Каринтинд өнгөрүүлж буй 14 хоног- Гурав дахь өдөр

Twitter Print
2020 оны 03-р сар 09-нд 09:46 цагт
Мэдээний зураг,

Каринтины гурав дахь өдөр өглөө эрт унтаж байхад гэнэт эмч нар орж ирээд оронд байхад халуун үзэв. Гэнэдүүлж байгаа юм уу хаашаа юм. Миний биеийн хэм 35.8 байлаа.

Гэрээсээ бас халууны шил захиж авчруулсан манай өрөөнийхөн бүгдээрээ. Өдөр бүр халуунаа давхар хэмжээд хяналтын хуудас дээрээ тэмдэглээд явдаг. Зөвлөмж хуудас дээр зөв мэдээллийг ямар мэдээллийн эх сурвалжаас авах ёстойг бичсэн байна лээ. Зургийг нь орууллаа. Та нар бас үзээд, хамаатан, найзууддаа түгээгээрэй. 

Хүйтэн өрөөнд хувцастайгаа, хөнжил, дэвсгэр давхарлаж байгаа ч тухтай дулаахан байж чадахгүй л байна. Шөнөжин бөөвийж унтсаар байгаад өглөө хамаг бие хөшөөд босч ирэх юм. Харин босоод халуун хоол, цай идэж уухаар биеийн жавар гараад сайхан болох юм. Хоолны чанар өдөр ирэх тусам сайжирсаар л байна. Өглөөний цайнд гоё бантан ирсэн. Бараг нэг амьсгаагаар уусан байх. Өдрийн хоолонд ногоотой шөл, гурван ширхэг мантуутай том бууз ирлээ. Халуун хоол идээд манай өрөөнийнхөн бүгд “урам зориг” ороод ус буцалгагчинд ус халаан бүгд үс, толгойгоо угаалаа.

Ganzorig Vanchig-н зураг.

Үс толгойгоо цэвэрлэсэн хүмүүс шууд эрдэм номын ажилдаа ордог юм байна. Өрөөний ах хүү Ногоон нүдэн ламыг уншиж эхлүүлж байна. Би юу дутах вэ гээд Анна Каренина уншиж эхэллээ. Ямар муухай хүнд эхэлдэг ном бэ? Номоо хурдан уншаад дуусчих вий гэж айгаад хавтаснаас нь авахуулаад бүх текстийг нэгийг ч алгасалгүй анхааралтай уншиж байгаа. Тухайлбал, хэн орчуулсан, хаана хэвлэсэн, ISBN код нь хэд юм, эхийг нь хэн бэлтгэсэн юм, уран сайхны редактор нь хэн байсан юм гээд л ... Гар утас энэ тэр гараагүй байхад 00 орохдоо хавийн шампунь тэргүүтний саван дээрх бүх текстийг хэлийг нь мэдэхгүй ч гэсэн казак мазакаар уншаад л тавьчихдаг байсан даг. Тэр нэг зан хаягдаагүй байгааг каринтинд ирээд анзаарав. 

Сониноос Юнителийн таньдаг залуу руугаа ярьж байгаа Юнивишнээ асааж авлаа. Ингээд манай өрөөнийхөн зурагттай боллоо. Ямартай ч цаг үеийн мэдээллээ дор бүр нь аваад байх боломжтой болсон. Мэдээгээр бидний тухай гарч байна лээ. Мань хэдийг зурагтаар ярьж байна гээд бас хөөрмөр аядаад байгаа юм аа. Энд даанч Мобиком, Юнителийн сүлжээ маш муу юм. 3G, 4G байхгүй Edge гараад дуудлага л хийж чадаж байна. Үе үе аль дээр явуулсан мессенжер, телеграм, вайберийн мессеж ирээд, зураг явахгүй, сошиал медиа орж болохгүй, имэйлээ ч шалгаж болохгүй юм. Уг нь интернэт байвал ажлыг ёстой умалзуулмаар байна. Гэснээс Юнителийн Гэр интернэт ирснээс хойш өдрийн тэмдэглэлүүд маань постоор орж эхэлсэн байгаа. Тиймээс энэ постын бичлэгүүд 3 хоногийн хоцрогдолтой яваад байгаа шүү. Яаж нөхдөг юм билээ? Нэг өдөрт хоёрыг оруулдаг юм уу хаашаа юм. Уншигч та бүхэн саналаа хэлээрэй. 

Ganzorig Vanchig-н зураг.

