Хог хаягдал боловсруулж эрчим хүч үйлдвэрлэх төсөл дээр Австри улстай хамтран ажиллана

Twitter Print
2014 оны 11-р сар 05-нд 15:06 цагт
Мэдээний зураг,

Нийслэлийн Засаг Дарга бөгөөд Улаанбаатар хотын захирагч Э.Бат-Үүл Австри улсаас Бээжинд Монгол Улсын хэргийг хавсран суугаа онц бөгөөд бүрэн эрхт элчин сайд Ирене Гинер Райхл болон бусад албаны хүмүүсийг хүлээн авч уулзлаа. Уулзалтаар Улаанбаатар хотын хог хаягдлыг боловсруулан эрчим хүч үйлдвэрлэх төсөлд тавих шаардлага, өнөөгийн хог хаягдлын менежментийн байдал, цаашид төлөвлөж байгаа шинэ үйл ажиллагаа, хотын дулаан болон цахилгааныг төв шугаманд оруулахаар төлөвлөж байгаа ажлын талаар санал солилцлоо.

Нийслэлийн Засаг даргын 2013-2016 оны үйл ажиллагааны мөрийн хөтөлбөрт хотын хог хаягдлын менежментийг сайжруулах хөтөлбөрийг хэрэгжүүлж, 2-оос доошгүй хог хаягдал дахин боловсруулах үйлдвэр байгуулахаар тусгагдсан. 

Үүний дагуу Нарангийн энгэр, Морингийн даваа, Цагаан давааны төвлөрсөн хогийн цэгт өдөрт 2000-2500 тн ахуйн хог хаягдлыг хүлээн авч, дарж устгах үйл ажиллагааг өдөр бүр ландфил технологийн дагуу хийж байна. Мөн хуурай хог хаягдал, цэвэрлэх байгууламжийн лаг, хүнсний, эмнэлгийн, үйлдвэрийн, газрын тосны гаралтай, газар тариалангийн хог хаягдлыг ашиглан өндөр температурын хийжүүлэх технологиор түлш, эрчим хүч үйлдвэрлэх төслийг хэрэгжүүлж, Австри улстай хамтран ажиллана.

Уулзалтын үеэр Нийслэлийн Засаг Дарга “Австри улс бол техник технологоороо тэргүүлдэг орон. Улаанбаатар хотын хог хаягдлыг боловсруулах үйлдвэрт сайн чанарын техник технологи ашиглах шаардлагатай. Үүнийгээ дагаад өртөг их өндөртэй. Тийм ч учраас Австри улстай хамтран ажиллах хүсэлтэй байна” гэлээ. Харин хатагтай Ирене Улаанбаатар хоттой хамтран ажиллахад бэлэн байгаагаа хэллээ.

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.