“MAGIC BOX” тѳсѳл зѳвхѳн “НОМЫН САН” биш

Twitter Print
2021 оны 11-р сар 07-нд 15:44 цагт
Мэдээний зураг,

15 залуусын санаачилсан “Magic Box” тѳслийн байгууламж Сүхбаатарын талбай дээр тавигдсан 5 ѳдѳрт бидний тѳсѳѳлснѳѳс ч их ном цугларав. Хѳдѳѳгийн сумын болон Улаанбаатар хотын алслагдсан хязгаарын хүүхдүүдэд чин сэтгэлээсээ ном хандивласан хүүхдүүд, иргэд, байгууллагын хамт олонд чин сэтгэлээсээ талархаж байна. “Magic Box” маань номоор дүүрсэн ч дараагийн асуудлууд шийдлээ хүлээж байна.

*”MAGIC BOX” тѳсѳл маань зѳвхѳн номын сан биш харин “ХҮҮХЭД ХѲГЖЛИЙН бэсрэг ТѲВ” юм. Тендэрт шалгарч энэ тѳслийг хэрэгжүүлэх сумууд нилээд хариуцлага үүрнэ.

1. Хүүхдүүд ном уншиж, чѳлѳѳт цагаа үр бүтээлтэй ѳнгѳрүүлнэ

2. Хүүхдүүд код бичих сургалтад хамрагдан IT технологид суурилан бүтээл хийнэ

3. Англи хэлний мэдлэгээ дээшлүүлэн хэл ярианы чадвартай болно

4. Тѳрѳл бүрийн дугуйлангууд хичээллэж болно

5. Тэтгэвэртээ гарсан ахмад багш нар нэмэлт давтлага ѳгч болно

6. Онлайн сургалтыг хѳгжүүлж болно

7. Хамтдаа кино үзэж, санал бодлоо хуваалцаж болно

8. Хүүхдүүд гэрийн даалгавраа хамтдаа хийж бие биенээсээ суралцана

9. Оюутнууд зундаа ахлах ангийн хүүхдүүдэд мэргэжил сонгох сургалт зохион байгуулж болно

Энэ тѳслийг санаачлагч бид “Magic Box” тѳслѳѳ хѳдѳѳ сумын хүүхдүүдэд ѳѳрийгѳѳ нээж хѳгжүүлэхэд нь туслах, алслагдмал хязгаараас үл хамааран хотын хүүхдүүдтэй адил тэгш боломж олгох, ирээдүйд ѳѳрийн орон нутгаа хѳгжүүлэх сайн залуус болж тѳлѳвшихѳд дэм болох зорилго л ѳвѳрлѳсѳн юм шүү дээ. Тэгэхээр энэ тѳслийг буруугаар ашиглаж болохгүй.

1. Юм хадгалах склад болгож болохгүй

2. Аль нэгэн намын сурталчилгааны байр болгож болохгүй

3. Суман “атаман”-ууд ирж архи уудаг газар болгож болохгүй

4. Ашиглахдаа хүүхдүүдийг ялгаварлан гадуурхаж болохгүй

5. Номнуудыг хулгайлж, эсвэл гэртээ аваачаад “мартаж” болохгүй

6. Хариуцсан хүн нь цоожлоод ийш тийшээ явж болохгүй

7. Танил талаараа ѳѳрсѳддѳѳ давуу байдал үүсгэж болохгүй

8. Яаж ажиллахыг дарга нар зааварлаад байж болохгүй

Ингээд бодохоор энэ тѳслийг сумандаа “амьсгалуулах” залуусын баг ажиллавал зүгээр байгаа биз? Зүгээр л сумандаа аятайхан байгууламжтай болох гэхээс энэ тѳслийг сум орон даяараа дэмжиж, хамтдаа үр ашигтай ашиглах чин хүсэл тань бидэнд хэрэгтэй байна.

*”Magic Box” тѳслийн анхны байгууламжийг сумандаа авах тендэрт нийтдээ 60 гаруй сумуудын материал ирсэнтэй бид танилцаж байгаа. Маргааш бид багаараа сууж байгаад тѳсѳл бүрийн танилцуулгыг хэлэлцэж, шалгаруулалт дээр саналаа ѳгцгѳѳнѳ. Энд ямар нэгэн лобби, танил талын дэмжлэг орохгүй гэдэгт бүрэн итгэж болно. Шалгарсан эхний сумд энэ байгууламжаа хүргэж ѳгѳхдѳѳ санаачлагч 15 залуус бүгдээрээ хамт очиж танай сумд “Mind Tour” арга хэмжээг зохион байгуулах юм.