Чимээгүй орчинд ганцаараа байх үед үе үе галзуу санаа толгойд орох л юм. Юнителийнхэн гар утасны сүлжээ манайх байгаа нь л энэ гэдэг хариу өгсөн бол Мобиком руу холбогдоход техникийн албандаа хэлье, судалж үзээд таныг дата сүлжээтэй болгох шийдлийг судлая гэдэг хариу өглөө. Сайхан мэдээ дуулгаасай гээд залбираад сууж байна. Тог тасраад гэрийнхэнтэйгээ танилцлаа, аятайхан хүмүүс байдаг юм байна гэдэг шиг каринтинд байхдаа ойр хавийн хүмүүстэйгээ ярилцаад суусан эхнээсээ хамаатнууд болоод наадаг байна.  Монгол “балай” жижигхэн шүү. Ээжийн талтай холбоотой, ээжийн минь нутаг болох Хөвсгөл аймгаас гаралтай нэг хамаатнаа каринтинд баривчлан олж авлаа. Өрөөний хүмүүстэйгээ бизнес мизнес, хувьсгал мувьсгал гэх мэт жаахан глобал, том том юм ярьж байхгүй бол энэ янзаараа бол 2 долоо хоногийн дараа хавийн хүмүүстэй хамаатан, садан болоод дуусах юм шиг байна. "Валай" юм ккк.

Өрөө хүйтэн хэвээрээ. Настай хөгшин, жаахан хүүхэдтэй хүмүүсийг энд бол байлгахын аргагүй юм. Шууд зутраад, өвчин, ханиуд хуухнаа тусна. Гэрээс халаагуур авч ирье гэсэн чинь оруулахгүй гэнэ ээ. Яагаад гэвэл цахилгааны хүчдэл нь хүрэхгүй, бас даахгүй гээд тас хорьсон байна. Тэр бүү хэл зөөврийн компьютер гаднаас оруулахгүй гэсэн байна. Тог иднэ гээд байгаа бололтой. Хүч нь хүрэхгүй гээд байна уу, цахилгааны зардал их гарна гээд байна уу сайн учгийг нь олсонгүй. Миний ойлгосноор энэ байрны бүх өрөөнд бүх ороогүй байгаа. Өрөө 100 хувь дүүрвэл цахилгааны асуудалтай болох юм шиг байна. Тэгэхээр яаралтай, гэнэтийн үед бас л эвгүй, эрсдэлтэй байгаа биз? МИАТ-д ажилладаг найзын яриагаар Сеүл болон бусад газруудад хэдэн мянган Монголчууд орж ирж чадахгүй гацсан байгаа гэх. Тэд цувраад ирвэл бүгд каринтинд орно. Манай багтаамж, хүчин чадал бэлэн үү гэвэл асар том асуултын тэмдэг босч ирж байна.

Гаднаас эргэлтээр идэж уух төрлийн юм юу ч оруулахгүй гэж байсан бол одооноос ундаа, ус, боов шоов оруулж болно гэж хэлүүлж байна. Манай үндэсний үйлдвэрлэгчид энэ постыг уншиж байгаа бол нэг юм бодно буй заа:) Цагаар хоол идээд, огт хөдлөхгүй, өрөөнөөс ч гарахгүй байхаар дороо жин нэмэх шинжтэй. Яг адил хоол идэж байгаа юм чинь ядаж манай өрөөний 4 хүн адил хэмжээгээр жин нэмэх байлгүй гээд өөрийгөө тайвшруулаад сууж байна даг. Гэснээ сүү ирэхээ байсан гээд сүүлийн үед хар цай өгч байгаа. Тэр нь надад лав таалагдаж байгаа. Давстай хар цай. Хар цайгаа бол би хэзээ ч жон жон гэхгүй юм билээ ккк.

