Д.Эрдэнэбат: АН анх удаа фракцын зөрчилгүй, ашиг сонирхолгүйгээр нэр дэвшүүллээ

Twitter Print
2014 оны 11-р сар 12-нд 14:33 цагт
Мэдээний зураг,

УИХ дахь Ардчилсан намын бүлгийн хурал өндөрлөж, хуралдааны үр дүнгийн талаар бүлгийн дарга Д.Эрдэнэбат сэтгүүлчдэд мэдээлэл хийлээ. Өнөөдрийн бүлгийн хуралдаанд Ардчилсан намын 30 гишүүн оролцож, 27 гишүүн санал хураалтад оролцсон байна. Ингээд бүлгийн хуралд оролцсон гишүүдийн 100 хувийн саналаар Ренчиннямын Амаржаргалыг дараагийн Ерөнхий сайдад нэр дэвшүүлэхээр боллоо. Түүнчлэн уг хурлаар УИХ-д суудалтай нам, эвслүүдтэй зөвшилцөж, Засгийн газрын дараагийн хувилбарыг шийдэх ажлын хэсгийг зургаан хүний бүрэлдэхүүнтэй байгуулсан байна.

Ажлын хэсгийн ахлагчаар бүлгийн дарга Д.Эрдэнэбат томилогдожээ. Өнөөдрийн бүлгийн хуралдаанд мөн Ардчилсан намын дарга Н.Алтанхуяг болон “Алтангадас” фракцийнхан оролцоогүй байна. УИХ дахь АН-ын бүлгийн дарга Д.Эрдэнбат “Намын дарга бүлгийн хуралдаа оролцоогүй шалтгааныг мэдэхгүй. Бүлэгт харьяалалтай бүх 35 гишүүн хуралдаа оролцох бүрэн эрхтэй” гэв.

Мөн тэрбээр “Ардчилсан намын бүлэг дараагийн Ерөнхий сайдад нэр дэвшигчийг тодруулахдаа анх удаа ямар нэгэн фракцийн зөрчилгүй, жижиг ашиг сонирхолгүйгээр асуудлыг шийдлээ” хэмээн онцоллоо. Товч мэдээллийн дараа сэтгүүлчид бүлгийн дарга Д.Эрдэнэбатаас зарим зүйлийг тодрууллаа.

-Засгийн газар байгуулах асуудлаар парламентад суудалтай бүх намуудтай зөвшилц гэсэн байгаа. Тэгэхээр бүх намуудтай зөвшилцөх үү. Эсвэл зөвхөн “Шударга ёс” эвсэлтэй зөвшилцөх үү?

-Бүх намуудтай зөвшилц гэдэг үүргийг ҮЗХ-ноос өгсөн. Тийм учраас парламентад суудалтай бүх намуудтай эхний ээлжинд зөвшилцөх саналыг тавина.

-Засгийн газрын эсрэг санал өгсөн гишүүдээс нэгийг нь ч дэмжихгүй гэж намын дарга Н.Алтанхуяг мэдэгдсэн?

-Үүнийг манай намын даргын байр суурь гэж ойлгож болно. Намын дүрмээр харилцаа өөр байдаг. Бүлгийн дүрмээр бас өөр харилцаатай. Бид өнөөдөр бүх асуудлыг бүлгийнхээ дүрмийн хүрээнд шийдсэн байгаа.

-Бүлгийн шийдвэр ҮЗХ-н дээр унавал яах вэ?

-Тэрийг би хэлж мэдэхгүй байна. Бүлгийн хурал болон намын шийдвэр хоёр тусдаа. Намын шийдвэр хэрхэн гарахаас шалтгаалж тэр шийдвэрийг тусгах асуудал нээлттэй байгаа. Гэхдээ би ийм асуудал болохгүй байх гэж найдаж байна.

-Эдийн засгийн өнөөгийн нөхцөл байдал, хүндрэлээс гарах талаар Р.Амаржаргал гишүүн тодорхой судалгаа, тооцоо танилцуулсан уу?

-Р.Амаржаргал гишүүн эдийн засгийн хямрал, Монгол Улсын өнөөгийн нөхцөл байдлын талаар өөрийнхөө байр сууринаас нэлээд сайн ярьсан. Бид ярилцаж байгаад маргаашнаас эхлэн өнөөдрийн бүлгийн үйл ажиллагааны үеэр яригдсан сэдвийг олон нийтэд нээлттэй дэлгэх нь зүйтэй гэж үзсэн. Тийм учраас маргаашийн хэвлэлүүдээр олон нийтэд хүрнэ.

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.