“Оюу толгой”-н зардлыг хэмнэсэн бол доод тал нь Нийслэлийн цэцэрлэгийн асуудлыг шийдэж болох байлаа

Twitter Print
2014 оны 11-р сар 11-нд 14:18 цагт
Мэдээний зураг,

УИХ-ын гишүүн Г.Уянга өнөөдөр сэтгүүлч нарт мэдээлэл хийлээ. Тэрбээр Оюутолгой төслийн зардлын хэтрэлттэй холбоотойгоор УИХ-аас гарсан шалгалтын ажлын хэсгийг ахалж буй юм. Ажлын хэсэг жил гаруй хугацаанд ажиллаж, тайлан дүгнэлтээ гаргасан байна. Ингээд зардлын хэтрэлтийн гүйцэтгэлийг шалгасан дүнгээ Засгийн газарт хүргүүлж, тодорхой шийдэл гаргахыг хүлээсэн ч өнөөг хүртэл Засгийн газраас ямар нэгэн хариу ирээгүй байгаа аж.

Тиймээс УИХ-ын гишүүн Г.Уянга шалгалтын явцад зардлын хэтрэлттэй холбоотойгоор гарсан дүгнэлтүүдийг өнөөдөр олон нийтэд дэлгэлээ. Эдгээр дүгнэлтүүд нь төрийн нууцын зэрэглэлтэй байгаа бөгөөд гишүүн Г.Уянга энэ асуудлыг төрийн нууцад хамаарах үндэслэлгүй хэмээн үзсэнээр ийнхүү баримтуудыг дэлгэж байгаа гэнэ. Эхний ээлжинд тодорхой гурван баримтыг танилцууллаа.

Нэг: Цалингийн талаар  

-“Оюу Толгой” ХХК-ийн менежрүүдийн цалин 2011 оны байдлаар 92000 ам.доллар байгаа нь “Төслийн менежментийн интитут” гэх олон улсын байгууллагын дэлхийн 29 орон дахь төслийн менежрүүдийн цалингийн дунджаас 2.8 дахин их байна. “Оюу Толго” ХХК-ийн 2010-2012 оны хооронд гадаад ажилчдын цалингийн зардалд төлсөн нийт дүн дээрх судалгаанд хамрагдсан менежрүүдийн дундаж цалингаас 10.8.7 сая ам.доллараар илүү байна.

Мөн төслийн далд уурхайн ажлыг гүйцэтгэсэн “Рэд Пат” ХХК-ийн дотоод болон гадаад ажилчдын цалин асар их зөрүүтэй байгаа аж. Тухайлбал, гагнуурчны өдрийн цалин гадаад ажилтанд 1,804,737.15 төгрөг, монгол ажилтанд 71,606 төгрөг байгаа нь зөрүү 25 дахин их байгаа юм.

Хоёр: Төслийн удирдлагын зардлын талаар

-Фрийдландын хувийн орон сууцны түрээс, Мауринг Сюгийн хүүхдийн сургалтын төлбөрийг монголчууд зээлээрээ төлдөг. Тодруулбал “2004 оны арваннэгдүгээр сарын 19-ний өдөр Turquoise hill resources” болон Айвэнхоу группын хамааралтай бусад компаниуд хооронд байгуулагдсан “Cost Sharing agreement” буюу зардал хуваалцах гэрээний дагуу “Оюутолгой” ХХК нь 2010 онд 23.1 сая ам.долларын, 2011 онд  21.3 сая ам.долларын зардал хваарилжээ. Мөн төслийн болон тус компанийн үйл ажиллагаатай шууд холбогдолгүй, группын бусад компаниудаас хуваарилагдан бүртгэгдсэн байж болзошгүй зардлуудыг түүвэрлэсэн байна.

Тухайлбал, Оюутолгой ХХК-ийн бус гадаад ажилчдын болон “Флуор”-ын ажилчдын Хятадад төлсөн орон сууцны түрээс, эмнэлгийн үйлчилгээ, Роберт Фрийдландын хувийн орон сууцны түрээс, Шанхайн оффист гарсан Стийв Гарсиагийн зардлууд, Ванкуверт агуулахын түрээс, ажилтан элсүүлэх зардал, дайны эрсдлийн даатгал, Рио Тинтогоос томилогдсон Г.Батсүхийн Бээжин дэх орон сууцны түрээс, түүний аяллын зардал, амь даатгал зэрэг нийт 214.4 сая ам.доллар байгаа аж. Энэхүү зардлууд нь нягталн бодох бүртгэлийн олон улсын стандартыг зөрчиж, Оюутолгой төслийн хөрөнгө оруулалтын шууд зардлаар бүртгэгдсэн байна.

Гурав: “Петровис” ХХК-ийн гүйцэтгэсэн ажлын талаар

-Петровис ХХК-тай 2007 оноос бүтээгдэхүүн нийлүүлэх гэрээ байгуулан ажиллаж байгаа юм байна. Тус компаниас нийлүүлж байгаа шатахууны үнэ нь бөөний бус жижиглэнгийн үнэ. Мөн шатахуун түгээх станцын үйл ажиллагаатай холбоотой гарч буй “Петровис” ХХК-ийн ажиллагсдын цалин, даатгал зэрэгт гарч буй 20-50 сая төгрөгийн зардлыг сар бүр гаргаж, хөрөнгийг үрэлгэн зарцуулж, тэр хэмжээгээр зардлаа өсгөсөн байна. Мөн “Оюутолгой” ХХК нь 2012 онд өөрийн үндсэн хөрөнгөд бүртгэлгүй гадны байгууллагын хөрөнгийн засварт гэж их хэмжээний мөнгийг зарцуулсан байна.

Тухайлбал, “Петровис” ХХК-ийн Бор-Өндөр, Чойр дахь бөөний агуулахын засварт гэсэн зориулалтаар “Оюутолгой” ХХК-ийн ажилтан John M.Jones-ийн шийдвэрээр 2,974,9 сая төгрөгийг 2012 оны зургаадугаар сарын 3-нд шилжүүлсэн. Мөн оны зургаадугаар сарын 23-нд тээврийн зардалд гэсэн тайлбартайгаар 408.3 сая төгрөг “Петровис” ХХК-д тус тус шилжүүлсэн нь анхан шатны баримтгүй байгаа нь Монгол Улсын Нягтлан бодох бүртгэлийн тухай хуулийн холбогдох зүйл заалт, журмуудыг зөрчжээ.

УИХ-ын гишүүн Г.Уянга дээрх баримтуудыг дэлгэснийхээ дараа “Цаашдаа өөр олон баримт байгаа. Бид тодорхой хэмжээнд судалж, нягталсныхаа дараа үе шаттайгаар дэлгэх болно. Магадгүй миний ярьж байгаа энэ мөнгөн дүнгийн хэмжээ төслийн нийт өртөг, хөрөнгө оруулалттай харьцуулахад өчүүхэн бага байж болно.

Гэхдээ энэ бол монголчууд бидний төлөх өр. Тийм учраас 2000 ам.доллараас 20 сая, 200 сая ам.доллар хүртэлх нэг центийн зарцуулалтыг ч анзаарахгүй өнгөрөөж болохгүй. Өнөөдөр дурдаж буй 400 гаруй тэрбум төгрөгийн сул зардал л гэхэд хэрвээ хэмнэсэн бол нийслэл дэх цэцэрлэгийн асуудлыг бүрэн шийдвэрлэх боломжтой мөнгөн дүн шүү дээ” гэсэн юм.

 

Сэтгүүлч М.Золбаатар

E-mail: mongolcom.mn@gmail.com
Утас: 76110303, 76110505

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.