Foxconn компанийг үүсгэн байгуулагч Тайванийн Ерөнхийлөгчид нэр дэвшинэ

Twitter Print
2023 оны 08-р сар 29-нд 13:30 цагт
Мэдээний зураг,

Apple компанийн iPhone гар утсыг үйлдвэрлэгч Foxconn компанийг үүсгэн байгуулагч Терри Гу Тайванийн Ерөнхийлөгчийн сонгуульд бие даан нэр дэвших болсноо зарлажээ. Өнгөрсөн даваа гарагт хийсэн хэвлэлийн бага хурлын үеэр Терри Гу, "Миний бие 2024 оны ерөнхийлөгчийн сонгуульд өрсөлдөхөөр шийдлээ. Та бүхний надад өгөх 4 жилийн хугацаанд би Тайванийн хоолойд 50 жил энх тайван тогтооно... Тайвань Украин болох ёсгүй, би Тайванийг дараагийн Украин болгохын зөвшөөрөхгүй." хэмээн мэдэгджээ.

Терри Гу Тайванийн ерөнхийлөгчийн сонгуульд бие даагчаар нэрээ дэвшүүлэхийн тулд ирэх 11-р сарын эхэн гэхэд 290 мянган гарын үсэг цуглуулсан байх ёстой аж. Даваа гарагт хийсэн хэвлэлийн бага хурлынхаа үеэр Терри Гу Тайванийн Ерөнхийлөгч Цай Ин Вэний Ардчилсан Дэвшилтэт намыг биеэ тоосон, авлига хээл хахуульд баригдсан хэмээн тодорхойлж, "Ардчилсан дэвшилтэт нам төрийн эрхэнд гарснаасаа хойш сүүлийн 7 жилийн хугацаанд Тайванийг дайны аюул руу хөтөлсөөр байна. Тус намын бодлогууд алдаа дутагдлаар дүүрсэн." хэмээн онцолсон байна.

Тайванийг Хятадын нэг хэсэг хэмээн үздэг Бээжин 2016 онд Тайванийн ерөнхийлөгчийн сонгуульд Цай Ин Вэн ялалт байгуулснаас хойш Тайваньтай харилцаагаа тасалсан юм. Си Жиньпин Хятадын төрийн тэргүүнээр томилогдсоноос хойш Хятадын Тайванийн хоолойд явуулах цэргийн үйл ажиллагаа эрчимжсэн билээ.

Өнгөрсөн бямба гарагт Хятадын арми Тайвань арлыг бүсчлэн эзлэх хээрийн сургуулилт явуулсан ба уг сургуулилтанд байлдааны 32 нисэх онгоц, 9 хөлөг онгоцноос гадна дрон, сөнөөгч онгоц, бөмбөгдөгч онгоц, тагнуулын онгоцнууд оролцсон байна.

Хамгийн сүүлийн судалгаагаар Тайванийн ерөнхийлөгчийн сонгуульд Ардчилсан дэвшилтэт намаас нэр дэвшиж байгаа Тайванийн дэд ерөнхийлөгч Лай Чин Тэ рейтингээрээ бусад нэр дэвшигчид болох Шинэ Тайбэй хотын дарга Хоу, Тайбэй хотын дарга асан Ко Вэн Жэ нараас түрүүлж байна.

Терри Гоу Ардчилсан дэвшилтэт намын эсрэг эвсэл байгуулахыг уриалж байгаа ч ажиглагчдын үзэж байгаагаар Терри Гу нэр дэвшсэнээр сонгуульд нэр дэвшигчдийн авах санал хуваагдах нь гарцаагүй бөгөөд үүнээс хамгийн их хожих нь Ардчилсан дэвшилтэт намаас нэр дэвшигч Лай Чин Тэ байх аж.

Эх сурвалж:  The Guardian

Содномцэрэнгийн Энхзаяа

mongolcom.mn

 
Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.