Монгол хүн байгалийн жинхэнэ шалгарлаар яаж амьдарч явааг сайхан харуулж чаджээ

Twitter Print
2020 оны 02-р сар 18-нд 19:25 цагт
Мэдээний зураг,

Энэхүү киног Францууд хийж, харин Герман хэл дээр орчуулагдан, Германы ARTE суваг дээр гаргасан нь YouTube дээр тавигджээ.

Хөвсгөл аймгийн нэгэн сумын, багийн иргэн гэхээсээ илүүтэйгээр нэгэн Монгол хүн байгалийн жинхэнэ шалгарлаар яаж амьдарч явааг энэ баримтат кино сайхан харуулж чаджээ. 

Эмнэг адуу морь сургаж, бусдын алдсан адуу малны араас явж, барилдаж, өвөлдөө гахай агнаж, нийт малчин Монголчуудын адил ноос, ноолуурын цагаар мөнгө олж, амьдралаа залгуулж яваа залуу киноны гол баатар. Гэр бүл болж амжаагүй, ганц бие залуу бололтой, яагаад гэвэл ээж нь түүнд "бусад найз нөхдийнхөө адил одоо чи гэрлэж, эхнэр хүүхэдтэй болмоор юм" гэж хэлж, үглэж байна. Залуу хариуд нь "нутаг усны залуучууд ихэнх нь хот суурин газар бараадаж, нутаг ус маань эзгүйрэх аятай болж, нутаг усны ах дүүсдээ бараа болж, тус нэмэр болж амьдрахгүй бол болохгүй нь. Гэрлэж, амжихгүй нь ээ, завгүй ээ" гэх нь халаггүй ойлгогдлоо.  

Аргагүй л завгүй нь киноны үзүүлэх гээд байгаа гол сэдвээс харагдлаа. Малын хулгай. Тэр дотроо түүний хамгийн хайртай амьтан адуу, адууг нь хөрш зэргэлдээ тувачууд их хулгайлдаг юм байна. Түүний араас л явж, адуу малаа хамгаалах үүргийг энэ хүн өөрөө өөртөө оноож.

Малчид алдсан адуу морио зүслэн хэлж өгч, түүний араас нь мань хүн явна. Нэгэн цагаан морийг тэр эмээллэн унаж, эрэлдээ гарна. Явсаар шавар усанд унасан нэгэн морийг татаж гарган, нэг адууг олно. Уншигч Та цагаан морь гэдгийг энд нэг тогтоогоод, аваарай. Цааш явсаар хэсэг адуу хөтөлсөн хоёр ч хүнтэй таарна. Тэднийг хулгайчид гэж андууран, зодож зохисноос мань эр хэдэн сараар баривчлагджээ. Тэр хоёр хүн нь хулгайчид биш, харин адуу морь худалдаж, аваад хурим найранд явж байсан бөлгөө гэж байна. За ингээд мань нөхрийг баривчлагдсан үеэр кино хийгчид гэдрэг буцан, түүнийг суллагдах тэр үед тэрхүү Хөвсгөлийн нутагт дахин очжээ. Түүнийг баривчлагдсан үеэр мөн л нижгээд адуу мал алдагдаж. Бүүр түүний нөгөө цагаан морь ч алдагдаж.

Суллагдсан даруйдаа л мал төхөөрөх газраар явж, мөн малын арьс ширийг нягтлан нэг хэсэг явав. Юу ч олсонгүй. Харин мал нядалгааны газрын ажилтан нэгэн сайхан бүсгүй хутга ирлэн, инээд алдан зогсох тэр хэсэг... Хутга - бүсгүй хоёр, инээх - нядлах хоёр эсрэг тэсрэгийн туйл харагдав. Гэхдээ энэ бол баримтад кино. Бодит амьдрал, дүрх төрх гэсэн үг. Лавтай Францчууд хотоос нэг хүүхэн дагуулж ирээд, хөлсийг нь өгөөд хутга бариулаад, инээлгэж зургийг аваагүй байж таарна. Энэ нь киноны бас нэгэн хурц хэсэг “кадр“ байлаа. Өөрөөр хэлбэл тэрүүхэндээ киноны чимэг гэх үү.:)