Манай өрөөний ах хүү өөрийгөө бүрэн тусгаарласан хэвээр л байгаа. Бараг цаг тутам маскаа сольж бидэнд гайхуулна, тусдаа аяга халбагатай, саван, ферри, 00-ийн цаас, сальфеткаа бидэнтэй хуваалцана аа гэж гонж. Үе үе чемоданаасаа чамин чамин гоё юм гаргаж ирнэ. Самар, хатаасан жимс, печень гээд л. Чемоданыхаа цаад буланд ерөөсөө гар хүрээгүй байгаа. Тэнд өшөө гоё юмнууд байгаа байх аа. Аандаа гаргах биз ээ хэхэ. Өрөөний тэр нэг буландаа ороо тойруулаад чемоданаараа цагаан хэрэм шиг хана бариад амьдрах нь ээ бүр ккк. Тун нямбай гоё ах байна аа. Хувийн сахилга бат, ариун цэврийг нь үнэхээр хүндэлж байна. Гэхдээ 14 хоног яг ингэж байхыг нь харна аа, I will see you bro ккк. Таны тухай бичиж байна шүү гэсэн чинь айн, зураг хөрөг, нэр ус гаргахгүй юм байгаа биз дээ гэнэ. Гаргахгүй ээ гэсэн чинь шилнийхээ дээгүүр тэгвэл одоо тэгэхээс дээ гээд жоготой мушийсан.

Ganzorig Vanchig-н зураг.

Ах хүү бас бясалгал хийгээд байх шиг байгаа юм. Маргаашнаас иог хийж эхлэнэ ээ ядаж орон дээрээ. Дээр явж байсан STAY иогийн клубын Маралаа багштайгаа утсаар холбогдоод иогийн хэдэн каринтинийн пооз заалгаж авъя даа энэ чинь доо. Хүмүүс л итгэдэггүй болохоос цагийн сайханд Марал багштай агаарын иог хүртэл хийж явав шүү дээ. Өрөөндөө өрсөлдөгчтэй байх нэг бодлын сайхан юм аа. Аягүй бол ах хүүтэй өрсөлдсөөр байгаад 6 pack болоод гараад ирэх вий каринтинаас.

Каринтинд өнгөрүүлсэн (Өнгөрүүлж буй) 14 хоног – Дөрөв дэх өдөр

Ganzorig Vanchig-н зураг.

Мөн л өглөө унтаж байхад эмч орж ирээд халуун үзлээ. Халуун хэвийн 36.4 хэм байлаа. Ингээд өдөрт хоёр удаа халуун үзэж эхэлж байгаа юм байна. Нэгэнт сэрсэн тул босоод сууж байтал өглөөний цай орж ирэв. Өвчүүтэй сүүтэй цай. Нэг айл цагаан сарын ууц, идээгээ хандивласан байна даа гээд манай өрөөнийхэн таав. Үгүй ээ улс зорьж худалдаж аваад бидэнд сэтгэл гарган гоё хоол хийсэн байж болно шүү бас.

Дандаа яах гэж юмыг ингэж боддог байна аа манайхаан (Манайхан гэдэгт би өөрөө орсон байгаа болно). Нэмээд манай өрөөний хүнд эргэлтээр ирсэн шар тостой, хачин сайхан зөөлхөн хэвийн боов. Хальт ширээ засаад дөрвүүлээ шинэлэхээ шахав. Гэхдээ бие биенээсээ сэжиглээд хамаагүй тэврэлдэж, үнсэлдэж барьж тэнэгтэхгүйгээ мэдээд байгаа юм аа ккк.

Гэснээс манай иогийн багш орондоо хийж болдог хэдэн пооз зааж өгсөн. Хүн харвал эвгүй болохоос биш тэр муу бэйби байрлалаас бусдыг нь нэг юм яаж ийж байгаад орон дээрээ ганцаараа нүүгэлтэж байгаад болгох л юм шиг байна. Зориулалтын иртүүз энэ тэр нь байхгүй болохоор өмд хамд, юм хум таталдаж унжралдаад бас мэргэжлийн төвшинд хийхэд тухгүй байна жигшиг ккк. Алийн болгон юм болгонд жон жон хийх вэ дээ Ганзориг оо чи гэж бодон Kapalbhati Pranayama бясалгалын амьсгалаа аван түгжээд, орныхоо баруун доод булангаас зүүн дээд булан руу иогийн гүүр байрлалаас үнээ байрлал руу зугуухан шилжлээ.

Каринтины хоол бол үнэхээр асуудал алга аа. Олон хоног жимс ногоо, загас жараахай идэж байсан хүнд монгол хоол шууд хүнддэж магадгүй ч чанартай сайхан хоолнууд өгч байна. Гэхдээ байр, өрөөний ариун цэврийн асуудал хүнд байна.

