ОХУ-ын Ерөнхийлөгч В.Путинд гурван жилийн нас үлдсэн үү

Twitter Print
2014 оны 10-р сар 30-нд 15:10 цагт
Мэдээний зураг,

ОХУ-ын Ерөнхийлөгч Путиныг хорт хавдар туссан хэмээн Нэгдсэн улсын “Нью Йорк Пост” сонинд бичжээ. Энэ тухай дурдахдаа “Владимир Путин нойр булчирхайн хорт хавдар туссан. Өвчин нь сүүлийн шатандаа орсон учир түүнд гуравхан жилийн нас үлдсэн” гэдгийг онцолсон байна.

Манай хойд хөршийн Ерөнхийлөгч КГБ-д ажиллаж байхдаа Германы Дрезден хотод анх танилцаж байсан түүний эмч 30 гаруй жил В.Путиныг эмчилж байгаа юм. Харин "Герман эмч нь нутаг буцаж, түүнийг эмчлэхээс татгалзсан нь хорт хавдартай болсныг улам баталгаажуулж байна" хэмээн барууны хэвлэлүүд мөн бичсэн аж.

Энэ сарын эхээр 62 нас хүрсэн В.Путин 1975-1990 оны хооронд хуучнаар ЗХУ-ын Аюулаас хамгаалах газрын Гадаад тагнуул хариуцсан 1-р хэлтэст алба хааж байсан. Тухайн үедээ цаг агаарын хүнд нөхцөлд ажилласны улмаас туссан өвчин нь ийнхүү хорт хавдар болоход хүргэсэн гэж зарим эх сурвалжууд үзсэн байна.

Энэ мэдээлэл баруунд хүчээ авснаар Кремлийн ордон хариу мэдэгдэл хийхэд хүрсэн байна. Ерөнхийлөгчийн Хэвлэлийн төлөөлөгч Дмитрий Песков РИА Новости агентлагт өгсөн ярилцлагадаа Оросын Ерөнхийлөгч Владимир Путин нойр булчирхайн хорт хавдараар өвчилсөн гэдэг бол огт худал мэдээлэл хэмээн няцаагаад "Мөрөөдөцгөөж л байг, хүссэнээ л ярьцгааж байг. Манай Ерөнхийлөгчийн бие хэвийн байгаа" гэсэн байна. Мөн Америкийн нэр хүндтэй The New York Post сонин анх энэ мэдээллийг тараасан нь улс төрийн зорилготой бөгөөд Нэгдсэн улсын эсрэг авч байгаа Орос улсын бодлогыг дээр дооргүй эсэргүүцэж байгаагийн илэрхийлэл гэжээ.

Владимир Путин Оросын төрийн эрхэнд сүүлийн 14 гаруй жил өндөр алба хашихдаа анх удаа амарч төрсөн өдрөө Сибирьт аялаж, загасчилж өнгөрөөсөн билээ.

Харин хамгийн сүүлд Сочид хэлсэн үгэндээ Америкийн гадаад бодлогыг эрс шүүмжилсэн нь иймэрхүү эсрэг дайралт хийх шалтгаан болсон гэж ажиглагчид үзэж байна гэж барууны хэвлэлүүд онцолжээ.

"Украин, Европын холбооны харилцааны талаар далдуур яаран сандран шийдвэр гаргах нь эрсдэлтэйг Орос улс Америк, Европын түншүүдэд анхааруулж, энэ үйл явцыг дагалдан гарсан асуудлуудыг шийдвэрлэх соёлтой яриа хэлэлцээ хийхийг зорьж байгаагаа илэрхийлж байсан" гэж Владимир Путин хэлсэн байна. "Тэд биднийг сонсохыг ч хүсээгүй, үүсээд байгаа нөхцөл байдлыг бодитойгоор ойлгож, гарах замыг хайхын оронд улс үндэстнүүдийн өдөөн турхирснаас төрийн эргэлт хийхэд хүргэсэн. Үүнээс болж улс орныг хамарсан замбараагүй байдал бий болж, эдийн засгийн уналтаас үүдэж ард иргэдийн амьдрал улам ихээр хохирч байна.

Иргэний дайн өдөөхөд хүргэсэн Украины хямрал дэлхийн хүчний харьцаа тэнцвэргүй болсныг үр дагавар. Вашингтоны засаг захиргаа дэлхий нийтийн дайсан гээчийн хийсвэр дүр бий болгож, үүгээрээ холбоотнуудыгаа айлгаж, дэлхийг захирах эрхийг өөртөө авах гэсэн бурангуй бодлогоо тулгаж, олон улсын тавцанд хүйтэн дайны үеийн удирдлагын схемийг дахин амилуулахаар санаархаж байна" гэж Оросын Ерөнхийлөгч буруутгасан юм.

 

Эх сурвалж: http://www.dailymail.co.uk/news/article-2813400/Putin-does-NOT-cancer-insist-Russia-Kremlin

Ц.Мөнхбаяр

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.