Ичиножёо Ичинноров Япон бүсгүйчүүдийн мөрөөдөл нь боллоо

Twitter Print
2014 оны 11-р сар 19-нд 10:36 цагт
Мэдээний зураг,

Японы мэргэжлийн сумод цахиур хагалан орж ирсэн Монголын Ичиножёо Ичинноров энэ сард сэкиваке цолтой зодоглож байгаа. Макүшита, жюүрёод тус бүр хоёр башё зарцуулж дээд зиндаанд гарч ирсэн бөх сумогийн олон зуун жилийн түүхэнд түүнээс өөр байхгүй гэж бодохоор жинхэнэ утгаараа “од” гэж хүлээн зөвшөөрөгдөж байна.

“Минато” дэвжээний бөх тэрээр сумод ирэхээсээ өмнө жүдо бөхөөр хэсэг хугацаанд хичээллэсэн аж. Харин Японы Тоттори дунд сургуулийн багш шавь хайж, Монголд ирэхдээ А.Ичинноровтой уулзаж сумод урвуулж чаджээ. 2010 онд Японд очсон манай бөх сонирхогчийн сумогоор хичээллэж ёкозүна цол хүртсэн. Сонирхогчийн сумогийн ёкозүна мэргэжлийн сумод орвол макүшитагийн 15-аас эхлэн барилдах эрхтэй байдаг. А.Ичинноров сумод анх орсон цагаасаа дээд амжилт тогтоогоод байна. Тэрээр макүшитагийн 15-аас барилдсан анхны гадаад бөх, мэргэжлийн сумод элсээд дэвжээнийхээ хамгийн том цолтой бөх болсон нь анхны тохиолдол байв.

Ичиножёо Ичинноров дээд зиндаанд барилдсан анхны башёдоо 7 давж ганцхан унасан Түүнийг өдгөө дараагийн ёкозүна гэдгийг бүгд хүлээн зөвшөөрч алдарт их аварга Китаноүми “удахгүй Ичиножёог ялах бөх байхгүй болно байх шүү” гэж хэлжээ. Түүнийг Япончууд “Монгол Барүто”, “Монголын үлэмж биет”, “Малчин сумо” гэж нэрлэж дараагийн их аварга болохыг нь хүлээж сууна.

Өдгөө 21 настай Ичиножёо Архангай аймгийн Батцэнгэл суманд 1993 оны дөрөвдүгээр сарын 7-нд төржээ. Дээд зиндаанд анх барилдахдаа “тавиас дээш хувийн амжилтаа үзүүлэх зорилготой” хэмээн даруухан хариулт өгч байсан манай бөх түрүүлэх хэмжээнд барилдаж ёкозүна, озэки цолтонг өвдөг шороодуулсан.

Барилдаан бүр нь дээд амжилтын тоонд орж буй Монголын залуу сумочтой танилцах хүсэлтэй Япон бүсгүйчүүд дэвжээгээр нь эргэлдэх болжээ. Мөн хамт бэлтгэл хийдэг сумоч нартай нь уулзаж танилцуулж өгөхийг гуйдаг болсон аж. Мөн түүнд хаягласан хайрын захианууд шуудангийн хайрцганд нь багтахгүй болсон талаар ойр орчмын хүмүүс нь ярьж эхэлжээ.

Гадаад сумочид Япон бүсгүйтэй гэр бүл болох нь элбэг тохиолдол юм. Монголын их аварга Хакухо Даваажаргал, ахмад бөх Кёкүтэнхо Цэвэгням, Болгарын экс озэки Котоүшюү нар Япон бүсгүйг нэг насныхаа ханиар сонгож авсан. Мөн 71 дэх ёкозүна Какүрюүгийн фейсбүүк хаяг дээрх зургийг нь Герман эмэгтэй оруулдаг гэсэн мэдээлэл байдаг.

Харин ирээдүйн их аварга гэгдэж буй Ичиножёог өөрийн болгохоор одооноос Япон бүсгүйчүүд хуйларч эхэлсэн нь олны анхаарлыг татаж байна. Гэхдээ алдарт сумочид маань харийн орны хүргэн болж байгаа энэ цаг үед Ичиножёог Монгол бүсгүйтэй гэрлэнэ хэмээн эх орон нэгтгүүд нь итгэж сууна.

 

 

Сэтгүүлч М.Золбаатар

E-mail: mongolcom.mn@gmail.com
Утас: 76110303, 76110505

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.