ДЭМБ: Коронавирусын цар тахал 2022 онд ч үргэлжлэх төлөвтэй байна

Twitter Print
2021 оны 10-р сар 21-нд 12:32 цагт
Мэдээний зураг,

Орлого багатай, ядуу улс орнууд коронавирусын эсрэг вакцины хомстолд орсон учраас коронавирусын цар тахал дахин нэг жил үргэлжлэх төлөвтэй байна хэмээн ДЭМБ-аас анхааруулж байна. ДЭМБ-ын ахлах мэргэжилтнүүдийн нэг Брюс Эйлвард коронавирусын цар тахал 2022 онд ч үргэлжлэх эрсдэлтэй байгааг онцлон, өндөр хөгжилтэй, баян орнуудыг коронавирусын эсрэг вакцин авах дарааллаа ядуу буурай орнуудтай солихыг уриалсан байна.

Ингэснээр коронавирусын эсрэг вакцин үйлдвэрлэгчид орлого багатай орнуудад түрүүлж коронавирусын эсрэг вакцин нийлүүлэх аж. Африк тивийн нийт хүн амын 5 хүрэхгүй хувь нь л коронавирусын эсрэг вакцинд хамрагдсан бол бусад тивүүдэд хүн амынх нь 40 орчим хувь нь коронавирусын эсрэг вакцинд хамрагдаад байна. Брюс Эйлвардын хэлж байгаагаар баян чинээлэг улс орнууд коронавирусын эсрэг вакцин хандивлах тал дээр өгсөн амлалтуудаа санаж, дүгнэлт хийх хэрэгтэй аж.

The People's Vaccine олон улсын тусламжийн байгууллагуудын холбооноос хийсэн судалгаагаар эмийн компаниуд болон баян орнуудын ядуу орнуудад хандивлана гэж амласан коронавирусын вакцины нийт тунгийн 1/7 нь л хүрэх ёстой газраа очжээ. Үйлдвэрээс гарсан коронавирусын эсрэг вакцинуудын дийлэнхийг нь орлого өндөртэй, дундаас дээгүүр орлоготой орнууд авсан байна.

Мөн улс орнуудад хийгдсэн коронавирусын эсрэг вакцины нийт тунгийн 2.6 хувь нь л Африк тивд хийгджээ. Оксфам, ЮНЭйдс зэрэг байгууллагууд Канад, Их Британи зэрэг улс орнууд коронавирусын эсрэг вакцины хүртээмжийг нэмэгдүүлэх, вакциныг улс орнуудад эрх тэгш хуваарилах зорилготой НҮБ-ын дэмжлэгтэй хэрэгжиж буй КОВАКС хөтөлбөрөөр дамжуулан коронавирусын эсрэг вакцин авч буйг буруушааж байна.

Энэ оны эхэнд л гэхэд Их Британи КОВАКС хөтөлбөрийн дагуу Pfizer компанийн 539 370 тун вакцин хүлээн авсан бол Канад улс AstraZeneca компанийн 1 сая орчим тун вакциныг хүлээн авчээ.

Канад, Их Британи зэрэг өндөр хөгжилтэй улс орнууд эмийн компаниудтай хийсэн гэрээ хэлэлцээрийнхээ дагуу коронавирусын эсрэг вакцин худалдан авч байгаа ба давхар КОВАКС хөтөлбөрөөр дамжуулан вакцин авч байгаа нь "ёс зүйгүй" ба үүний улмаас ядуу орнууд коронавирусын эсрэг вакцинд хүн амаа хамруулж чадахгүй байна хэмээн мэргэжилтнүүд үзэж байна.

Их Британийн засгийн газрын зүгээс КОВАКС хөтөлбөрийг анх тус улс санаачилсан болохыг сануулж, хөтөлбөрт 548 сая фунт стерлинг хандивласан болохыг онцолсон бол Канад улс КОВАКС хөтөлбөрийн хүрээнд хүлээж авсан вакцинуудыг иргэддээ хийхээ зогсоосон хэмээн мэдэгджээ.

Канадын эрх баригчдын мэдээлснээр тус улсын хүн амын дийлэнх хувь нь коронавирусын эсрэг вакцинд хамрагдсан даруйд Канад улс КОВАКС хөтөлбөрийн хүрээнд хүлээж авсан вакцинуудаа эргүүлэн КОВАКС хөтөлбөртөө өгснөөр тэдгээр вакцинууд шаардлагатай улс орнууддаа очих аж.

КОВАКС хөтөлбөрийн дагуу энэ оны сүүл гэхэд улс орнуудад коронавирусын эсрэг вакцины 2 тэрбум тунг нийлүүлэх зорилт тавьсан ч өнөөдрийн байдлаар 371 сая тунг нийлүүлээд байна.

Эх сурвалж: BBC

Содномцэрэнгийн Энхзаяа 

mongolcom.mn

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.