Японд сургуулийн сурагчдын дунд амиа хорлох явдал хамгийн дээд хэмжээнд хүрсэн гэлээ

Twitter Print
2021 оны 10-р сар 15-нд 12:35 цагт
Мэдээний зураг,

Японд өнгөрсөн хичээлийн жилд амиа хорлосон сургуулийн сурагчдын тоо түүхэндээ хамгийн өндөр үзүүлэлтэнд хүрсэн талаар Японы Боловсролын яамнаас өнгөрсөн лхагва гарагт мэдээлжээ.

2020 оны хичээлийн жилд тус улсад 6-18 насны 415 хүүхэд амиа хорлосон ба үүнд гэр бүлийн асуудал, муу дүн, хүүхдүүдийн харилцаа, өвчин зэрэг олон хүчин зүйлс нөлөөлсөн талаар NHK суваг онцолж байна.

Мөн амиа хорлосон сурагчдын талаас илүү хувийнх нь амиа хорлолтын шалтгаан одоог хүртэл тодорхойгүй байгаа аж. 2020 оны хичээлийн жилд амиа хорлосон сурагчдын тоо 2019 онд амиа хорлосон сурагчдаас 31 хувиар өндөр байгаа ба 2019 оны хичээлийн жилд 317 сурагч амиа алджээ.

Японы Боловсролын яамны дэргэдэх сурагч, оюутнуудын асуудлыг хариуцсан албаны дарга Эгүчи Аричика, "Амиа хорлолтын тоо нэмэгдэж байгаа нь аюулын харанга дэлдэж байна" хэмээн онцолжээ.

Японы Боловсролын яам жил бүр сургуулиудад судалгаа явуулж, сурагчдын дундах амиа хорлолт, дээрэлхэл, хичээлээ таслах явдал зэрэгтэй холбоотой мэдээллийг цуглуулдаг аж.

Судалгаагаар өнгөрсөн хичээлийн жилд бага болон дунд ангийн 190 мянга гаруй сурагчид хичээлээ 30 ба түүнээс олон хоног тасалсан нь тогтоогдсон ба энэ нь 2019 оны хичээлийн жилийнхээс 8 хувиар өссөн үзүүлэлт аж.

Эгүчи Аричика, "Цар тахлын улмаас сургууль болон гэр бүлийн орчинд өөрчлөлтүүд гарч, хүүхдүүдийн зан байдалд нөлөөлсөн нь судалгаагаар тогтоогдсон.

Сургуульдаа явж чадахгүй байгаа хүүхдүүдийн сурах үйл явцыг зогсоохгүй талаас арга хэмжээ авахаар төлөвлөж байна" хэмээн мэдэгджээ.

Цар тахалтай холбоотой тогтоосон хөл хорионы дэглэм нь сурагчдын хичээл таслах явдалд хэр их хэмжээтэй нөлөөлсөн нь тодорхойгүй байна.

Японы сургуулийн хичээлийн шинэ жил 4-р сард эхэлж 3-р сард дуусдаг ба өнгөрсөн жил Японы бага болон дунд сургуулиуд коронавирусын цар тахлын улмаас 3-р сараас 5-р сарыг дуустал хаагдсан аж.

Эх сурвалж: CNN

Содномцэрэнгийн Энхзаяа 

mongolcom.mn

 
Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.