Эмчлэгдсэн хүний шинжилгээнд COVID19 дахин эерэг гарсан ч, халдварлахгүй

Twitter Print
2020 оны 07-р сар 21-нд 19:02 цагт
Мэдээний зураг,

ХӨСҮТ-д эмчлэгдээд гарсан хүний шинжилгээ дахин эерэг гарчээ гээд л хүмүүс эвэртэй туулай үзсэн юм шиг, за бараг л халдварыг гадагшаа алдчихсан юм биш үү хэмээн шаагилдаад, нийгмийн сүлжээгээр дүүрэн нэг иймэрхүү санаа зовсон мэдээлэл байна. Уг нь бол сандралдаад байх зүйл биш л дээ. Товчхон тайлбар өгөөд зарим нэг нийтлэгдсэн ач холбогдолтой гэж хэлж болохоор судалгааны дүнг танилцуулья. Эмнэлгийн тусламж үйлчилгээг төлөвлөхөд чухал ач холбогдолтой байж болох судалгааны үр дүн гэсэн үг.

PCR шинжилгээгээр шинэ коронавирусын онцлог нуклеотидын дараалал бүхий нуклейн хүчлийг олшруулдаг тул хэмжээ нь маш бага байсан ч авсан сорьцонд вирус агуулагдаж л байвал эерэг гарах болно. Гэхдээ, зарчмын хувьд PCR шинжилгээ чинь нуклейн хүчил байгаа эсэхийг л харуулж байгаа болохоос биш вирусын халдварлах чадвартай эсэхийг бол мэдэхгүй гэсэн үг шдээ.

Хятадын Уханьд бас PCR эерэг байсан ч халдварлах чадваргүй хэмээн эмнэлгээс гаргаж байсан мэдээллүүд гарсан. Халдвар авсан вирус үхэж, задран халдварлах чадвараа алдсаны дараа ч гэсэн нуклейн хүчлийн хэсгүүд хэсэг хугацаанд биед үлддэг. Энэ үед PCR шинжилгээ хийх юм бол хариу эерэг л гарах ёстой. Бүр ойлгомжтой хэлэх юм бол амьгүй вирусийн сэг байгаад, тэр нь шинжилгээгээр эерэг гарч ирээд байна гэсэн үг.

PCR шинжилгээ сөрөг гарч байгаад эерэг болсон тохиолдлууд өнөөдрийг хүртэл гадны улс орнуудад олонтой мэдээлэгдсэн (зураг А: БНСУ-д хийгдсэн судалгаа. 1 тохиолдол нь бүр сийвэнгийн донор болсон ч халдвар тараараагүй байх жишээтэй).

Манай тохиолдлууд ч гэсэн ийм байх шиг байна. Энэ нь үхсэн амьгүй вирус илэрч тэр нь эерэг хариу гараад байгаа магадлалтай гэж хувьдаа бодож байна. Мэдээж хэрэг магадгүй өмнө нь хуурамч сөрөг гарч байсан эсвэл бүр дахин халдвар авсан байхыг үгүйсгэхгүй л дээ. PCR шинжилгээ эерэг гарч байгаа ч ихэнхдээ халдварлах чадваргүй тохиолдол байна (зураг B) Энэ нь Тайвань, Герман хоёр ч улсад хийгдсэн судалгаагаар нотолгоожихоор байна.

Германд хийгдсэн судалгаагаар оношлогдсоны шууд дараа нь өндөр магадлалтайгаар вирусийг ялгаж авч чадаж байсан бол өдөр өнгөрөх тусам багасаж өвчин эхэлснээс хойш 8 хоногоос хойш шинжилгээ авсан бүх хүмүүсээс амьд вирус ялгаж авч чадаагүй байна. Вирусийн титрийн хэмжээ, ялгаж өсгөвөрлөсөн үр дүн Тайваньд хийгдсэн судалгаатай нийцэж буй юм. Эдгээрээс юу гэж хэлэх гээд байна гэхээр шинэ коронавирусшинж тэмдэг илрэх буюу өвчин эхэлснээс хойш нэг долоо хоног өнгөрөвөл аль хэдийн бусдад халдаах чадвараа алдаж байна гэж үзэхээр байгаа юм.

Эх сурвалж: JAMA Intern Med. Published online May 1, 2020. doi:10.1001/jamainternmed.2020.2020

Манай нөхцөл байдал одоогоор PCR эерэг өвчтөн халдвар тараах чадвартай эсэхийг нарийвчлан тогтоох боломжгүй байна. Өөрөөр хэлбэл шинэ коронавирусийг тусгаарлан ялгаж авч, өсгөвөрлөх арга зөвхөн биологийн хамгийн аюултай эмгэг төрүүлэгчдийг хянах чадвартай хязгаарлагдмал лабораторийн түвшинд хийгдэх боломжтой тул манайд хараахан тийм лабортори байхгүй гэсэн үг. .

Халдварлах чадваргүй ч PCR-аар эерэг гардаг тохиолдол сүрьеэгийн практикт ч хамгийн элбэг тохиолддог.

Хэрэв PCR эерэг байсан ч халдваргүй гэдэгт итгэлтэй байгаа бол өвчтөний амьдралын чанар, эрүүл мэндийн салбарын нөөцийг хэмнэх үүднээс авч үзвэл эмнэлгээс (эмчлэгдээд дараагийн шатны хяналтанд байсан ч) түргэн гаргахад асуудал байхгүй гэсэн чиг хандлага дэлхий нийтэд байх шиг байна.

Анагаах ухааны доктор О.Батгэрэл 

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.