Унтаж буй Улаанбаатар

Twitter Print
2020 оны 08-р сар 23-нд 09:38 цагт
Мэдээний зураг,

“Урамгүй гэдэг нь. Өглөө эрт нээгддэг, үйлчилгээний газар гэж нэг байхгүй шүү. Манай хөдөөнийхөн ч маш эртэч хүмүүс дээ. Өглөө нар битүү л босно.” Ийн ярилцах хоёр хүний яриаг сонсоод, нэг хэсэгтээ бодол болчихжээ.

“Нээрээн л тийм дээ. Тааруухан энэ зуршлыг яавал халах вэ, байз.

Мөнхийн хэмнэгч үндэстэн гэгддэг германчууд л гэхэд, өглөө бүхнээс эрт босч, цаг хэмнээд, жилдээ 104 цаг гаргаад авчихдаг гэдэг, тэр берлинчүүд гэж яасан эртэч хүмүүс вэ. Манай малчид, ялангуяа говийн малчид бол үнэхээрийн эртэч хүмүүс. Зуны дэлгэр цагт гүүгээ барьчихаад, айраг хөхүүрэндээ шуугиж байх ч мөн л аатай даа. Гэвч тэр хосгүй идээг хэрхэн бэлддэгийг хотын хүмүүс тэр бүр мэддэггүй. Айргийг нь л магтаад л уугаад байхаас биш, адуундаа өглөөний тав зургаад морддог, долоо найм гэхэд эхний саамаа хэдийнээ саачихсан байдаг гэж яаж мэдэх билээ.

Малчин бүсгүйчүүд тэртээ эрт босч, үнээ маландаа нар битүү л гарч, хувин саваа барин зэл рүүгээ алхдаг. Тэр бүхэн шиг л өглөө эртээ эхэлдэг, нийслэл хотын өглөөний цай гэдэг хөдөлгөөн өрнүүлчихмээр юм байна. Эртэч улаанбаатарчууд бусад нийслэл хотынхон унтаж байхад, өглөөний цайгаа уудаг гэж дэлхийгээр нэг зарлуулж байхгүй юу. Тэгсэн цагт берлинчүүд шиг хэдэн ч цаг хэмнээд авч болно. Аа, бас тэгэхийн тулд Хотын захиргаа, Төрийн ордон хоёрыг л хамгаас түрүүн цонх нь гэрэлтдэг эртэч байшин болгох хэрэгтэй” гэх зэргээр өөрөө л би санаачлаад хамаг хүмүүсийг эртэч болгочих юм шиг, хэсэгтээ бодолхийлж байснаа, гэнэт сэхээрэв.

“Бас ч гэж, урд өмнөхөө бодвол арай л дээрдэж байна аа. Shangrila, CU гэх зэрэг хэд хэдэн газар лав өглөө эртээ үйлчилгээгээ эхэлдэг болчихсон байсан. Кофе, цайны зарим нэг газар ч онгойчихсон л харагддаг.” Ингэж хичнээн зөвтгөвч, Улаанбаатар минь өглөөд арай л унтаа оргиод байх шиг. Яах вэ ээ, басчиг гэж, автобус давхилддагаараа давхилдаж, машин тэрэг хөлхөлдөж, хүмүүс эртээ босчихсон гайгүй л гэсэн газраараа явган алхаж, эртэч хотын шинж орж л байна.

Ямар ч бол, өөдлөхөд санах сэрэх, уруудахад унтах мартах гэж өвгөд дээдэс минь сургаж ирснийг нэгэнтээ сануулах гэж, хэдхэн мөрөнд энэхэн хэдэн өгүүлбэрийг хэлхлээ, би.

До.Чулуунбаатар 

 

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.