Ирээд ингээд 4 дэх хоног дээрээ ирж байхад манай өрөөний хогийг лав огт авсангүй, мөн ямар ч цэвэрлэгээ хийсэнгүй. Хоёр хогийн сав дүүрээд халиад, бид нэмж уутнууд гаргаад, хогоо аваач ээ гээд 2 хоног хэлээд сууж байгаа ч нэмэр алга. Уг нь өдөр бүр ариутгал, чийгтэй цэвэрлэгээ хиймээр юм. Арай ч 14 хоног ингэж явахгүй байлгүй гэж найдаж байна. Өөрсдөө өрөө, хаалга, 00-ийн өрөөгөө цэвэрлэсэн.

Цонх, хана тэр чигээрээ мөөгөнцөр. Энэ оруулсан зурагнаас хараарай. Заа тэгээд байгаа нөхцөл байдал нь л энэ юм аа, хөнжлийнхөө хэрээр хөлөө жийнэ дээ гээд л харсан ч хараагүй юм шиг л орондоо хэвтэж байна. Сэжигч хүн бол шууд өвдөхөөр. Мөөгөнцөрөө харахгүй гээд өдөр байсан ч гэсэн хөшгөө хаачихдаг юм хааяа.

Ganzorig Vanchig-н зураг.

Эхний өдрийн тэмдэглэл дээр бичсэн автобусны ариун цэврийн асуудал шиг өрөөний ариун цэвэр гэх мэт энэ зэргийн асуудлыг шийдэхэд уг нь ядах юмгүй дээ. Их мөнгө хөрөнгө ч хэрэггүй. Сэтгэл, ажил хэрэгч хандлага л хаа хаанаа жаахан жаахан дутаад байгаа нь хаа сайгүй мэдэгдэх юм аа. Ажил хариуцсан хүмүүс нь дор бүрнээ, шат болгондоо хариуцлагаа жаахан дээшлүүлбэл уг нь ядах юмгүй сүб гээд л босоод ирэхээр байна.

Ganzorig Vanchig-н зураг.

Гар утасны дата сүлжээ орохгүй хэвээр. Юнител руу дахин холбогдоход ямартаа ч хүндээ үүрэг өгсөн гэдгээ хэллээ. Харин Юнител амралтын газартай холбогдож манай байгаа өрөөний байрлалыг асууж, гэр интернэт оруулах боломжийг судлаж байгаагаа хэлэв. Мобиком руу дахин холбогдоход техникийн баг нь судалгаа хийж байгаа, удахгүй шийдлийг нь төсөвтэй нь гаргаад танилцуулах байх. Тэгээд бид шийднэ гэж байна. Нэг үеэ бодвол манай компаниудын үйлчилгээ, харилцагчийн стандарт мундаг болоод л байгаа шүү. Өнөө, маргаашнаас интернэттэй болчихвол гөө мөн их ажил хийх гээд байна даа уг нь.

Үдийн алдад өрөө яагаад цэвэрлэхгүй байсан учиг тайлагдав. Цэвэрлэгч нарын хамгаалалтын хувцас нь одоо хүртэл ирээгүй гэнэ ээ. Тийм учраас цэвэрлэгч манай өрөөнд орж ирж цэвэрлэгээ хийж чадахгүй байгаа юм байна. Тэгэхээр нь манай өрөөнийхөн цэвэрлэгээний материалыг нь аваад өөрсдөө өрөөгөө цэвэрлэв. Нэмээд хогны уут захиж аваад өөрсдөө хогоо уутлаад өгөөд явууллаа. Ирээд 4 хонож байхад одоо хүртэл гол хүмүүстээ хамгаалалтын хувцас энэ тэрийг нь өгөөгүй байна гэхээр бас л... Та нарын хувьд ч гэсэн өөрийн эрхгүй жон жон гэмээр л болж байгаа биз дээ. Уг нь төр засаг чадлаараа ажиллаад байгаа гэсэн юмсан. Бага биш хэмжээний хандив, мөнгө босоод л буй бололтой байсан. Зарцуулалт нь шилэн байж чадах юм болов уу? Маск, хамгаалалтын хувцсаар ажиглалтын цэг дээр байгаа хүмүүсээ хангаж чадахгүй байна гэж баймааргүй юм?! Эмч, цэвэрлэгч нар нь мань хэдээсээ сэжиглээд л, мань эд нь өрөө, 00, мөөгөнцөрөөс нь сэжиглээд л. Сүүлдээ хэн нь хэнээсээ сэжиглээд байгаагаа ч ойлгохоо байгаад хоорондоо холилдох нь. Юу гэж тайлбарлаж хэлмээр юм бэ дээ... Сүүлдээ одоо өөрөө өөрөөсөө сэжиглэж эхэлж байна ш дээ.

