Энэтхэг улс аравдугаар сарын 15-наас жуулчдыг хүлээн авч эхэлнэ

Twitter Print
2021 оны 10-р сар 09-нд 17:42 цагт
Мэдээний зураг,

Энэтхэг улс энэ сарын 15-наас эхлэн гадаадын жуулчдыг хүлээн авах талаар тус улсын засгийн газраас мэдээлжээ. 2020 оны 3-р сараас хойш буюу коронавирусын цар тахалтай холбоотойгоор Энэтхэгийн Ерөнхий сайд Нарендра Моди улсынхаа хилийг хааснаас хойш гадаадын жуулчид анх удаа Энэтхэг рүү жуулчлах виз хүсэх боломжтой болж байгаа юм.

Энэтхэгийн Дотоод хэргийн яамнаас, "Нөхцөл байдлыг судалсны үр дүнд Энэтхэгийн Дотоод хэргийн яам 2021 оны 10-р сарын 15-наас чартер нислэгээр ирэх жуулчдад жуулчны виз олгож эхлэх шийдвэр гаргалаа" хэмээн мэдэгдэл гаргажээ.

Түүнээс гадна арилжааны хуваарьт нислэгээр ирэх жуулчдад виз олгох явдлыг 2021 оны 11-р сарын 15-наас эхлүүлэх аж.

Азийн 3 дахь том эдийн засаг болох Энэтхэг улсын хувьд аялал жуулчлалын салбар томоохон байр суурт эзэлдэг ба 2019 онд л гэхэд тус улс 10.93 сая жуулчин хүлээн авч байжээ.

Энэтхэг улсын эрх баригчид гадаадын дипломатууд болон бизнес эрхлэгчдэд шат дараатайгаар виз олгож, эдийн засгийн ихэнх үйл ажиллагаануудаа сэргээсэн ч жуулчдад виз олгож эхлээгүй байсан юм.

Өнгөрсөн 5-р сард 1.3 тэрбум хүн амтай Энэтхэг улс коронавирусын цар тахлын давалгаанд өртөж, өдөртөө коронавирусын халдварын улмаас 4000 хүн нас барж байсан билээ.

Үүнд коронавирусын дельта хувилбарын тархалт, мөн эрх баригчдын зүгээс спортын тэмцээн уралдаан, шашны баяр ёслол зохион байгуулахыг зөвшөөрч, олон тооны хүмүүс нэг дор цуглуулсан зэрэг нь нөлөөлжээ.

Сүүлийн хэдэн долоо хоногт нэг өдөрт бүртгэгдэх коронавирусын халдварын тохиолдлуудын тоо 20 мянга болтлоо буурч, нас баралтын тоо 200-300 болсон билээ.

Энэтхэгт ирэх гадаадын жуулчид, жуулчдыг тээвэрлэх онгоцнууд болон жуулчдыг хүлээн авах газрууд бүгд коронавирусын эсрэг халдвар хамгааллын дэглэмээ баримтална гэдгийг Энэтхэгийн Дотоод хэргийн яам онцолжээ.

Энэтхэгчүүдийн хувьд Энэтхэгт үйлдвэрлэсэн коронавирусын эсрэг AstraZeneca компанийн вакцин болон Энэтхэгийн компанийн КОВАКСИН вакцинд хамрагджээ.

Эх сурвалж: Aljazeera

Содномцэрэнгийн Энхзаяа 

mongolcom.mn

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.