175 саяын Birkin цүнхний эзэгтэй

175 саяын Birkin цүнхний эзэгтэй

Hermes брэндийн Birkin загварын цүнх 10 мянгаас 55 мянган долларын үнэтэй байдаг. Тоолдог нь байсан ч Birkin цүнхийг шууд авчихдаг эд биш. Захиалга өгч өөрт нь зориулан хийсэн цүнхийг бэлэн болохыг хөөрхөн хугацаанд хүлээдэг.

Тэгвэл энэ цүнхийг анх Англи, Францын үзэсгэлэнт жүжигчин, дуучин 20-р зууны загварын охин тэнгэрүүдийн нэг Жейн Биркинд зориулан Hermes ордноос урлаж түүний нэрээр нэрлэсэн түүхтэй юм.

Жейн 1946 онд Лондонд төржээ. Тэрээр жүжигчин ээж Жүди, Эзэн хааны тэнгисийн цэргийн флотын командлагч Дэвид Биркин хоёрын охин юм.

Жейн анх урлагийн тайзнаа дуучнаар карьераа эхлүүлж, 19 насандаа анхны нөхөр хөгжмийн зохиолчтой гэрлэн охин төрүүлжээ.

1966 онд 22 настай үзэсгэлэнт Жейн Францын дуучин жүжигчин Серж Гинзбургтай хамтран Slogan кинонд тоглосноор хоёр дахь нөхөртэйгээ танилцсан юм.

Жейн энэ киноны дууг Сержтэй хамтран дуулсан нь толгой эргэм амжилт авчирчээ. Өөрөө дуугаа бичиж дуулдаг алдарт дуучин жүжигчин Серж Гинзбург амрагтаа зориулан дуу бичих болов.

Жейн урдуураа тайрсан задгай хонгор үс, ер бусын гоёмсог хар цэнхэр индранил мэт нүдтэй, сэтгэл булаам бүсгүй байлаа.

Тэрээр биед эвтэйхэн даавуун цамц, хуучивтар жийнс углан хайш яйшхан хувцаслаад цүнхний оронд сүлжмэл сагс барьж явах дуртай байж. Жейн Биркиний ингэж хайнгадуухан хувцаслаад яваа нь тэр үедээ хамгийн дур булаам бүсгүйн дүр төрхийг бүрдүүлж чаддаг байсан аж.

1983 онд нэгэн удаа Парис-Лондонгийн галт тэргэнд Hermes загварын ордны ерөнхий захирал Жан Луи Дюма үзэсгэлэнт Жейнтэй суудал таарсан нь домогт Birkin цүнхний санаа төрүүлсэн байна.

Жейн аанай л өнөөх сүрлэн сагсаа барьж яваад алдаж юмаа асгачихав. Жан Луи түүнээс яагаад гоёмсог загварын арьсан цүнх барихын оронд сагсанд юмаа хийдгийн учрыг асуухгүй өнгөрч чадсангүй. Жейн "Яагаад гэвэл үү? Надад сагс шиг эвтэйхэн атал арьсан цүнх олдохгүй юм" гэжээ.

Удалгүй Hermes-ээс Жейнд зориулан бүтээсэн дээгүүрээ онгойдог хар арьсан цүнх ирүүлэв. Нэгэнт Жейн Биркинд тусгайлан зориулж бүтээсэн тул цүнхийг Birkin гэж нэрлэжээ.

Birkin Биркин хатагтайд таалагдсанаар үл барах, дээдсийн ганган хатагтай нарын дурладаг загвар болж чадсан аж.

Жейн 3 охин төрүүлсний дундах нь буюу Серж Гинзбургээс төрүүлсэн охин Шарлотта Гинзбург ээж аавынхаа урлагийн авъяасыг өвлөсөн алдарт жүжигчин юм.

20-р зууны загварын охин тэнгэр, дэлгэцийн гоо үзэсгэлэн болж явсан Жейн Биркин хоёр хоногийн өмнө 76 насандаа таалал болжээ.

Б.Шүүдэрцэцэг

 

Энэ мэдээ танд таалагдаж байвал LIKE хийгээрэй. Танд баярлалаа.