Лаос улс иргэдээ коронавирусын нөхцөл байдал намжтал эх орондоо ирэхээс түдгэлзэхийг чиглэл болголоо

Twitter Print
2020 оны 03-р сар 20-нд 13:01 цагт
Мэдээний зураг,

Өчигдөр Лаосын Гадаад хэргийн сайд, Эрүүл мэндийн дэд сайд нар хамтран Коронавирусын хямралын үед Лаосын Засгийн газраас авч хэрэгжүүлэх иж бүрэн арга хэмжээний талаар мэдээлэл хийв.

Хэдийгээр Лаост коронавирусээр халдварласан тохиолдол бүртгэгдээгүй гэж буй боловч олон улсад, ялангуяа хил залгаа улсуудад уг вирусын халдвар тархаж байгааг харгалзан онцгой дэглэм, журам тогтоож байгаа тухай зарлав.

Хэрэгжүүлэх арга хэмжээний ихэнх нь манайхтай ижил төстэй бөгөөд улсын онцгой болон аюулгүй байдал хариуцсан байгууллага, эрүүл мэндийн байгууллагын үйл ажиллагаанд чухал ач холбогдол өгч байна.

Ерөнхий сайдын орлогч бөгөөд сангийн сайдаар ахлуулсан онцгой байдлын үед ажиллах ажлын хэсгийг Засгийн газрын ээлжит бус хуралдаанаас байгуулж, ажлын төлөвлөгөөг баталжээ.

Онцлог зарим арга хэмжээнээс дурдвал:

1. Лаост зорчих визийн журамд 30 хоногийн хугацаанд түр өөрчлөлт оруулж буй тухай мэдэгдэв. Тухайлбал, жуулчны болон бүх төрлийн оюутны виз олголтыг 30 хоногийн хугацаанд зогсоох, бүх ангиллын Е-виз, хилийн боомтод виз олголтыг зогсоохоор шийдвэрлэжээ. Энэхүү шийдвэр гарахаас өмнө олгогдсон виз эзэмшигч нь суугаа улсын эрүүл мэндийн байгууллагаас вирусын халдваргүйг нь нотолсон гэрчилгээ, баримт үзүүлэхгүй бол хилээр нэвтрүүлэхгүй гэж мэдэгдэв.

Мөн тэрчлэн визгүй зорчих хэлэлцээртэй улсын иргэд Лаост зорчих шаардлагатай бол Лаосын ЭСЯ, эсвэл ерөнхий Консулын газраас заавал виз авах журамд шилжих.

2. Байнга оршин суух үнэмлэхтэй гадаадын дипломатаас бусад гадаадын иргэнийг виз хийгээд эрүүл мэндийн гэрчилгээгүй бол хилээр нэвтрүүлэхгүй байх,

3. Олон улсын онгоцны буудлаас бусад хилийн бүх боомтыг хаасан бөгөөд гадаадад байгаа Лаосын иргэдээ коронавирусын нөхцөл байдал намжтал эх орондоо ирэхээс түдгэлзэхийг чиглэл болгох,

4. Лаост зохих журмын дагуу эрсдэл бүхий улс орноос ирсэн дотоод, гадаадын иргэнийг 14 хоногийн хугацаанд гэрт нь, эсвэл тусгаарлах байранд тусгаарлан хяналтад байлгах,

5. Олон нийтийг хамарсан баяр ёслолын арга хэмжээ зохион байгуулахгүй байх ялангуяа Лаосын уламжлалт шинэ жил-усны баярыг энэ удаад тэмдэглэхгүй өнгөрөөх,

6. Коронавирус эдийн засагт сөргөөр нөлөөлж байгаагаас хэрхэн сэргийлэх талаар төр, хувийн хэвшил, олон нийтийн байгууллагын оролцоотой томоохон семинар зохион байгуулж санал солилцох, зохих шийдвэр гаргах, онцгой байдлын дэг журам зөрчигч, хуурамч мэдээлэл тараагч, хүнсний болон өргөн хэрэглээний барааны хомсдол үүсгэхэд хүргэх үйлдэл гаргагчид хуулийн хатуу хариуцлага ногдуулах зэрэг арга хэмжээ авахаар шийдвэрлэжээ.

Эх сурвалж: Лаос улсад суугаа Монгол улсын ЭСЯ

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.