Шумбагч онгоц маш хүчтэй даралтын улмаас дэлбэрсэн гэж үзэж байна
Өнгөрсөн ням гарагт алга болсон Титан шумбагч онгоцыг эрэн хайх ажиллагааны үеэр далайн ёроолд Титаник хөлөг онгоцноос 500 орчим метрийн зайд Титан шумбагч онгоцны хэсгүүд олдож, шумбагч онгоцонд байсан 5 зорчигч амиа алдсан тухай Америкийн Эргийн хамгаалалтын албаны контр-адмирал Жон Могер мэдэгджээ.
Далайн ёроолоос олдсон хэсгүүд Титан шумбагч онгоцон дээр "маш ноцтой осол" гарсныг илтгэж байгаа аж.
АНУ-ын Тэнгисийн цэргийн хүчин Титан шумбагч онгоц холбоо тасарсны дараахан тухайн бүсэд хэвийн бус чимээ бүртгэгдсэн тухай Америкийн Эргийн хамгаалалтынханд мэдэгджээ. Энэхүү чимээ нь шумбагч онгоц дэлбэрэх үеийн чимээ байсан байх өндөр магадлалтай байгааг мэргэжилтнүүд онцолж байна.
Шумбагч онгоцыг эрэн хайх ажиллагааны үед усан доор чимээ гарсан тухай мэдээлж байсан нь Титан шумбагч онгоцны зорчигчдын зүгээс гаргасан чимээ биш болох нь тодорхой болсон байна. Учир нь Титан шумбагч онгоц эрэн хайх ажиллагаа эхлэхээс өмнө дэлбэрсэн байх магадлалтай байгаа аж.
Канадын Тэнгисийн цэргийн хүчинд шумбагч онгоцны ахмадаар алба хааж байсан Райан Рамзигийн мэдээлснээр АНУ, Канадын эрх баригчид далайн ёроолоос Титан шумбагч онгоцноос үлдсэн хэсгүүдийг гарган авч, осол гарах болсон шалтгааныг тогтоохоор ажиллах гэнэ.
Тэрээр, "Шумбагч онгоцонд нисэх онгоцонд байдаг шиг хар хайрцаг байхгүй учраас шумбагч онгоцон дээр сүүлийн мөчүүдэд юу болсныг мэдэх боломжгүй. Гэхдээ далайн ёроолоос шумбагч онгоцны аль болох олон хэсгүүдийг гаргаж ирснээр мэргэжилтнүүд ямар эвдрэл гэмтэл гарсан байж болохыг, цаашлаап сүүлийн мөчүүдэд юу болсныг ч тогтоож магадгүй юм." хэмээн ярьсан байна.
Титан шумбагч онгоцны 5 хэсэг олдсон ба одоохондоо дэлбэрэлт яг хэдийд болсон, шалтгаан нь юу байсныг хэлэх боломжгүй байгаа аж.
Контр-адмирал Жон Могерын хэлснээр Титан шумбагч онгоцны сүүл болон ёроолын хэсэг олдсон нь шумбагч онгоц дэлбэрсэн байж болзошгүйг харуулж байгаа аж.
Мөрдөгчид бүх хэсгүүдийг нарийвчлан шалгаж, шумбагч онгоцонд бүтцийн алдаа гарсан эсэхийг тогтоох юм.
Хэрэв шумбагч онгоцны бүтцэд гэмтэл гарсан бол Титан шумбагч онгоц Эйфелийн цамхагийн жинтэй тэнцэх асар их хэмжээний даралттай тулсан байх магадлалтай бөгөөд энэ нь онгоцны их биед маш хүчтэй дэлбэрэлт болох шалтгаан болох аж.
Эх сурвалж: BBC
Содномцэрэнгийн Энхзаяа
mongolcom.mn
Энэ мэдээ танд таалагдаж байвал LIKE хийгээрэй. Танд баярлалаа.
