400 сая хүүхэд цар тахлын улмаас сургууль завсардсан хэвээр байна

Twitter Print
2022 оны 03-р сар 30-нд 12:40 цагт
Мэдээний зураг,

НҮБ-ын Хүүхдийн сангаас мэдээлснээр дэлхийн 23 улсад коронавирусын цар тахлын улмаас сургуулиуд хаалттай хэвээр байгаагаас болж 405 сая хүүхэд сургууль завсардаад байна.

ЮНИСЕФ-ийн тооцоолсноор 147 сая хүүхэд танхимын хичээлийнхээ талаас илүү хувьд нь сууж чадаагүй, сургуулиуд нээгдсэн ч эмзэг бүлгийн хүүхдүүд, ялангуяа эмэгтэй хүүхдүүд дахиж сургуульдаа яваагүй тохиолдол ихээр бүртгэгджээ.

ЮНИСЕФ-ийн Гүйцэтгэх захирал Кэтрин Рассел "хүүхдүүд бол цар тахлын далд хохирогчид" хэмээн онцолжээ. Хүүхдүүдийн хувьд коронавирусын халдвар авсан ч хүндрэх тохиолдол цөөн байсан хэдий ч цар тахлын улмаас сургуулиуд хаагдсан нь хүүхдүүдийн амьдралыг орвонгоор нь эргүүлсэн гэж хэлж болох юм.

2020 оны 3-р сард дэлхийн 150 улс сургуулиудаа хааж байсан бол үүнээс хоёр жилийн дараа 19 улсад сургуулиуд хаалттай хэвээр байна.

Филиппин, Гондурас, Соломоны арлууд, Вануату зэрэг улсад нийт сургуулиудынх нь 70 хувь нь хаалттай хэвээр байна. Африкийн улс орнуудад цар тахлаас өмнө хүүхдүүдийн унших, бичих, тоо бодох чадвар бусад улс орнуудтай харьцуулахад доогуур байсан бол цар тахлын дараа уг үзүүлэлт бүр ч буурчээ.

Угандад л гэхэд энэ 1-р сард сургуулиуд нээгдэхэд 10 хүүхэд тутмын нэг нь сургуульдаа эргэж ороогүй байна. Үүнээс гадна үерийн гамшгийн улмаас сургуулийн олон барилга нурсан зэрэг нь мөн хүүхдүүдийн хичээл завсардахад нөлөөлжээ.

Тринидад ба Тобагод сургуулиуд дөнгөж ирэх 4-р сараас нээгдэх ба эцэг эхчүүд наран шарлагын газрууд, баарууд үйл ажиллагаагаа хэвийн явуулж байхад сургуулиуд хаалттай байгаад бухимдаж буйгаа илэрхийлж байна.

Дэлхий 122 улсын зөвхөн 60 хувь нь л сурагчдын хичээлийн хоцрогдлыг арилгах төлөвлөгөө боловсруулсан нь боловсролын салбарыг эрх баригчид чухалчилж авч үзэхгүй байгааг харуулж байна хэмээн ЮНИСЕФ онцолжээ.

Цар тахал нь хүүхдүүдийн боловсролын хүртээмжийн эрх тэгш бус байдлыг илчилж, эрх тэгш бус байдлыг улам даамжруулжээ. ЮНИСЕФ-ийн мэргэжилтнүүд улс орнуудыг боловсролын салбартаа илүү их хөрөнгө оруулалт хийхийг уриалж байгаа ба судалгаагаар боловсролын салбарт оруулсан хөрөнгө оруулалт 2019 онд 8.8 хувиас 2020 онд 5.5 хувь болтлоо буурчээ. Тийм ч учраас улс орнуудын Боловсролын сайд нарт хүүхдүүдийн боловсролын асуудалд нухацтай хандахыг уриалжээ.

Эх сурвалж: BBC

Содномцэрэнгийн Энхзаяа 

mongolcom.mn

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.