Монгол бэлэн үү?

Twitter Print
2020 оны 03-р сар 13-нд 09:01 цагт
Мэдээний зураг,

Эдүгээ 109 оронд илрээд байгаа covid-19-өөс дэлхий бүрэн салтал 12-18 сар болно гэдгийг олон улсын шинжээч судлаачид хэлээд эхэллээ.

Тэгвэл үүнд Монгол бэлэн үү? Энгийн ухаанаар бодоход 109 орноос өдөрт нэг улс вирусыг бүрэн зогсоосноо мэдэгдэнэ гэж гэгээхнээр мөрөөдөхөд гурван сар хагасын хугацаа шаардагдах нь.

1. Токиогийн олимп цуцлагдах тухай яригдаж байна. Ийм тохиолдолд монголчууд наадмаа хийх үү?

2. Дөрвөн жилд нэг болдог, энэ оны зургаадугаар сарын сүүлээр тохиох УИХ-ын ээлжит сонгуулийг ямар хэлбэрээр, хэрхэн явуулах вэ? Хуульд заасан сурталчилгааны хугацааг хэрхэн зохицуулах вэ? Хаа хаанаа хөл хориотой суусаар харанхуй туугаад орчих юм уу?

3. Эдийн засгийн эргэлт үндсэндээ зогслоо. Царцаж таарах нь. Жижиг, дунд бизнес эрхлэгчид байтугай бизнесийн том акулууд айж эхэллээ. Эргэлтийг эрүүл мэнддээ халгүй хэрхэн бий болгох вэ?

4. Монголчууд бол зээлдэгч, түрээслэгч ард түмэн. Зээлийн хүү, түрээсийн төлбөр төлдөг хэсгийнхэн хэрхэн үүнийг давах вэ? Төрөөс ямар бодлогоор зохицуулах вэ?

5. Дунд болон их дээд сургуулиудын оюутан сурагчид бүтэн жилээр ухрах уу, шалгалт шүүлэг хэрхэн өгөх вэ? Шалгалт өгөхгүй бол хэрхэн анги дэвших вэ?

6. Удахгүй ноолуурын улирал эхэлнэ. Ноос ноолуураа яаж тушаах уу? Дарханы дүрвэгсэд шиг уут шуудайгаар нь үүрээд туулайчлаад лав барахгүй. Цагдаад хураалгаж царайчлаад явах уу? Цаг үеийн нөхцөл байдлаас шалтгаалан нугалаа гаргагчид олноороо төрөх нь эргэлзээгүй.

5. Газраа хагалж, үр цацах, төмс хүнсний ногоогоо тариалах цаг дөхөж байна. Тэр тусмаа энэ жил мал аж ахуй, газар тариалангийн салбарынхан ачааны хүндийг үүрч гарна. Үүнийг хэрхэн амжуулж, хажуугаар нь вирустай тулалдах вэ?

6. Хэдийгээр ачаа тээврийн эргэлтэнд хориг тавиагүй боловч Монголд экспортлогч орнуудад вирус дэгдсэний улмаас асуудал хүндэрч, нийлүүлэлт саатвал хүнс, өргөн хэрэглээний барааны хомсдолоос хэрхэн гарах вэ? Яаж гал алдахгүй байх уу? Үндэсний үйлдвэрлэгчид үүрэг хүлээсэн цагтаа үүрээд гарч чадах уу?

7. Эмч эмнэлгийн ажилтнууд, цагдаа, онцгой байдал, мэргэжлийн хяналт, хил гаалийнхан амны хаалтаа ч солих боломжгүй, ариутгалын хувцасны мөнгөө цалингаасаа суутгуулан зүтгээд л байх уу? Тэдний аюулгүй байдал, ажил амралт, ачааллыг энэ олон сарын турш хэрхэн зохицуулах вэ?

8. Улс орноороо эрчим хүч, хүнсний бүтээгдэхүүн, цэвэр усаар суучихгүйн тулд улсын онцгой бүсүүдийг анхааралдаа авч ажиллах шаардлага тулгарч байна. Үүнд бас л хүн хүч, бодлого хэрэгтэй.

9. Хавар, зунжин вирустай тулалдах нь. Ирэх өвлийн бэлтгэлээ хэрхэх вэ?

10. Япон, Солонгосоос иргэдээ авчрах Засгийн газрын шийдвэр гарсан. Улсын хилээр орох, гарах хөдөлгөөн хэсэгтээ хязгаарлагдах нь тодорхой боллоо. Бусад орноос ч монголчууд эх нутгийн зүг тэмцэж таарна. Тэр болгонд онгоц нисгэх үү, хаалгаа дэлгээд халуунаар угтах уу, эсвэл үүдээ цоожлоод үргээд суух уу?

11. Монгол Улс бол ядуурал ихтэй орон. Хүн амын 10 шахам хувь нь төрийн албанд ажилладаг гэдэг утгаараа цалин орлого тасрахгүй л байх. Хөлөөрөө явж, толгойгоороо хариуцаж, тоо бодож орлого олж амьдралаа залгуулдаг хувийн хэвшлийнхэн цаашдаа яах вэ? За бүр цаашлаад бүх салбарт байдаг "Би чадна"-чууд хэрхэн хоол, түлш, амьжиргаагаа залгуулах вэ? Хоногийн хоолноос болж айл дээрэмдэж, амь хохироох хэрэг гарах энүүхэнд. Эмзэг давхаргынханд хүнд үеийг туулах бэлтгэл байхгүй. Тэдэнд төр ямар байдлаар боломж олгох вэ?

Covid-19-ийн асуудал сараар биш жилээр яригдаж байхад бид туулах замаа зөв тооцоолох нь чухал юм. Яг одоогийн байдлаар Монголын Засгийн газрын мэдэлд вирус тээгч нэг франц, вирусгүй 3.3 сая монгол иргэн байна. Хэрэв Засгийн газраас Covid-19 вирусын үеийн онцгой байдлыг хамтдаа туулах нэгдмэл санаа, бодлогоо тодорхойлбол монголчуудын харах зүг, зорих зорилго ойлгомжтой болж, атгасан гар шиг, амласан үг шиг, андын тангараг шиг байж, энэ бүх бэрхшээлийг эвийн хүчээр давах учиртай. Эс тэгвээс хоолоо булаалдаад, хоноцоо адлаад... ойрын зайнд хурдтай, холын замд цуцаатай адуу шиг болчих вий дээ!

Р.Эмүжин 

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.