Од хоорондын задгай орон зайд гарч байгаа хүний гараар бүтсэн анхны хиймэл дагуул бол Вояжер юм

Twitter Print
2020 оны 04-р сар 28-нд 16:10 цагт
Мэдээний зураг,

“Voyager project”-ын тухай сонсож байсан уу? Энэ төслийн үр дүнд 43 жилийн өмнө хөөргөсөн хоёр хиймэл дагуул эдүгээ дэлхийгээс 22.2 тэрбум км-ийн тэртээ минутанд мянган км цагийн хурдтайгаар дэлхийгээс алслан холдсоор байна.

22.2 тэрбум км гэдэг хэр хол зай вэ гэдэг талаар төсөөлөл төрж байна уу? 22.2 тэрбум км гэдэг бол 148 au зай буюу гэрлийн хурдаар 20 цаг гаруй явах зай юм. Энэ тоо бол манай гаригийн хэмжээс, ойлголтоор бол тийм хялбар төсөөлөлд буухгүй тоо л доо.

“1 au” зай гэдэг бол нар дэлхий хоёрын хоорондын зай буюу 150 сая орчим км-ийг хэлдэг. Ийм зай Вояжер хөлөг хүртэл 148 байна гэсэн үг.

Гэрлийн хурд гэдэг нь эдүгээ нээж илрүүлсэн хамгийн дээд хурд бөгөөд 1 секундэд 300 мянган км зайг туулах хурд юм. Дэлхийг нэг бүтэн тойроход багцаагаар 40 мянган км гээд бодоод үзвэл 1 секундэд дэлхийг 7-8 тойрчих хэмжээний хурдыг гэрлийн хурд гэдэг аж. Нарнаас дэлхий хүртэл гэрлийн хурдаар 8 минут 19 секундын зай байдаг. Өөрөөр хэлбэл одоо цонхоор харагдаж байгаа нарны туяа 8 минут 19 секундын өмнө нарнаас хөдөлсөн гэрэл юм. Ийм хурдаар 20 секунд ч биш, 20 минут ч биш 20 цаг гаруй явах зайнаас Вояжер хөлөг одоо ч дэлхийд сигнал ирүүлсээр байна.

How can Voyager send a signal strong enough for us to receive, in ...

Өнөөг хүртэл манай гаригаас хөөргөсөн олон хиймэл дагуулууд дундаас хамгийн хол цэгт буюу нарны аймгийн хязгаараас мултарч интерстеллар (2014 онд Кристофер Нолан найруулагчийн Интерстеллар кино нэлээн хит болж байсан) буюу од хоорондын задгай орон зайд гарч байгаа хүний гараар бүтсэн анхны хиймэл дагуул бол Вояжер юм.

Анх 1960-аад оноос алдарт “Маринер” төсөл хэрэгжиж, наранд харьцангуй ойр буюу астероид бүсийн Буд, Сугар, Ангараг гаригийг судлах хиймэл дагуулыг хөөргөж байсан бол 1970-аад оноос алслагдсан Бархасбадь, Санчир гаригийг судлах зорилгоор “Вояжер” төслийг эхлүүлжээ. Вояжер төслийн хүрээнд Вояжер-1, Вояжер-2 гэх хоёр хиймэл дагуулыг бүтээж 1977 оны 8, 9 дүгээр саруудад хөөргөсөн байна. Аль нэг нь гэмтэл гарвал нэг нэгийгээ нөхөх зорилготой ихэр Вояжерүүдийг нэг өдөр хөөргөхөөр төлөвлөж байсан ч Вояжер-1-ийн хөөргөх төхөөрөмжид гэмтэл гарсны улмаас 1977 оны 8 дугаар сарын 20-нд Вояжер-2-ыг хөөргөж үүнээс хагас сарын дараа 9 дүгээр сарын 5-ны өдөр Вояжер-1-ийг хөөргөжээ.

