Өнөөдрөөс хилээ нээж буй АНУ Спутник вакцинтай иргэдийг хилээр нэвтрүүлэхгүй

Twitter Print
2021 оны 11-р сар 08-нд 14:05 цагт
Мэдээний зураг,

Коронавирусын цар тахал эхэлснээс хойш АНУ олон улсын нислэгүүдэд хориг тавьсан билээ. Тэгвэл өнөөдрөөс эхлэн Вашингтон уг хоригоо цуцалж, олон улсын нислэгүүд хүлээж авч эхлэхтэй холбоотойгоор АНУ руу зорчиж буй иргэдэд зориулж журам гаргажээ.

Коронавирусын цар тахал эхэлснээс хойш тухайн үед АНУ-ын Ерөнхийлөгч байсан Доналд Трамп Бразил, БНХАУ, Өмнөд Африк, Их Британи, Ирланд, Энэтхэг, Иран болон Шенгений 26 орноос нислэг хүлээн авахыг хориглосон юм.

2021 оны 1-р сард томилогдсоныхоо дараа Жо Байден уг хоригийг сунгасан ба Америкийн аялал жуулчлалын салбарт үйл ажиллагаа явуулдаг компаниуд олон улсын нислэгүүдэд тавьсан хоригийг цуцлахыг шаардсаар байсан юм.

Олон улсын нислэгээр АНУ руу зорчиж буй иргэдэд АНУ-ын талаас коронавирусын эсрэг вакцинд бүрэн хамрагдсан байх ёстой гэсэн шаардлага тавьж байгаа аж. 

Ерөнхийлөгч Жо Байдений гаргасан шийдвэрийн дагуу агаарын тээврийн компаниуд зорчигчдыг онгоцонд суулгахаасаа өмнө коронавирусын эсрэг вакцинд хамрагдсан эсэхийг нь шалгах ёстой аж.

Түүнээс гадна агаарын тээврийн компаниуд зорчигч нь вакцины гэрчилгээгээ албан ёсны байгууллагаас авсан эсэхийг шалгаж, зорчигч вакцины гэрчилгээгээ онгоцонд суухаас багадаа 2 долоо хоногийн өмнө авсан байх ёстой гэж заажээ.

Мөн зорчигчийн хамрагдсан коронавирусын эсрэг вакцин нь АНУ-ын Хүнс ба Эмийн хяналтын албанаас зөвшөөрөгдсөн байх ёстой аж. Иймд Вероселл, Файзер болон Астра Зенека вакцинуудыг хүлээн зөвшөөрнө. Харин ДЭМБ-ын албан ёсны зөвшөөрөлгүй тул Оросын Спутник вакцинтай иргэдийг хилээр нэвтрүүлэхгүй юм байна.

Харин вакцинд хамрагдаагүй гадаадын төдийгүй дотоодын зорчигчид онгоцонд суух өдрөө коронавирусын шинжилгээнд хамрагдаж, коронавирусын халдваргүй гэсэн бичгээ үзүүлэх ёстой аж.

АНУ хилээ нээхтэй холбогдуулан АНУ-Мексикийн хилд цагаачлалын хямрал үүсч мэдэхээр болоод байна. Жо Байден энэ оны эхээр АНУ-ын ерөнхийлөгчийн албан тушаалыг авсан даруйдаа өмнөх ерөнхийлөгч Дональд Трампаас илүү хүмүүнлэг цагаачлалын бодлого явуулах амлалтыг өгч байв. Гэвч өнөөдөр АНУ-ын ард иргэд Байдены цагаачлалын бодлогыг эрс буруушааж, хилийн хямралд хүргэсэн гэж үзэж буй. Тодруулбал, АНУ сүүлийн 12 сарын хугацаанд Мексиктэй хиллэдэг хилийн дагуу 1.7 сая гаруй цагаачийг саатуулсан нь түүхэн дэх хамгийн өндөр үзүүлэлт болжээ.

Энэ байдал АНУ, Мексик хоёр улсын хилийг дахин нээхээр болсныг мэдэгдсэний дараа улам дордох төлөвтэй байна. Хил нээх чимээг сонссон олон зуун цагаач АНУ-аас орогнол хүсэх итгэл найдвар өвөртлөн Мексикийн Тихуана зэрэг хилийн хотуудыг зорьж байгаа юм. "Covid-19"-ийн нөхцөл байдалтай холбоотойгоор 20 сарын турш хаалттай байсан хоёр улсын хил өнөөдрөөс мөн нээгдэж буй.

АНУ-Мексикийн хил нээгдэхээр болсныг аравдугаар сарын 15-нд зарласнаас хойш тус хоргодох байранд байрлах цагаачдын тоо гуравны нэгээр нэмэгдсэн байна. Тихуана дахь олон цагаач Мексик улсын Мичоакан, Герреро зэрэг мужуудад гарч буй хүчирхийллээс зугтаж ирсэн гэжээ. Мөн Даваа гаригт хил нээгдсэн даруйд орогнол хүсэхээр хил нэвтрэхийг зорьж байгаа аж.

Эх сурвалж: BBC

Содномцэрэнгийн Энхзаяа 

mongolcom.mn

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.