Польшид унасан пуужинг хэн харвасан нь тодорхойгүй байна

Twitter Print
2022 оны 11-р сар 16-нд 10:32 цагт
Мэдээний зураг,

Польшийн Ерөнхийлөгч Анжей Дуда Польш-Украины хилийн ойролцоо байрлах Польшийн тосгонд унасан пуужинг хэн харвасныг тогтоох баримт нотолгоо одоогийн байдлаар байхгүй байгааг онцолжээ.

Украины хилээс 6 км зайд байрлах Пшеводув тосгон пуужингийн цохилтонд өртсөний улмаас 2 хүн амиа алдсан тухай Польшийн онцгой байдлын албан хаагчид мэдээлжээ.

Польшийн хэвлэл мэдээллийн хэрэгслүүдээр мэдээлж байгаагаар пуужин үр тариа хатаах байгууламж дээр унасан аж.

Ерөнхийлөгч Анжей Дудагийн хэлж байгаагаар Варшав уг явдал дахин давтагдана гэж бодохгүй байгаа аж. Түүний хэлснээр Польшийн газар нутаг дээр унасан дээрх пуужин нь Орост үйлдвэрлэсэн пуужин байх өндөр магадлалтай аж.

Нөгөө талаас мөрдөн шалгах ажиллагаа дуусаагүй байгаа учраас буруутныг нэрлэх боломжгүй байгаа гэжээ. Болсон үйл явдалтай холбогдуулан Польшийн тал НАТО-гоос 4-р тогтоолыг хэрэгжүүлэх хүсэлт тавихаар төлөвлөжээ.

Ерөнхийлөгч Анжей Дуда, Ерөнхий сайд Матеуш Моравецкийтэй зөвлөлдөж, Польшийн зэвсэгт хүчний тодорхой анги бүрэлдэхүүнүүдийн байлдааны бэлэн байдлын түвшинг өндөржүүлж, агаарын бүсийн хяналтаа нэмэгдүүлэхээр шийдвэрлэжээ.

Өнгөрсөн мягмар гарагт Польшийн ZET радио Украины хилийн ойролцоо байрлах Пшеводув тосгоны дээрээс хоёр пуужин унасны улмаас 2 хүн амиа алдсан талаар анх мэдээлжээ. Уг үйл явдалтай холбоотойгоор Ерөнхий сайд Матеуш Моравецкий шуурхай хурал зарлаж, Польшийн аюулгүй байдлын болон батлан хамгаалахын сайд нартай хуралджээ.

Өнгөрсөн мягмар гарагт Украины хотууд ОХУ-ын пуужингийн цохилтонд өртөж, Украин даяар агаарын аюулын дохио дуугарчээ.

Украины Агаарын зэвсэгт хүчний зөвлөх Юрий Игнатын мэдээлснээр ОХУ Украин руу 100 орчим пуужин харвасан гэсэн бол Ерөнхийлөгч В. Зеленский ОХУ нийт 85 пуужин харвасны дийлэнх нь Украины эрчим хүчний дэд бүтцийг устгах зорилготой байсан гэжээ.

Киев хотын дарга Виталий Кличкогийн мэдээлснээр Киев хотод 3 орон сууц пуужингийн цохилтонд өртсөн ба Украины пуужин устгах систем хэд хэдэн пуужинг устгаж чаджээ.

Украины цахилгаан эрчим хүч түгээх "Укрэнерго" улс даяар цахилгаан эрчим хүчийг тасалж эхэлжээ. Киев хотын хүн амын тал нь тоггүй хоцорсон бол бусад хотуудад үүрэн телефоны холбоо, интернетийн сүлжээ доголджээ.

Харьков хотод метро болон цахилгаанаар ажилладаг бусад нийтийн тээврийн хэрэгслүүдийн үйл ажиллагаа зогссон байна.

Эх сурвалж: Reuters

Содномцэрэнгийн Энхзаяа

mongolcom.mn

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.