Цагаан сар гэж нялх балчир үрс, настан буурлууд, дархлаа султай хүмүүсээ эрсдэлд оруулмааргүй байна шүү, та минь ээ

Twitter Print
2022 оны 01-р сар 12-нд 13:39 цагт
Мэдээний зураг,

2022 оны 01 сарын 12-ны өдрийн байдлаар Монгол улсад PCR шинжилгээгэр батлагдсан шинэ тохиолдол 1818 бүртгэгдлээ. Энэ зөвхөн албан ёсны шинжилгээнд батлагдсан тоо гэж ойлгож болно. Цаана нь зөвхөн шинж тэмдэгтэй байгаа ч шинжилгээнд хамрагдаж чадаагүй эсвэл түргэвчилсэн шинжилгээгээр эерэг гарсан гээд дээрх тоонд тоологдоогүй тохиолдлууд нэлээдгүй байгаа гэж таамаглаж байна (бүртгэлд ороогүй 3-4 мянган тохиолдол ойролцоогоор байх магадлалтай).

Цагаан сарын бэлтгэл гээд хүмүүсийн хөдөлгөөн ихсэж, хүмүүс хоорондын зай барих дэглэм алдагдаж, контакт болох явдал эрс нэмэгдэж байна. Үр дүнд нь халдварын тархалт урд хожид байгаагүй түвшинд хүрэх магадлалтай байна.

Зарим хүмүүс омикрон хувилбарын халдвар нь хөнгөн бөгөөд эмгэг төрүүлэгч чанар багатай болохоор хамрын ханиад ханиад төдий гэж ойлгоод санаа амар байх шиг. Магадгүй олуулаа өвдсөн ч харин ч сүргийн дархлаа тогтоод, нэг их ноцтой хохирол учруулахгүй гэж бодож байгаа ч хүмүүс нэлээн байна. Үнэндээ тийм биш гэдгийг маш сайн ойлгох хэрэгтэй.

Өнөөдрийн байдлаар Омикрон хувилбар АНУ-д коронавируст халдварын гол урсгал болж байгаа бөгөөд өдөрт 2000 гаруй хүн нас барж байна. Энэ янзаар явбал ирэх сар гэхэд ойроллцоогоор 60 мянган хүн амиа алдах магадлалтай байна гэсэн туйлын хүнд хэцүү байдалд байна.

Энэ тухай New York Times сонины 2022 оны 01 дүгээр сарын 9-ний дугаарт нийтлэгджээ.

Эх сурвалж: Early Data Hints at Omicron’s Potential Toll Across America. By Lauren Leatherby and Eleanor LutzJan. 9, 2022

https://www.nytimes.com/.../omicron-cities-cases...

Нью-Йорк хотод өнгөрсөн оны 12-р сарын 17-ны байдлаар омикрон хувилбар нийт халдварын 70 гаруй хувийг эзэлж байж. Омикрон хувилбарын халдвар авсан хүмүүсийн тоо хурдацтай нэмэгдэхийн хэрээр хүнд өвчтэй, нас барсан хүмүүсийн тоо ч мөн хурдацтай нэмэгдэж байна. Бостон, Чикаго хотуудад ч мөн адил.

Зураг 1. Сонинд нийтлэгдсэн зураг бөгөөд Нью-Йорк, Бостон, Чикаго зэрэг АНУ-ын томоохон хотуудад халдвар авсан хүмүүсийн шилжилт, нас баралтыг харуулж байгаа (Монгол тайлбар нэмсэн ) болно. Өөрөөр хэлбэл, эмгэг төрүүлэгч чанар буюу хоруу чанар сул байсан ч халдвар авсан хүний тоо хурдацтай нэмэгдвэл хүндрэх, нас барах хүний тоо хурдацтай нэмэгддэг зүй тогтлолыг харуулж байна гэсэн үг.

Зураг 2 нь вакцины үр нөлөөг харуулж байгаа болно. Эмнэлэгт хэвтэн эмчлүүлж буй хүмүүсийн дунд вакцинд хамрагдаагүй хүмүүсийн тоо огцом нэмэгдэж байгаа бол вакцинд хамрагдсан хүмүүсийн тоо үл ялиг л нэмэгдсэн байгаа байдал харагдаж байна.

Омикрон хувилбарын халдварын улмаас эрчимт эмчилгээний тасагт хэвтэн эмчлүүлж буй хүмүүсийн ихэнх нь вакцинд хамрагдаагүй эсвэл дархлааны дутагдалтай хүмүүс байна. Энэ нь нөгөө талаар вакцин нь омикрон хувилбарын хүндрэлийн эсрэг сайн үр нөлөөтэй байна гэдгийг харуулж байна гэж ойлгож болно.

Дээр дурдсанчлан, омикрон хувилбарын халдвар бидний бодож байгаачлан тийм ч амар хялбар эд биш байна. Вакцинжуулалтандаа бүрэн хамрагдаж, амны хаалтаа байнга зөв зүүх нь омикрон хувилбарын халдвараас сэргийлж, хүндрэл болон нас баралтыг бууруулах боломжтой байж магадгүй. Харин Цагаан сар энэ тэр гэж нялх балчир үрс, өндөр настан буурлууд, дархлаа султай хүмүүстээ төвөг учруулмааргүй байна шүү та минь ээ.

Ойдовын Батгэрэл Ph.D

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.