхэд,

3.       Зөвхөн хотын ерөнхий төлөвлөгөөний дагуу дуудлага худалдаагаар,

4.       Дахин төлөвлөлт буюу гэр хорооллын барилгажуулах бүсэд өртсөн ААН-үүдтэй хэлэлцээр хийж нүүлгэн шилжүүлэх зорилготой үед,

5.       Царцаагдсан барилга байгууламжийн урьд нь олгосон газрыг дахин төлөвлөгдсөн бүсэд шилжүүлэх үед газар олгоно" гэлээ.

Мэдээллийн дараа ногоон автобусны асуудлын талаар сэтгүүлчдийн тордуулга асуултад хариулахдаа "Өчигдөр НЗДТГ-аас “Тэнүүн Огоо” компанитай байгуулсан худалдах, худалдан авах гэрээг цуцалсан. Өөрөөр хэлбэл, цаашид “Тэнүүн Огоо” компаниас ямар нэгэн автобус нэмж авахгүй. Ногоон автобусыг бүр ч авахгүй. Яагаад гэвэл худалдах, худалдан авах гэрээний заалтыг ноцтой зөрчсөн учраас цуцалсан. Өнөөдөр НЗДТГ-аас автобус худалдах, худалдан авах нээлттэй олон улсын тендерийг зарласан.

Мөн “Тэнүүн Огоо” компаниас урьдчилгаа хэлбэрээр шилжүүлсэн мөнгөө нэхэмжлэх, иргэний нэхэмжлэл тооцуулах хүсэлтээ АТГ-т хүргүүлсэн байгаа. “Тэнүүн Огоо” компанийн дансанд одоогоор 11 тэрбум төгрөгний барилт хийчихсэн. Түүнчлэн, өмчлөлд нь байгаа бүх хөрөнгийг царцааж, бусад шилжүүлсэн мөнгө, хөрөнгийг нэхэмжлэх, буцаан авах чиглэлээр хууль хяналтын байгууллагууд ажиллаж байна" гэлээ.

 

Энэ мэдээ танд таалагдаж байвал LIKE хийгээрэй. Танд баярлалаа.