Азовсталь үйлдвэрт байсан Украины цэргүүдийн хувь заяа тодорхойгүй байна

Twitter Print
2022 оны 05-р сар 18-нд 11:01 цагт
Мэдээний зураг,

Украины Мариуполь боомт хот дахь Азовсталь гангийн үйлдвэрт байрлаж, ОХУ-ын зэвсэгт хүчний эсрэг эсэргүүцэл үзүүлж байсан цэргүүдийг өнгөрсөн даваа гарагт Оросыг дэмжигч Украины салан тусгаарлагчдын хяналтанд байгаа хотууд руу нүүлгэн шилжүүлсэн билээ.

Украины Батлан хамгаалахын орлогч сайд Ханна Маляр цэргүүдээ Оросын талаас хоригдол солилцох тохиролцооны дагуу авна гэж мэдэгдсэн ч ОХУ-ын зарим албан тушаалтнууд тэдгээр цэргүүдийг шүүж, цаазаар авах ял оноож ч болзошгүй талаар дурджээ.

ОХУ-ын хууль сахиулагчид Азовсталь үйлдвэрт байсан Украины цэргүүдээс байцаалт авч, "Украины зүүн өмнөд бүс нутагт амьдардаг энгийн иргэдийн эсрэг Украины дэглэмийн үйлдсэн гэмт хэрэг" гэсэн үндэслэлээр ял оноохоор төлөвлөжээ.

Орон нутгийн цагаар мягмар гарагийн орой Азовстальд байсан цэргүүдийг тээвэрлэсэн 7 автобус Донецк мужийн Оленивка хотод байрлах хуучин засан хүмүүжүүлэх төв байсан байранд хүргэж ирсэн талаар Ройтерс агентлаг мэдээлсэн билээ. ОХУ-ын тал Азовстальд байсан цэргүүд бууж өгсөн хэмээн мэдэгдсэн бол Украины тал үйлдвэрт байсан цэргүүд "байлдааны даалгавраа гүйцэтгэж дууссан", дараагийн гол зорилго бол цэргүүдийнхээ амийг аврах юм хэмээн мэдэгдсэн билээ.

Азовсталь үйлдвэрээс нүүлгэн шилжүүлсэн 265 цэргүүдийн дийлэнх нь шархдаж, гэмтэж бэртсэн байсан ба хүнд шархтай 51 цэргийг Новоазовск хотын эмнэлэгт хүргэжээ.

ОХУ-ын Ерөнхийлөгч Владимир Путины хэвлэлийн нарийн бичгийн дарга Дмитрий Песков Азовсталь үйлдвэрт байсан цэргүүдэд Оросын зүгээс "олон улсын стандартад заасны дагуу" хандах болно хэмээн мэдэгдсэний дараахан Оросын Думын гишүүн Леонид Слуцкий Азовсталь үйлдвэрт байсан цэргүүдийг "хүн дүрстэй адгууснууд" хэмээн тодорхойлж, цаазын ялаа сэргээх ёстой хэмээн онцолжээ.

Нөгөө талаас Думын спикер Вячеслав Володин Азовстальд байсан цэргүүдийг нацистууд мөн дайны гэмт хэрэгтнүүд гэж тодорхойлон, заавал шүүхээр оруулах ёстой хэмээн мэдэгдсэн байна.

Өнгөрсөн мягмар гарагт ОХУ-ын Хууль зүйн яам Оросын Дээд шүүхээс Украины зэвсэгт хүчний "Азов" тусгай ангийг алан хядах бүлэглэлээр зарлахыг хүссэн нь Украины цэргүүдийг алан хядагчид гэсэн үндэслэлээр шүүх, хоригдол солилцох үйл явцыг сунжруулах гэсэн оролдлого хэмээн ажиглагчид харж байна.

Эх сурвалж: Reuters

Содномцэрэнгийн Энхзаяа

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.