Ерөнхий сайд Н.Алтанхуяг Э.Бат-Үүл найздаа их л гомдсон бололтой

Twitter Print
2014 оны 10-р сар 21-нд 12:38 цагт
Мэдээний зураг,

Хотын дарга Э.Бат-Үүл өчигдөр Нийслэлийн АН-ын даргын хувиар хэвлэлийн бага хурал зарлаж, МАХН-тай хамтын ажиллагааны гэрээ үзэглэсэн намын дарга Н.Алтанхуягийг буруутгаж байгаагаа илэрхийлж, сайдыг ийм шийдвэр гаргасанд цочирдсон гэдгээ мэдэгдсэн. Түүнчлэн уг гэрээнд заасан зарим заалтуудыг нийслэлд хэрэгжүүлэхгүй гэдгээ ч хэлсэн юм.

Өнгөрсөн бямба гарагт Ерөнхий сайд Н.Алтанхуяг МАХН-ын дарга Н.Энхбаяртай 2024 он хүртэл хамтран ажиллах гэрээ байгуулсан. Ерөнхий сайдын мэдэгдснээр өнгөрсөн дөрөвдүгээр сард МАХН гэрээгээ шинэчлэн байгуулах хүсэлт тавьсан аж. Үүний дагуу тавдугаар сард АН-ын Гүйцэтгэх зөвлөл хуралдаж гэрээгээ шинэчлэн байгуулахыг зөвшөөрсөн байна.

Үүнийг хотын дарга МАХН-тай ингэж гэрээ байгуулахын өмнө АН-ын ҮЗХ хуралдуулах ёстой байсан хэмээн бухимдсан бол Ерөнхий сайд өнгөрөгч 2012 онд АН-ын ҮЗХ хуралдаж МАХН-тай гэрээ байгуулах шийдвэр гаргасан. Энэ удаад зөвхөн тэр гэрээг шинэчилсэн, тэгээд ч Засгийн газраа унагаж МАНАН байгуулах хүсэлтэй хүмүүс л дахин ҮЗХ хуралдуулна биз хэмээн амыг нь таглав. 

Нэгэн цагт ангийн журамт найз хэмээн нөхөрлөж явсан нэг намын лидер хоёрын маргаан ийнхүү ил цагаандаа гарч, олны анхаарлын төвд аль хэдийнээ орсон. Харин Засгийн газраа авч үлдэхийн тулд жижиг намуудтай нэгдэх замыг сонгосон Ерөнхий сайд эрхэм хотын даргад их л гомдсон бололтой. Тэрээр энэ талаараа өөрийн цахим хуудаснаа “МАН-ынхан намайг хангалттай гүтгэж, доромжилж байхад миний найз Э.Бат-Үүл намайг ингэж түгжилдэх хэрэг юун, бид хоёр улсын хөгжил, Улаанбаатарын утааг арилгах тухай ярих цаг биш үү?” хэмээн бичжээ.

 

Г.Ганаа

 

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.