1. “Magic Box” тѳслийг хариуцан ажиллах залуустай уулзаж мэргэжлийн зѳвлѳлгѳѳ ѳгнѳ

2. Сумын иргэд залуустай уулзаж манай залуус илтгэл тавьж мѳрѳѳдлѳѳ хуваалцана

3. Орой нь хамтдаа дуулж шүлэглэж сайхан найзууд болцгооно

4. Сумын удирдлагуудтай уулзан энэ тѳслѳѳ “амьдруулах” талаар ярилцаж, тэдэнтэй гэрээ байгуулна

5. Бас танай сумын байгалын үзэсгэлэнт газраар аялж, зураг авч сайхан дурсамж үлдээнэ

Энэ бол та нартай уулзан “тархины түгжээ”-гээ мултлах эхний алхам юм шүү дээ. Бид та нарын халуун дулаан сэтгэлийг мэдэрч, ѳѳрсдийн хүсэл мѳрѳѳдлѳѳ адилтгахыг хүсч байна. Энэ нь бидний тѳслийн амьсгалах агаар нь юм шүү дээ.

*Энэ удаад тѳсѳлд шалгарахгүй бол бүү бачимдаж биднийг буруутгаарай. Хэрэв бидний санаачлагыг орон даяар дэмжвэл бид 3 жилийн дотор Монголын 330 сумд “Magic Box” байгуулах дэврүүн мѳрѳѳдѳлтэй. Энэ удаа бид тѳслийнхээ загвар дээр тест хийж байгаа. “Бидний мѳрѳѳдѳл бодитой юу?”, “Бид үүнийг яаж ѳргѳжүүлэх вэ?”, “Бид бусад хүмүүстэй яаж хамтран ажиллах вэ?” гэсэн асуултууддаа хариу олохыг хичээж байгаа. Зѳндѳѳ боломжууд байгаа юм байнаа.

Нэг ийм байгууламжийн доторхи номнууд болон компьютэрүүд зэргийг оролцуулаад 100 сая орчим тѳгрѳгт бүтэх урьдчилсан таамаглал байна. Тэгэхээр энэ санхүүжилтийг босгохдоо:

1. Сум бүр 800-1000 хонь цуглуулаад түүнийгээ борлуулахад энэ байгууламжийн санхүүжилт босно

2. “Нутгийн зѳвлѳл”-ийнхэн энэ байгууламжид хѳрѳнгѳ оруулах боломж олж болно

3. Нутаг орондоо санаа тавьж буй бизнесмэнүүд болон гадаадад байгаа монголчууд санхүүжилт гаргаж болно

4. Дээрхи боломжуудаа нэгтгэж санхүүжилт босгож болно

Та нарын босгосон санхүүжилтэд бид оролцохгүй бѳгѳѳд энэ байгууламжийг байгуулах болон үйл ажиллагааны чиглэл, менежмэнтэд туслах боломжтой. “Magic Box” тѳслийн байгууламж болон үйл ажиллагааны менежмэнтийн “Оюуны ѳмч”-ийн эрхийг манай залуус эзэмших юм. Тэгэхээр бид та нарт албан ёсоор тусалж дэмжих боломж бүрдсэн гэсэн үг. Энэ тѳсѳл нь орон нутгийн иргэдийн идэвхи санаачлага, чин сэтгэл дээр л хѳгжин хэрэгжинэ. Зүгээр л юм хийсэн дүр эсгэх, хэлбэрдэх, бодит үр дүнг огт тооцохгүй байхаас бид аль болох зайлсхийж байгаа.

*“Magic Box” тѳсѳл нь танай сум орон нутгийн хѳгжлийн ирээдүйд оруулж буй бодит хѳрѳнгѳ оруулалт мѳн. Танай сумын хүүхдүүд одооноос ѳѳрсдийгѳѳ хѳгжүүлж эхлэхэд бодит үр дүн нь 10-15 жилийн дараа гарч эхлэх байх. Танай сумд та нар болон үр хүүхдүүд тань амьдарна. Тэгэхээр ямар сумд амьдрахыг хүсч байна, тэр сумаа та нар ѳѳрсдѳѳ байгуулна. Ѳѳр сонголт үгүй. Түүний тѳлѳѳ одооноос хамтарч ажиллацгаая. Та нар биднийг хүлээж авахад бэлэн үү? БИД БЭЛЭН БАЙГАА.

“Magic Box” тѳслийг санаачлагчид

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.