Австралийн Засгийн газар ОХУ-ын ЭСЯ-ны барилгын ажлыг зогсоов

Twitter Print
2023 оны 06-р сар 26-нд 14:35 цагт
Мэдээний зураг,

Австралийн засгийн газар ОХУ-ын элчин сайдын яамны барилгын ажлыг зогсоожээ

Австралийн Дээд шүүх Австралийн нийслэл Канберра хотод Австралийн парламентын ордонтой ойр баригдаж байсан ОХУ-ын элчин сайдын яамны барилгын ажлыг Австралийн засгийн газраас зогсоосонтой холбоотойгоор ОХУ-ын талаас гаргасан гомдлыг хэрэгсэхгүй болгожээ.

Энэ сарын 15-нд Австралийн засгийн газар ОХУ-ын барьж буй элчин сайдын яамны шинээр баригдаж буй байр нь парламентын ордноос 400 м зайд байрлаж байгаа нь үндэсний аюулгүй байдлыг эрсдэлд оруулна гэж үзсэн юм.

Москва элчин сайдын шинэ яам барих газраа 2008 оноос түрээсэлж эхэлсэн ба 2011 онд элчин сайдын яамны шинэ байр барих зөвшөөрлөө авчээ.

Энэ сарын 15-нд Австралийн засгийн газар түрээс цуцлах тухай шинэ хуулийн төслийг яаран баталсан ба уг хуулийн дагуу ОХУ-ын элчин сайдын яамны шинэ барилга дээрх ажлыг зогсоожээ.

Уг шийдвэрийг танилцуулж байхдаа Австралийн  Ерөнхий сайд Энтони Албанез Австралийн Тагнуулын алба "оросууд парламентын ордонтой ойр байрлах нь аюулгүй байдлын ямар эрсдэл дагуулахыг маш ойлгомжтой тайлбарлаж өгсөн" гэдгийг онцолж байжээ.

Кремлийн хэвлэлийн төлөөлөгч Дмитрий Песков Австралийн засгийн газрын шийдвэрийг "барууны орнуудад ажиглагдаад буй Оросыг үзэн ядах хандлагын нэг жишээ" хэмээн мэдэгдсэн аж.

Шүүхэд өгсөн гомдолдоо Москва элчин сайдын яамны шинэ барилгын бүтээн байгуулалтанд хэдийн 8.2 сая австрали доллар зарцуулсан гэдгээ онцолсонч Австралийн шүүх ОХУ-ын гомдлыг "сул бөгөөд ойлгоход хэцүү" гэсэн дүгнэлт гаргажээ.

Ерөнхий сайд Э. Албанез ОХУ-аас хариу эсэргүүцэл илэрхийллээ ч хууль эрх зүйн талаас гаргасан санал гомдолд нь Австралийн засгийн газар санаа зовнихгүй байгаа хэмээн мэдэгджээ. Тэрээр, "ОХУ-ын хувьд хууль журам дагах тал дээр сайнгүй байгаа. Украин руу довтолж, олон улсын хууль журмыг ичгүүр сонжуургүй тогтмол байдлаар зөрчсөн тэд олон улсын хууль журам ярих эрхгүй гэж бодож байна." гэжээ.

 

Эх сурвалж: BBC

Содномцэрэнгийн Энхзаяа 

mongolcom.mn

 
Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.