Сөүл хотын сургууль, цэцэрлэгүүдийг хаахад хүрчээ

Twitter Print
2020 оны 08-р сар 26-нд 10:15 цагт
Мэдээний зураг,

БНСУ-ын нийслэл Сөүл хотод коронавирусын халдварын тархалт нэмэгдсэнтэй холбоотойгоор эрх баригчид тус хотод үйл ажиллагаа явуулдаг сургууль, цэцэрлэгүүдийг хаах шийдвэр гаргаад байна.

Өнгөрсөн 2 долоо хоногийн хугацаанд Сөүлд сургууль цэцэрлэгийн багш ажилчид болон сурагчид нийлсэн 200 орчим хүн коронавирусын халдвар аваад байна. Өмнөд Солонгосын Боловсролын яамнаас мэдээлснээр төгсөх ангийн сурагчдаас бусад бүх хүүхдүүд 9-р сарын 11 хүртэл хичээлээ цахимаар хийх аж. БНСУ-ын Эрүүл мэндийн яамнаас коронавирусын халдвар Солонгос даяар тархах аюултай байгааг анхааруулжээ.

Түүнчлэн 60-аас бага тооны сурагчидтай сургуулиуд болон тусгай боловсролын сургуулиуд Боловсролын яамнаас гаргасан заавар зөвлөмжийг дагах эсэхээ өөрсдөө шийдэх боломжтой аж. Коронавирусын халдварын тохиолдлууд буурсантай холбоотойгоор БНСУ-ын дийлэнх сургууль цэцэрлэгүүд 5-р сарын 20-ноос 6-р сарын 1-ний хооронд үе шаттайгаар нээгдээд байсан билээ. Жонс Хопкинсийн их сургуулиас мэдээлж байгаагаар коронавирусын цар тахал эхэлснээс хойш Өмнөд Солонгост КОВИД-19 өвчний нийт 17 945 тохиолдол бүртгэгдэж, уг вирусын улмаас 310 хүн нас баржээ.

БНСУ нь коронавирусын цар тахлын эсрэг үр дүнтэй арга хэмжээ авч хэрэгжүүлж, халдварын тархалтыг хяналтандаа амжилттай авч чадсан улс орнуудын нэг юм. Гэсэн хэдий ч сүүлийн хэдэн долоо хоногт Сөүл хотод коронавирусын халдварын тархалт нэмэгдэх хандлагатай байна. Өнгөрсөн мягмар гарагт тус улсад коронавирусын 280 шинэ тохиолдол бүртгэгдсэн ба коронавирусын халдвар 12 дахь өдрөө дараалан 3 оронтой тоогоор нэмэгдэж байгаа аж. Халдварын шинэ тохиолдлуудын дийлэнх нь өнгөрсөн долоо хоногт протестант сүмээс зохион байгуулсан жагсаалд оролцсон иргэд байгаа гэнэ.

Сөүлийн эрх баригчид иргэдээс амны хаалт зүүхийг шаардаж байгаа ба сүм хийд, шөнийн цэнгээний газрууд, караоке баруудын үйл ажиллагааг зогсоогоод байна. Түүнчлэн халдварын тохиолдлууд буурахгүй тохиолдолд эрх баригчид илүү хатуу арга хэмжээ авна гэдгээ анхааруулаад байгаа ба коронавирусын цар тахал эхэлснээс хойш БНСУ-д анх удаагаа худалдаа үйлчилгээний байгууллагууд үйл ажиллагаагаа зогсооход хүрч магадгүй болоод байгаа аж.

Эх сурвалж: BBC

Содномцэрэнгийн Энхзаяа

mongolcom.mn

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.