К.Гарнетт 20 жил тоглосон дөрөв дэх тоглогч боллоо

Twitter Print
2014 оны 11-р сар 29-нд 12:20 цагт
Мэдээний зураг,

NBA-ийн шинэ улирал эхэлж, сагсан бөмбөгийн гайхамшиг бүхэн шингэсэн NBA-ийн тоглолтыг хүүхэд залуучууд шимтэн үзэж байгаа билээ. Энэ удаа домогт сагсан бөмбөгч К.Гарнетт “Бруклин Нэтс” багийн бүрэлдэхүүнд 20 дахь улиралдаа тоглож байна. Түүнээс өмнө амьдралынхаа 20 жилийг мэргэжлийн сагсан бөмбөгт үдсэн гуравхан тоглогч байдаг. Тэд бол К.Абдул Жаббар, К.Уиллис, Р.Патрич юм.

Кевин Гарнетт 1976 оны тавдугаар сарын 19-нд Нэгдсэн улсын Өмнөд Каролина мужийн Гринвилл хотод төржээ. 1995 оны драфтын эхний бүсийн тав дахь сонголтоор “Миннесота Тимбер Уолвез” багт ирж байв. “Цөөвөр чононууд”-ын хамтаар 2004 онд баруун бүсийн дэд аварга, улирлын “үнэ цэнэтэй” тоглогч шагналыг авсан. Мөн бүх оддын тоглолтонд 15 удаа сонгогдон оролцож, 2003 оны бүх оддын тоглолтын “шилдэг тоглогч”-оор шалгарсан аж.

Түүний карьерын дээд амжилт нь 2008 онд тохиож, NBA-ийн аварга болсон. Тэр жил Р.Аллен, П.Пирс нарын хамтаар “Бостон Селтикс”-т их гурвалыг бүрдүүлэн аваргын төлөө гарч ирсэн. Нөгөө талд К.Брайант, П.Газоль, Д.Фишер тэргүүтэй “Лос Анжелес Лэйкерс” баруун бүсийн шилдгээр шалгарч финалд үлдсэн юм. Цуврал тоглолтуудаас эхний хоёрыг нь талбай дээрээ хийх эрхтэй болсон “Бостон” боломжоо зуун хувь ашиглан 98:88, 108:102-оор өрсөлдөгчөө хожсон. Гурав дахь тулаанд 87:81-ээр хожигдсон ч дараа нь 97:91-ээр К.Брайнатын багийг хожиж, цувралыг 3-1-ээр тэргүүлэх болов. Харин тав дахь цувралд К.Брайант 25 оноо авч баг нь 103:98-аар хожиж бага ч гэсэн найдварыг үлдээсэн. Гэвч зургаа дахь тоглолтонд К.Гарнетт, П.Пирс, Р.Аллен нар өрсөлдөгч багтаа ямар ч боломж олголгүй 131:92-оор илт давуу ялалт байгуулжээ.

Аваргын бөгж зүүсэн Кевингийн мэргэжлийн сагсан бөмбөг дэх аялал нь “Бруклин Нэтс”-т үргэлжилж байна. 2013 оны зун ОХУ-ын тэрбумтан М.Прохоров зүүн эргийн багийг худалдан авч багтаа шилдэг тоглогчдыг авч ирсэн. Үүнд нь П.Пирс, Б.Лопез, Ж.Уоллас, К.Гарнетт нар багтсан юм.

 

 

Сэтгүүлч М.Золбаатар

E-mail: mongolcom.mn@gmail.com
Утас: 76110303, 76110505

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.