БНХАУ, Энэтхэг хоёроос Шри Ланкийн өрийг бууруулахыг хүсжээ

Шри Ланкийн Төв банк БНХАУ болон Энэтхэг улсаас Шри Ланкийн өрийг аль болох хурдан хугацаанд бууруулж өгөхийг хүссэн байна.

Эдийн засгийн хямралд унасан Шри Ланка улс гадаадын өрөө төлж чадахгүйд хүрч, Олон Улсын Валютын сангаас 2.9 тэрбум ам. долларын тусламж хүсээд байгаа билээ. Нөгөө талаас ОУВС Бээжин болон Делигийн зүгээс Шри Ланкийн төлөх ёстой олон тэрбум ам. долларын өрийн хэмжээг бууруулахаас нааш тус улсад мөнгөн тусламж үзүүлэх боломжгүй хэмээн мэдэгдсэн байна.

Үүнтэй холбоотойгоор Шри Ланкийн Төв банкны дарга Нандалал Вийрасингхэ БиБиСи агентлагт өгсөн ярилцлагадаа талууд түргэн шуурхай арга хэмжээ авах нь бүгдийнх нь ашиг сонирхолд нийцнэ гэдгийг онцолжээ. Тэрээр, "Бидэнд хэр түргэн хугацаанд санхүүгийн баталгаа өгч чадна, төдий чинээ зээлдэгч, зээлдүүлэгч аль алинд нь сайн." хэмээн ярьжээ.

Шри Ланкад инфляцийн төвшин өнгөрсөн жилийнхээс бага зэрэг буураад байна. Гэсэн ч өнгөрсөн сард хүнсний бараа бүтээгдэхүүний үнэ жилийн өмнөхөөсөө 65 хувиар өссөн үзүүлэлттэй байжээ.

НҮБ-ын Хүнсний хөтөлбөрийн хийсэн судалгаагаар Шри Ланкийн нийт хүн амын 30 гаруй хувь буюу 8 сая хүн хүнсний хомстолд өртсөн, тэдгээрээс орон нутагт иргэд өлсгөлөнд илүү нэрвэгдсэн гэж гарчээ.

Эдийн засгийн хямралын улмаас өнгөрсөн жил тус улсад олон тооны жагсаал цуглаан өрнөж, Ерөнхийлөгч Готабаяа Ражапакса нь 7-р сард эх орноосоо зугтахад хүрсэн билээ. Дэлхийх банк Шри Ланкийн эдийн засаг 2022 онд 9.2 хувиар, энэ онд нэмж 4.2 хувиар тус бүр агшина гэж тооцоолжээ.

Шри Ланка улс Бээжинд 7 тэрбум ам. доллар, Делид 1 тэрбум орчим ам. долларын өртэй бөгөөд 2022 оны сүүлээр дээрх хоёр улстай зээлийн эргэн төлөлтийн тал дээр зөвшилцөлд хүрнэ гэж найдаж байсан ч Нандалал Вийрасингхэгийн хэлж байгаагаар бүх зүйл зээлдэгч талуудын шийдвэрээс шалтгаалах аж.

Бие даасан шинжээчдийн үзэж байгаагаар Бээжин Шри Ланкийн өрийг бууруулах нь Бүс ба Зам төслөөр дамжуулан Бээжингээс зээл авсан бусад улс орнуудад энэ нь хэрхэн нөлөөлөхөд бол гэдэг дээр Хятадын эрх баригчид эргэлзэж байгаа бол Энэтхэгийн шийдвэр Бээжингийн шийдвэрээс шалтгаалах магадлал өндөр аж.

Нөгөө талаас Бээжин, Дели хоёр Шри Ланкийн өрийг буурууллаа гэхэд Шри Ланкийн өмнө хувийн хэвшлийнхний өрийн асуудал босож ирэх юм. Шри Ланкийн гадаад өрийн 40 хувийг хувийн хэвшлийн өр эзэлж байгаа аж.

Энэ мэдээ танд таалагдаж байвал LIKE хийгээрэй. Танд баярлалаа.