
ОХУ АНУ-ын Вашингтон хотод суугаа элчин Анатолий Антоновыг Москва руу эгүүлэн татах шийдвэр гаргажээ. Оросын эрх баригчдын онцолж байгаагаар хоёр улсын харилцаа мухардалд орсон ба Вашингтонд суугаа элчин сайдаа эгүүлэн татах нь хоёр улсын харилцаа "эргэлт буцалтгүй муудах" - аас сэргийлсэн алхам аж.
Өнгөрсөн мягмар гарагт АНУ-ын Тагнуулын алба 2020 оны АНУ-ын Ерөнхийлөгчийн сонгуульд хөндлөнгөөс нөлөөлөх гэж оролдсон улс орнуудын тухай мэдээллийг олон нийтэд ил болгосон юм. Тагнуулын албанаас хийсэн шалгалтаар Америкийн Ерөнхийлөгчийн сонгуульд ОХУ-ын засгийн газраас нөлөөлөхийг оролдсон ба үүний цаана ОХУ-ын Ерөнхийлөгч Владимир Путин байгаа болохыг тогтоосон гэжээ. Тэгвэл өнгөрсөн лхагва гарагт АНУ-ын Ерөнхийлөгч Жо Байден ABC News сувагт өгсөн ярилцлагадаа ОХУ-ын Ерөнхийлөгч Владимир Путин 2020 оны АНУ-ын Ерөнхийлөгчийн сонгуульд нөлөөлөх гэж оролдсоныхоо горыг тун удахгүй амсах болно гэжээ.
Нөгөөтэйгүүр АНУ-ын Төрийн тэргүүн АНУ болон ОХУ зарим нэг асуудал дээр хамтран ажиллах шаардлагатай гэдгийг онцолжээ. Тэрээр В. Путиныг харьцангуй сайн мэднэ хэмээн ОХУ-ын Ерөнхийлөгчийг "зүрх сэтгэлгүй" хэмээн тодорхойлсон ба Оросын төрийн тэргүүнийг "алуурчин" гэж боддог гэжээ.
Байдены ярилцлага цацагдахын өмнөх өдөр АНУ-ын үндэсний тагнуулын газар 2020 оны ерөнхийлөгчийн сонгуулийн үр дүнг өөрчлөх оролдлогыг гадаадын ямар улс орнууд зохион байгуулсан талаар тайлан танилцуулсан юм.
Уг тайланд өгүүлснээр ОХУ өөрийн тагнуулын сүлжээг ашиглан Бүгд Найрамдах намаас нэр дэвшигч Дональд Трампыг сонгуульд ялуулахын тулд Ардчилсан намаас нэр дэвшигч Жо Байдены нэр хүндийг унагах ажиллагаа зохион байгуулсан гэнэ.
“Би түүнийг харьцангуй сайн мэддэг. Гадаад орнуудын төрийн тэргүүнүүдтэй учраа ололцоход хувь хүнийг нь мэддэг байх маш чухал гэдгийг би өөрийн туршлагаас мэднэ” гэж Байден ОХУ-ын ерөнхийлөгчийн талаар ярьжээ.
Үүний хариуд ОХУ-ын Ерөнхийлөгч Владимир Путины хэвлэлийн нарийн бичгийн дарга Дмитрий Песков АНУ-ын Тагнуулын алба болон Ерөнхийлөгч Жо Байдений мэдэгдэл нь ямар ч нотолгоо баримтгүй бөгөөд хоёр улсын харилцааг дордуулна хэмээн мэдэгджээ.
АНУ-ын засгийн газар Тагнуулын албанаас гаргасан мэдэгдэлтэй холбоотойгоор ирэх долоо хоногт ОХУ-ын эсрэг хориг арга хэмжээ авахаар төлөвлөж байгаа аж.
Байдены ярилцлага цацагдсаны дараа ОХУ-ын гадаад хэргийн яам Вашингтон дахь элчин сайд Анатолий Антоновыг Москвад дуудаж, хоёр улсын цаашдын харилцааны талаар хэлэлцэхээр болсныг мэдэгдсэн байна.
Эх сурвалж: BBC
Содномцэрэнгийн Энхзаяа
mongolcom.mn
Энэ мэдээ танд таалагдаж байвал LIKE хийгээрэй. Танд баярлалаа.