Одоо киноны хамгийн гол хэсэг буюу манай “Цахиур Төмөр“, америкаар бол “Рамбо” маань алдагдсан адууныхаа араас явж буй хэсэг. Энэ бол үнэхээр зоригтой үйлдэл. Тэр бүр хүн ингэж явах уу гэж бодогдоно... Тэр эзгүй хээр, ой хөвч, өвлийн хүйтэн, өлмөн зэлмэн, бараг нимгэн нүцгэн шахуу, тэгээд бас тэр яахаас буцахгүй хулгайч тувануудын араас шүү. Магадгүй тэд зэвсэглэсэн байгаа.

Зам зуур хэсэг цаатан иргэд таарч, тэдний нэг мань нөхрийн хийморь үйлсийг нь тэнгэрт даатгаж, туслав. Мөн тэдний хэлснээр нилээд адуу малын мөр Оросын хил зүглэснийг хэлж, дамжуулж өгсөн болой.

Ойд нохой нь ямар нэгэн үнэр авснаар тэрээр төхөөрч, гаргасан адууны толгой, арьс шир олно. Хэсэг алхамын цаана түүний цагаан морины толгой, арьс мөн олдох нь тун ч харамсалтай. Цагаан морио эрэл хайгууль, хүнд хүчир гэмээр үед унадаг байж. Түүнийг ямар ч нөхцөлд хаяж байгаагүй итгэлт сайн хөлөг, сайн анд нь байжээ.

Монголчууд өөрийн сайн морио үгүй болоход толгойг нь наран ургах зүг, өндөрлөг дээр газар тавьж, дахин сайн төрлийг олох болтугай хэмээн ерөөдөг гэх заншилтай юм байна гэж гадаад хэлээр тайлбарлан “уншив”.

Тэрээр мод цавчин, мөн түүнийгээ галд ээж, матан цана хийж хөлдөө углах нь нэн сурамгай. Тэр өндөр уулнаас, тэр их мод мөчрийг сүлжин, салдаандаа ганц мод хавчуулан, түүгээрээ залуурдан сурамгай гулган уруудах нь юун тэр цанын салалом төрөл вэ.

Аз болоход мөрөөр нь мөшгөсөөр агтны хулгайч нарын яг араас ороод явчихав. Адууг нядлаж байна аа, тэд. Мань нөхөрт буу байгаа, сум байгаа. Болдог бол адууны дух руу сүх, лантуу зангаж байгаа тэр малын хулгайчийн гарыг тас буудмаар... Гэвч хулгайч ч гэсэн хүний амь, малын амьнаас дээгүүрт тавигдах юм даа. Залуу ч хүлээлээ. Хулгайчид малаа махлан, зарахаар явдаг юм байна. Харин үлдсэн адууг нь манай Монгол залуу нутаг руугаа эргүүлэн авчирч байна. Ерөнхийдөө кино маань ингээд дуусна.

Эцэст нь хэлэхэд Монгол хүний бусдаас ялгарах давуу онцлог талыг энэ кинонд яруу сайхан харуулж чаджээ. Бахархах сэтгэл өөрийн эрхгүй төрнө. Жинхэнэ Монгол хүн гэж энэ хүнийг хэлнэ дээ. Мөн кино эхлэхэд болон сүүл хэсгээр гадныхан манай орныг хүний гар хүрээгүй, сүүлийн үеийн хэллэгээр оригоороо үлдсэн дэлхийн ертөнцийн цөөн багахан хэсэг гэж тодорхойлж байх юм.

Тэр байгаль дэлхийн сайхныг хараад, Монголоо хайрлах сэтгэл улам буцлам. Та бүхэн энэ киног үзэж, Монголоороо цээж дүүрэн нэг амьсгалаарай. 

Юрагийн Шүрэнцэцэг

 

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.