Харанхуй болсон байхад цагдаагийн хэдэн машин ирж урд байрны өмнө дохиогоо дуугарган, цагаан хоолойгоор баахан юм яриад загнаад байв. Ямар сенсаациас хоцорчихов гээд нөгөө муу орж ирдэг эмчийнхээ хэлийг нь сугалах шахуу асуусан чинь тэр байрны хэсэг залуус тавьсан шаардлага биелүүлэхгүй, тагтан дээрээ гарч сахилгагүйтсэн гэнэ. Цагдаа нар анхааруулга өгөөд, дахиж ингэвэл аймаар газар руу аваад явна шүү гээд явсан бололтой. Зарим залуусын тэвчээр нь алдраад каринтинийн дотоод журам зөрчиж эхэлж буй бололтой. Цагдаагийн хэдэн машин энд ингэж ирэхийг бодвол эмч нар маань үнэхээр удирдаж чадахаа байгаад цагдаа дуудсан байж таарах нь. Уг нь одоо хэдхэн хоног юу байх вэ дээ, тэвчихэд асуудалгүй дээ залуусын хувьд. Нөгөө бослого гаргахаар бужигнуулсан ах, эгч нарын мэдээ ikon сайтан дээр гарсан байв кккк. Манай өрөө, манай давхар, манай байрныхан шиг мөрөөрөө, даруухан, соёлтой каринтилж байгаа хүмүүс энэ хавьд алга дөө.

Ganzorig Vanchig-н зураг.

Гээд байж байтал Unitel гэр интернэт тань руу явуулсан шүү авсан уу гээд Юнителийн залуу мессеж бичээд, нэг их удалгүй өрөөнд оруулаад өглөө. Оруулж ирэх хооронд нь яагаад удаад байна аа, бусад өрөөнийхөн, эмч нар замаас нь дээрэмдчих вий дээ, дахиад залгаж асуух уу гээд тэрүүхэн тэндээ хэдхэн минутын дотор муухай сандралдав бидэн хэд. Цахилгаанд залгаад интернэтэд холбогдоод манай өрөөнийхөн бөөн баяр хөөр. Амьсгалаа түгжээд усанд шумбаж байгаад гарч ирээд цээж дүүрэн амьсгаа авдаг шиг л манай хэдийн сэтгэл санаа шууд update хийгдэнэ билээ. Ажлаа начигнуулна даа одоо.

Ажлынхандаа 100 грамм захисан чинь хөөрхий нэг гожгор юм аваад зургийг нь явуулсан байна. Даанч оруулж, хэрэглэж болохгүй юм билээ. Намайг “суллагдаад” гараад очтол бүү гар хүрээрэй, би очиж байгаад тэр хогийг заавал өөрийн гараар задлана гэдэг сүртэй лүндэн буулгаж өөрийнхөө санааг амраагаад хүйтэн хөгжилдөө хамраа шургуулаад унтахаар хэвтлээ.

Үргэлжлэл бий...

В.Ганзориг 

Холбоотой нийтлэлүүд: 

1. Каринтинд өнгөрүүлж буй 14 хоног - Эхний өдөр

2. Каринтинд өнгөрүүлж буй 14 хоног – Хоёр дахь өдөр

3. Карантинд өнгөрүүлж буй 14 хоног – Тав дахь өдөр

4. Каринтинд өнгөрүүлж буй 14 хоног - Зургаа дахь өдөр

5. Карантинд өнгөрүүлж буй 14 хоног – Долоо дахь өдөр

6. Карантинд өнгөрүүлж буй 14 хоног – Найм дахь өдөр

7. Каринтинд өнгөрүүлж буй 14 хоног - Ес дэх өдөр 

8. Каринтинд өнгөрүүлж буй 14 хоног - 10, 11 дэх өдөр 

9. Каринтинд өнгөрүүлж буй 14 хоног - Арванхоёр дахь өдөр

10. Карантинд өнгөрүүлж буй 14 хоног – Арвангурав дахь өдөр 

11. Карантинд өнгөрүүлсэн (Өнгөрүүлж буй) 14 хоног – Арвандөрөв дэх өдөр

12. Карантинд өнгөрүүлсэн (Өнгөрүүлж буй) 14 хоног – Сүүлийн өдөр буюу 15 дахь өдрийн өглөө

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.