УИХ-ын гишүүн Д.Зоригт: Манай намын долоон гишүүн үл мэдэгдэх шалтгаанаар ирсэнгүй

Twitter Print
2014 оны 11-р сар 05-нд 14:58 цагт
Мэдээний зураг,

УИХ-ын өнөөдрийн хуралдаанаар Ерөнхий сайдыг огцруулах асуудлыг хэлэлцэж, олонхийн буюу 54.5 хувийн саналаар Ерөнхий сайд Н.Алтанхуягийг огцрууллаа. Ингэснээр Засгийн газрын кабинет бүрэн бүрэлдэхүүнээрээ огцрохоор боллоо. Чуулганы нэгдсэн хуралдаанд УИХ дахь АН-ын бүлгийн гишүүд бүрэн ирцтэйгээр ирээгүйгээс ийнхүү Засгийн газар огцрохоор болж байна. Үүнтэй холбоотойгоор УИХ дахь МАН-ын бүлгийн гишүүн Д.Зоригтоос цөөн асуултад хариулт авлаа.

-Ерөнхий сайд Н.Алтанхуягийг огцруулах асуудал яригдаж байгаа үед намын бүлэг бүрэн ирцээ хангаж чадаагүйгээс Засгийн газар огцрохоор боллоо. Тэгэхээр ирцээ бүрдүүлээгүй гишүүдэд намын зүгээс ямар хариуцлага тооцох вэ?

-Засгийн газрын тэргүүнийг огцруулах тухай асуудал яригдаж байгаа үед намын гишүүд ирцээ бүрэлдүүлж ирээгүй тохиолдолд намаас хасах дүрмийн заалттай.

-Танай намын “Шонхор” фракцийн гишүүд үндсэндээ ирсэнгүй?

-Манайхаас долоон хүн ирсэнгүй.

-Өмнө нь энэ хүмүүс ямар нэгэн тайлбар, байр сууриа намын бүлгийн хурал дээр хэлсэн байсан уу?

-Өчигдөр гэхэд энэ хүмүүсийн нэлээд нь Засгийн газраа авч үлдэнэ гэж байсан. Өнөөдөр үл ойлгогдох, бидэнд мэдэгдэхгүй шалтгаанаар долуулаа ирсэнгүй.

-Шинэ Засгийн газрыг удахгүй бүрдүүлэх ёстой. Цаг хугацааны хувьд хуулиараа хэрхэн зохицуулагдах вэ?

-14 хоногийн хугацаанд шинэ Засгийн газрыг бүрдүүлэх ёстой.

-Засгийн газрынхээ эсрэг кноп дарсан гишүүдэд хариуцлага тооцож, намаас хөөх талаар яригдаж байсан?

-Манай намын дүрмэнд хариуцлага тооцох заалт байгаа. Намаас хөөх асуудлыг энд шийдэхгүй. Намын хяналтын зөвлөлийн шийдвэр гарна.

-Дараагийн Засгийн газрын хувьд намууд зөвшилцлийн ширээний ард суух хэрэгтэй гэдгийг УИХ дахь МАН-ын бүлгийн гишүүд хэлж байсан. Тэгэхээр зөвшилцлийн ямар хувилбар байж болох вэ?

-Улс орны эдийн засаг, нийгмийн байдал амаргүй байна. Ийм үед парламентад суудалтай намууд зөвшилцөж таарах байх. Яриа хөөрөө эхлэх байх.

-2015 оны төсвийг УИХ арваннэгдүгээр сарын 15 гэхэд батлах ёстой. Энэ хугацаандаа амжих боломжтой юу. Нэгэнт Засгийн газар огцрохоор болсон тохиолдолд, энэ асуудлыг хэрхэн шийдвэрлэх вэ?

-Үүнийг баталж чадах байх. Ерөнхий сайд, Засгийн газар огцорчихлоо. Гэхдээ сая үүрэг гүйцэтгэх хүмүүсийг томилсон. Тэгэхээр Шадар сайд ахлаад, төсвөө батлуулах байх.

-Энэ Засгийн газрын бүтцээр төсвийг батлах нь байна. Гэтэл дараагийн Засгийн газрын бүтэц, бүрэлдэхүүн өөрчлөгдөнө шүү дээ?

-Тэгэхээр төсөвт тодотгол хийгдэнэ гэсэн үг. 

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.