Voyager

Наранд харьцангуй ойрхон астероид гариг(Буд, Сугар, Дэлхий, Марс)-аас бусад алслагдсан гадаад 4 гариг(Бархасбадь, Санчир, Тэнгэрийн ван, Далайн ван) нэгэн чиглэлд давхацсан тохиолдол 1977-1979 онд тохиосон юм. Өөрөөр хэлбэл бүх гаригууд өөр өөрийн тойрог замаар, өөр өөрийн хурдаар нарыг тойрдог боловч нэг чигт бүгд давхцах нь тийм элбэг үзэгдэл биш юм. Алслагдсан гадаад гаригуудын нэгэн чигт давхцах тохиолдол 175 жилд нэг болдог ховор үзэгдэл гэнэ.

Чухам л энэ үеийг тааруулан хөөргөсөн ихэр Вояжерүүд үүргээ маш амжилттай гүйцэтгэсэн юм. Вояжер-1 нь Бархасбадь, Санчирыг дайран өнгөрсөн бол Вояжер-2 нь Бархасбадь, Санчир, Тэнгэрийн ван, Далайн ванд ойрхон очиж маш чухал олон мэдээллийг дэлхийд дамжуулж шинжлэх ухааны хөгжилд үнэлж баршгүй хувь нэмэр оруулан зорилгоо амжилттай гүйцээсэн хэдий ч одоо хэр нь нарны аймгийн хязгаараас мултарч од хоорондын задгай сансраас дохио ирүүлсээр байна.

Нарны аймгаас гарна гэдэг үг нэлээн маргаан дагуулж магадгүй л дээ. Энэ нь нарны аймгийг хэрхэн тодорхойлж, ойлгохоос хамаарна. Нарны татах хүчний нөлөөгөөр нарны аймгийг тодорхойлбол гэрлийн хурдаар 1 жил гаруй явах зай учраас вояжерүүд нарны аймгаас гарахыг бид байтугай бидний үр удам, ер нь хүн төрөлхтөн үзэхгүй биз. Гэхдээ судлаачид нарны аймгаас гарсан гэж үзээд байгаа нь нарны аймгийн тодорхойлолтыг нарны татах хүчний нөлөөгөөр биш нарны гэрлийн бөөмсийн хүрэх нөлөөллийн хязгаараар тооцож буй хэрэг юм. Энэ хязгаарыг 18 тэрбум км орчим гэж үздэг. Тэд одоо 22 тэрбумын алсад яваа гэж би өмнө хэлсэн.

How far can Voyager 1 go before we lose contact? - YouTube

Ихрүүд азгүйтэж хаа нэгтэй сансрын биетэд татагдаад орчихгүй бол түнэр харанхуй, аюумшигт хүйтэн (хасах 200 хэмээс доош)сансрын уудамд үүрд аялсаар байх болно. Аяллын зорилгоо хэдийнээ биелүүлсэн хүн төрөлхтний түүхийн хамгийн агуу аялагч ихрүүд маань эх дэлхий рүүгээ хэзээ болтол мэдээлэл дамжуулах нь тэдний эрчим хүч хэдий болтол тэсэхээс хамаарна.

Ер нь хиймэл дагуулын нас нь эрчим хүчний эх үүсвэртэйгээ шууд холбоотой. Дэлхийн ойролцоо тойрог замд гаргаад тавих гэж байгаа бол эрчим хүчний үүсвэрийг хялбар шийдэж болох ч олон гариг алгасан аялаж буй эдгээр хиймэл дагуулын хувьд зөвхөн өөрийн тэжээлээр өдий болтол явах нь боломжгүй.

