Үндэслэлгүйгээр үнэ нэмсэн E-Mart худалдааны төвийг 20 сая төгрөгөөр торгожээ

Twitter Print
2020 оны 03-р сар 13-нд 17:29 цагт
Мэдээний зураг,

Шударга өрсөлдөөн хэрэглэгчийн төлөө газраас E-mart худалдааны төвд махны үнээ буулгах чиглэл өгч, хуулийн дагуу торгуулийн арга хэмжээ авахаа мэдэгдлээ. Махны үнийг үндэслэлгүйгээр нэмсэн гэх иргэдийн гомдлын дагуу өнөөдөр ШӨХТГ-ын дарга Б.Лхагваар ахлуулсан ажлын хэсэг хяналт шалгалт хийжээ.

Хяналт шалгалтаар “И март” дэлгүүр нь 3 дугаар сарын 11-ний өдөр хоньны махны үнийг 1 кг тутамд 1200-аас 1350 төгрөгөөр, үхрийн махыг 1 кг тутамд 1300-аас 1700 төгрөгөрөөр тус тус нэмсэн нь тогтоогдсон байна. Улмаар онцгой нөхцөл байдлын үед худалдааны хууль бус арга хэрэглэн махны үнийг үндэслэлгүй нэмж, хэрэглэгчийг хохироосон үйлдэлд нь “И Март” дэлгүүрт Зөрчлийн тухай хуулийн дагуу 20 сая төгрөгийн торгууль ногдуулжээ. 

ШӨХТГ-ын дарга Б.Лхагва “Бидний тавьсан хяналт шалгалтын дагуу үнээ буулгалаа. Зарагдаж байгаа махандаа шинжилгээний бичгээ тавиагүй, үнээ бичээгүй зөрчил илэрсэн. Өнөөдрөөс үнээ буулгаж хэвийн болгосон. Хомсдол үүсээгүй байхад зохиомлоор үнээ нэмэх ёсгүй. Зөрчлийн хуулиар 5-20 сая төгрөгөөр торгох заалттай. Шалгаж дуусаад ямар шийтгэл ногдуулах нь тодорхой болно. Иргэд хэрэглэгчид үйлчилгээний байгууллагатай холбоотой санал хүсэлтээ нотлох баримттайгаар бидэнд мэдээлбэл хяналт шалгалтыг цагдаагийн байгууллагатай хамтран явуулах болно” гэлээ.

Харин Е-mart худалдааны төвийнхөн "Бид ‘Баяндэлгэр хүнс’ компанийн фирмийн махыг худалдаалдаг. Энэ компани махаа бэлтгэж, тээвэрлэхдээ, чанарын шаардлага тавиад явдаг газар. Мөн коронавирусийн халдварын энэ үед махны нийлүүлэлт ганц манай дээр ч гэлтгүй бусад захуудад ч гэсэн хэцүү байгаа. Манайд мах нийлүүлдэг "Баяндэлгэр хүнс" компани нөхцөл байдалтайгаа нийлүүлээд манайх махны үнээ нэмэх шаардлага тулгараад байна гэсэн хүсэлт өгсөн. Үүний дагуу бид махаа тасалдуулахгүйн тулд хүлээж аваад, махны үнээ жаахан нэмсэн. Огцом айхтар нэмээгүй. Бага зэрэг нэмсэн" гэх тайлбар өгсөн юм. 

Г.Ганаа 

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.