Ардчилсан засгаар оролдвол ард түмэн л ёолж үлдэнэ

Twitter Print
2014 оны 11-р сар 04-нд 16:20 цагт
Мэдээний зураг,

Ардчилсан Засгийн газрыг ахиад л дэнжигнүүлээд эхлэв. Шинэчлэлийн хэмээх тодотголтой Н.Алтанхуягийн Засгийн газрыг огцруулах гэж сөрөг хүчний зүгээс идэвхийлэн зүтгэж унагаах гээд байгаа нь улс төрийн алхаагаа тушуулж орхисон МАН-ын хувьд том оноо болох юм. Энэ нь тэд нарын цагааныг хар хэмээн шууд итгүүлдэг, гөрддөг, хэт увайгүй технологийнх нь хэрэгжилт байдаг хойно гайхаад хэрэггүй.

Уг нь тэд үнэхээр эх орончид, иргэдийнхээ зовсон ясны янгинахыг 75 жил сонссоор ирсэн нь (тэд ийнхүү зөрүүдлэн баталцгаадаг) үнэн юм бол үндэсний эрх ашгаа өмнөө тавьж, нудрана түлхэнэ, нулимна, солино гэхгүй л байсан байх. Засгийн газрыг л огцруулж орхивол бүх зүйл уялдаа холбоотой болж, улс орон хөгждөг бол яая гэх вэ. Өдөр бүр огцруулаад байж болно. Хамгийн эмгэнэлтэй нь сонгогчдын итгэл үнэмшил үнс мэт бүрзийж, гагцхүү ард түмэн л горыг нь амсдаг. Дээл малгайгаа солигчдын хувьд хохирох юмгүй. Харин гүрийж сонгосон сонгогчдын эрх ашиг элдэв нам, фракцуудын гялгар гутлын тоосонд ёолсоор үлддэг.

Эдүгээ Шинэчлэлийн Засгийн газарт улс оронд болохгүй бүх хатуу хөтүүг үүрүүлж байна. Нэг аж ахуйн нэгжийн дотоод үйл ажиллагаанаас болж бий болсон сөрөг үзэгдлийг шууд л аваачаад хүзүүнд нь пайз зүүн ялтан мэтээр дээр нь эрээчдэг боллоо. Нөхөр Самдан эрэг боолтоо дутуу чангалж техникээ эвдэн ажил зогсвол энэ Засгийн газрыг шууд хараадаг болов. Үүнийгээ соёлтойгоор улс төр хийх гэцгээнэ.

Дэлхийн эдийн засгийн хямрал болж, хямрал, хүндрэлтэй үед Засгийн газар л хамгийн их тогтвортой байх нь аминаас илүү чухал гэдгийг сонгогчид ойлгоод байхад “огцор” хэмээн гараа гозолзуулж, цагтаа давхар дээлийг урт гэгчийн бүсээр ороож явсан нөхдүүд лоозогнох юм. Эдийн засаг хүндрээд ирэнгүүт буруутанг хамгийн эхэнд тодруулах нь уламжлал болсон зүйл. Яг одоо энэ буруутан нь Шинэчлэлийн Засгийн газар байж таарлаа. Дараагийн сонгуульд гарах гэсэн л улайрал. АН дараа нь ямар засгаа бүрдүүлнэ, түүнийг унагаад байх нь л чухал.

Гэхдээ 1996-2000 оны хэрэг явдал давтагдвал улс төрийн хамгийн том хожигч хэн байх вэ. Үүнийг АН-ын доторхи фракцууд мэдэж байгаа ч “Эрэл”, ИЗН, Иргэний хөдөлгөөний нам зэргээс орж ирсэн нөгөө дүлзэнгүүд болохоор ойлгохгүй, ямартай ч ардчилсан намыг засаг барьж эхлэнгүүт унагадаг, ямар ч үнээр хамаагүй онхолдуулдаг тэдний тоглолт ширүүсч эхлэх нь. Эцэстээ тэдний хувьд айхтар хожоотой л гардаг. Ард түмний эрх ашиг болоод буй энэ үед АН-ын дарга Н.Алтанхуягийн фракциудын доторх зөрчлийг аль болох зохицуулах оролдлого нь эдийн засгийн бодлогоо гартаа авахтай нь гал ус шиг харшлахгүй байх учиртай. Уг нь Н.Алтанхуяг шиг намын дарга байх үедээ сонгуульд удаа дараалан ялалт авчирсан лидер АН-д үнэндээ алга. Ерөнхийлөгчийн хоёр удаагийн, УИХ-ын болон орон нутгийн сонгуульд АН анх удаа ялалт байгуулсан нь энэ хүнтэй холбоотой.

Эдийн засгийн өөрчлөлт удаан хугацаанд явагддаг, үүний адил цар хүрээтэй стратеги, төлөвлөлт шаарддаг, үүндээ хүрэхэд улс төрийн амаргүй сорилтуудыг амсах болдог. Ер нь ийм хүн бол та өөрөө юм, асуудлыг гартаа ав болохгүйг нь засч залруул гээд Ерөнхийлөгч маань Ерөнхий сайдад шууд хэлчихсэн болохоор АН-ынханд өөр сонголт байх учиргүй. УИХ-ын гишүүд ч гэсэн нам, фракцынхаа зовлонгоо мартагнаж нийт ард түмнийхээ эрх ашгийг хамгаална гэсэн Үндсэн хуулийн заалтыг мөрдчих л дөө. Энэ засгийг оролдвол эцэстээ ард түмэн л ёолж үлдэнэ шүү.

www.mongolcom.mn

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.