Үүнийг шийдвэрлэх боломжийг хүн төрөлхтөн л болсон хойно олоод авчээ. Калифорны их сургуулийн Жет хөдөлгүүр судлах хүрээлэнд дадлага хийж байсан Майкл Минович гэх залуу 1961 онд ‘Swing by’нислэгийн хуулийг санаачилжээ. ‘Swing by’ гэдэг нь хар ухаандаа хиймэл дагуулын маршрутыг урьдчилан сайтар тооцож аль нэг гаригт ойртуулбал тэр гаригийн татах хүчний нөлөөнд автан татагдаж хурдаа авах бөгөөд дэлхийгээс өгсөн командын дагуу цаашид тэр хурдаа ашиглан тухайн гаригт ойрхон зөрөн өнгөрч цаашаа явах зарчим юм л даа.

Манай аялагчдын хувьд өмнө хэлсэнчлэн алсын дөрвөн гариг нэгэн чигт эгнэснийг тооцон хөдөлгөсөн бөгөөд ялангуяа Бархасбадь, Санчир гаригууд татах хүч ихтэй том гариг учраас свинбай аялал их үр дүнтэй болжээ.

Задгай сансарт агаар ч юм уу торох юм байхгүй учраас хөлгүүд свинбай-аар олж авсан хурдаараа цаашид явсаар байх болно. Харин хөлгүүдтэй аль болох удаан холбоотой байхын тулд эрчим хүчийг хэмнэх зорилгоор зарим төхөөрөмжүүдийг унтраасан байна. Камер, дулаан хэмжигч зэргийг унтраасан бөгөөд одоо долгион, туяа, энергийн үзүүлэлтийг хэмжигч төхөөрөмжүүд л ажиллаж байгаа юм байна. Сүүлийн үед хүн төрөлхтөн сансраас сигнал, долгион хүлээн авах чадвар маш сайжирсан тул вояжерүүд тэжээл байгаад сигнал ялгаруулж л байгаа бол бид дохиог хүлээн авсаар байх болно. Мэдээж Вояжерээс ялгарч байгаа сигнал гэрлийн хурдаас илүү хурдалж чадахгүй тул мэдээлэл хүлээж авахад, 20 цаг зарцуулах нь ойлгомжтой.

NASA's Voyager 2 becomes second spacecraft in history to reach ...

Вояжерүүдийн мэдээг мөч тутам update хийдэг ийм сайт байгаа тул орж үзээрэй.

https://voyager.jpl.nasa.gov/mission/status/

Сонирхуулаад хэлэхэд хиймэл дагуулыг хөөргөхдөө харь гаригийнхантай учирч магадгүй гээд дэлхийн тухай мэдээллийг оруулсан алтан дискийг суулгажээ. Алт бол мууддаггүй сайн метал учир он цагийн уртад хэвээр байна. Дискэнд дэлхийн байгаль орчин, соёл иргэншил, хүн төрөлхтний хөгжил дэвшлийг харуулсан мэдээлэл, 118 зураг, 55 хэлээр хийсэн мэндчилгээ, Тухайн үеийн АНУ-ын ерөнхийлөгч Жимми Картер, НҮБ-ын Ерөнхий нарийн бичгийн дарга Курт Валтхаим нарын мэндчилгээ багтжээ.

Вояжерүүд “70-аад оны бүтээгдэхүүн” тул суурилуулсан камер, санах ой, ram, cpu нь одоо бидний барьдаг гар утасны хаана нь ч хүрэхгүй гэсэн шинжлэх ухааны хөгжил, сансар судлалд үнэлж баршгүй их хувь нэмэр оруулж, хүн төрөлхтний түүхэнд “алтан үсгээр тэмдэглэгдэх”аугаа үйлсийн эзэн болон мөнхөрнө.

Дараагийн цувралаар Вояжер болоод Карл Сэйган хэмээх эрхэмийн тухай тэд бидэнд, бидний үр хойчид ямар мессэж, ямар захиас үлдээж байгаа талаар өгүүлнэ. Яг үнэндээ энэ цуврал бичвэрийн гол хэсэг нь дараагийн цувралд гарах юм.

Үргэлжлэл бий...

Жигжидсүрэнгийн Гантулга

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.