Боловсролд биш буяны байгууллагад мөнгө "хаясан" 2015 оны төсөв

Twitter Print
2014 оны 11-р сар 17-нд 15:41 цагт
Мэдээний зураг,

Төрийн ордон төдийгvй автобусанд хүртэл дараагийн Ерөнхий сайдын асуудлыг ярилцсаар даруй олон хоног ард үлдлээ. Үүний цаана улсын төсөв гээч зүйл орхигдоод байв. Гэтэл хуулийн хугацаа тулсан өдрүүдэд УИХ дахь намын бүлэг, байнгын хороод бушуу хуралдаж, нэгэн дуугаар дэмжсээр нэгдсэн чуулган руу төсвийн төслийг шахаж, гараа өргөн батлацгаав. 

Ингэж нэг юм тардагын даваан дээр ирэх оныхоо төсвийг баталж орхилоо. Энэ төслийг хэдийгээр яаруу сандруу баталсан, боловсруулалт муутай гэж дүгнээд байгаа ч удахгvй шинэ Ерөнхий сайд тодорч, Засгийн газрын бүтэц бүрэлдэхvvн шинээр бүрдээд ирэхээр түүнийг дагаж, төсвийн тодотгол гээч нь хийгдэх болохоор “асуудалгvй” биз. Гэтэл энэ төсөл дотор олны эгдүүг хvргэсэн зургаан тэрбум төгрөг явж буй. 

Энэ нь Гандантэгчинлэн хийдийн өргөтгөл болох “Их Цогчэн дуган”-ы өргөтгөлийн ажлын зардал юм. Тодруулбал 1080 ламын ном хурах уг байгууламжийн ажилд 5.9 тэрбум төгрөг зоогоод өгчихсөн нь тийм ч оновчтой шийд болж чадсангvй. Уг байгууламжийг анх 2009 онд хоёр тэрбум 500 сая төгрөгөөр барина хэмээн төсөвлөсөн. Гэсэн ч 2011 онд барилга байгууламжийн төсөвт өртөг жил ирэх тусам өсдгийн жишгээр 11 тэрбум 700 орчим сая төгрөг болж өссөн. 

Мөн өнгөрсөн онд 12 тэрбум 892 сая болоод талийж өгсөн. Vvний дараа л хүмүүс гэнэт ухаан орсон мэт “Гандангийн барилгад ийм мөнгө жил бүр зарцуулж байхаар цэцэрлэг, сургууль бариач” хэмээн ам уралдаж эхэлсэн. Гэтэл энэ жил мөнөөх барилгын ажилд зориулж 5.9 тэрбум төгрөг гаргасан нь энэ шүүмжлэлийг ихэд хурцатгав. Хэдийгээр ирэх оны төсвийн төслийг гишүүдийн олонх нь гар өргөн дэмжсэн ч энэ зургаан тэрбум төгрөгийн талаар гишvvн өөрсдийн байр суурийг цахим хуудсуудаараа дамжуулан илэрхийлж байсан юм.

Тухайлбал УИХ-ын гишүүн С.Дэмбэрэл “Гандантэгчинлин хийдэд хөрөнгө оруулалт хийж байгаа бол яг тийм эрхтэйгээр христ, муслим шашны сүмүүдэд хөрөнгө оруулалт хийж болно гэсэн үг” хэмээн өөрийн твиттер хуудсандаа жиргэсэн байна. Мөн УИХ-ын гишүүн асан С.Ламбаа “Уг нь Ганданд биш Гандангийн өв соёлыг түшиглэн дэлхийд гайхуулах музейг дотор нь байгуулъя гэсэн төсөв буруу л томъёоллоор яваад байна даа” гэсэн байна.

Энэ мэт олон жиргээ, постууд цахим ертєнцєд хэд хоног бичигдэв. Гэхдээ нэгэнт баталчихсан зүйлийг одоо яалтай ч билээ. Уг нь санаагаар болдог бол ирэх онд улсын төсвөөр баригдах 38 цэцэрлэгийн өргөтгөлийн барилгын ажилд дээрх мөнгийг нь суулгаад өгчихсөн. Гэтэл тэдний барилгын ажилд зориулж нийтэд нь 10 тэрбум төгрөг гээд цохчихож.

Ирээдvйдээ хөрөнгө оруулалт хийж, боловсролтой монгол иргэнийг бэлтгэх зэрэг яриа зүгээр хоосон хийрхэл болж таарах нь. Жил бүрийн намар хичээл эхлэхтэй зэрэгцэн эцэг эхчүүд цэцэрлэгүүдийн гадаа хонож өнжин дугаарладаг асуудал цаашид хэдэн жил үргэлжлэхийг бүү мэд. Гэхдээ ард иргэдийн хамгийн их очиж, амь амьдралаа даатгаж, хэдэн бор төгрөгөө барьдаг гандан хийд улсын хөрөнгө оруулалтаар өнгө зүс нэмэх нь тодорхой болов. 

Уг нь гандан хийдийг монголчууд буян номын газар гэж шүтэж, алив муу муухай бvхэн тохиолдоход хамгийн түрүүнд тийш зүглэдэг нь үнэн. Гэсэн хэдий ч мөнгө хийдэг, угаадаг газар гэж ам уралдан хэлцдэг нь ч нэгэнт үнэн. Ямартай ч ирэх оны төсөвт гандангийн өргөтгөлд суусан мөнгө улсын хэмжээнд улсын төсвөөр баригдах цэцэрлэгийн барилгын ажлын төсөвтэй харьцуулахад хэт өндөр байгаа нь нэг л буруу тийшээ эргэчихэв.

Мөн ирэх оны улсын төсвийн хөрөнгөөр санхүүжүүлэх хөрөнгө оруулалтын төсөл, арга хэмжээ, барилга байгууламжийн дүнг 655 тэрбум 417.5 сая төгрөгөөр, Хөгжлийн банкны эх үүсвэрээр төсвөөс эргэн төлөгдөх нөхцөлтэйгээр 2015 онд санхүүжүүлэх хөрөнгө оруулалтын төсөл, арга хэмжээ, барилга байгууламжийн дүнг 195 тэрбум 556.8 сая төгрөгөөр баталлаа. Түүнчлэн Төсвийн тогтвортой байдлын тухай хуулийн 16 дугаар зvйлд заасны дагуу Төсвийн тогтворжуулалтын санд ирэх оны төсвийн жилд хуримтлуулах хөрөнгийн хэмжээг 34 тэрбум 385.8 сая төгрөгөөр батлав.

Энэ хуулиар ирэх оны төсвийн жилд төсвийн алдагдлыг санхүүжүүлэх эх үүсвэрийг шинээр гаргах болон дахин санхүүжүүлэх Засгийн газрын он дамжих үнэт цаас 1 их наяд 815 тэрбум 740.1 сая тєгрєг хүртэл, Засгийн газрын шинээр авах гадаад төслийн зээл 277 тэрбум 460.6 сая төгрөг байхаар тогтоов. Харин ирэх оны төсвийн жилд орон нутгийн төсөвт олгох санхүүгийн дэмжлэгийн хэмжээ 160 тэрбум 322.1 сая, Орон нутгийн хөгжлийн нэгдсэн санд төвлөрvvлэх орлогын хэмжээг 15 тэрбум 410.5 сая, Орон нутгийн хөгжлийн нэгдсэн сангаас Орон нутгийн хөгжлийн санд олгох орлогын шилжүүлгийн хэмжээг 201 тэрбум 962.2 сая төгрөг байхаар баталлаа.

Д.Энхтүвшин

 

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.