Газраа тасдаад зээлээ төлчихвөл...

Twitter Print
2020 оны 03-р сар 14-нд 12:04 цагт
Мэдээний зураг,

Олон нийтийн эрх ашигт нийцэж байгаа эсэх, эдийн засгийн хувьд үнэхээр үр ашигтай эсэх, нэн тэргүүнд эрэмбэлэн шийдвэрлэх шаардлага байгаа эсэхийг тодорхой судалсан юмгүй дааж давшгүй зээл тусламж дураараа шийдээд авчихдаг энэ их зоригтнууд тавьсан өрийг нь төлж чадахгүй газар нутгаасаа тасдаж өгөх 30 жилийн дараах залуусаа муу хэлэх эрхгүй шүү. Хар хошуулж, муу ёрлосондоо юм биш ээ, үндэсний мөнгөн тэмдэгтээ халаад, өрөндөө нутгаа тасдаж өгсөн саяхны жишээ энэ замбуутивд бий шүү дээ.

Ер нь энэ шийдвэр гаргаж суугаа нөхдийн элдэв төрлийн зээл дураараа авдаг дээр хэн хяналт тавьдаг юм бэ? Гадаадаас тусламж авах дээр ч хаанаас зөвшөөрөл олгодог юм бэ? Юунд зориулж ямар зээлийг ямар нөхцөлтэй авах, хамгийн гол нь яаж зээлийн дарамтгүйгээр эргүүлж төлөх вэ гэдгийг нарийн судалмаар, үр дүнгээ үйлдэл болгон хэрэгжүүлэхээсээ өмнө олон нийтэд нээлттэй үзүүлж, хэлэлцүүлдэг баймаар. Шилэн дансаа эргүүлж авмаар байна. Үгүй бол хөнгөлөлттэй зээл нэрийн дор хөгийн хөгийн юм ацарчихсан тууз хайчилж зогсох бүдүүн дарга нар оройн мэдээ бүрээр ёс мэт гардаг нь хэдэн арван жилээр ч үргэлжилж мэдэхээр байна.

Тэгээд ч бэлэн мөнгө хэлбэрээр урсаж орж ирээд манай эдийн засагт бодитоор тусалдаг зээл тусламж ховор шдээ. Зээлээр зам, барилга барих төслүүдийг маш хатуу хянах хэрэгтэй. Зээл өгсөн нэртэй улс нь голдуу өөрсдийн барилгын материалаа шахаад, өөрсдийн барилгачдаа ажиллуулаад, зам нэртэй там, барилга нэртэй балгас бариад өгчих нь энүүхэнд. Эдийн засгийн үр ашгийн талаар аанайхан байх нь ч бий. Авсан нь үнэн юм чинь 20, 30 жилээр өр төлөх болдог. Цагаа тулахаар үндсэн зээл биш, хүүг нь төлөөд л таардаг. Ингээд л хөөрхий их өрийн урхинд унах нь тэр. Задарсан авлигачидтай, ядарсан ард түмнийг өрөнд унагадаг онол, бүхэл бүтэн тогтолцоо бий тул сэрэмжилбэл зохино.

Гадаах нь гэртээ ороогүй, гэр дэх нь гэдсэндээ ороогүй айл аятай, энэ улс. Байдгаа барж идэж уугаад ханахгүй "гэрт хүүхдүүд хоолгүй, хаяагаар ус нэвтрээд, хананаас салхи сийгээд, хэцүүдэх байна даа, Цэнцрэн минь ээ" маягийн худал үнэн юм ярьж ах дүү, айл амьтнаас хэд гурван юм олоод, олсныгоо барьж олон хоног шоудаад алга болдог аав ээжтэй айл шиг л. Авдраасаа гаргах чадалгүй, айлаас 800 сая доллар гаргуулаад "Тэнгэрийн зам" барих нь хоолой дээр тулсан амин чухал ажил мөн үү? Концессоор барина, жолооч 7 км тутамд 1 доллар төлөхөд 6 жилийн дотор зээл, зээлийн хүүгээ төлж дуусна гэж мэдээнээс там түм уншлаа. Монголын жолооч нар 2 их наяд төгрөг сул гаргаад өгчих тийм бэлтэй болчхоо юу? Бас тэр "дүүжин даажин" төслийг Францаас 60 сая евро 40 жилийн хугацаатай хүүтэй зээлж барина гэнэ.

Хүнд гай болохгүй амьдар гэж эцэг эх чинь та нарыг сургаагүй юү? 30 жилийн дараах үеийнхэндээ дундуур дүүрэн юмтай биш юм гэхэд ёроол нь бүтэн сав үлдээж, нэр цэвэр үхмээр байна шүү, нөхөд минь...

Э.Эрдэнэсувд 

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.